Աջակցություն բիզնեսին. խաբկանք և իրականություն

Կառավարության որոշմամբ` փոքր ու միջին բիզնեսները, որոնք 2019 թվականին ունեցել են 24-500 մլն դրամ շրջանառություն, կարող են դիմել` արտոնյալ պայմաններով վարկ ստանալու նպատակով։

Կառավարությունում հրավիրած ասուլիսում էկոնոմիկայի փոխնախարար Նաիրա Մարգարյանը ներկայացրել է Փոքր ու միջին բիզնեսի աջակցության պայմանները: Ոլորտները, որոնք կարող են աջակցության համար դիմել, հետևյալն են` մշակող արդյունաբերություն, հանրային սնունդ, փոխադրումներ, զբոսաշրջային ծառայություններ, առողջապահական ծառայություններ, սպասարկման այլ ծառայություններ։ Կառավարությունը գտնում է, որ սրանք այն ոլորտներն են, որոնք ամենախոցելին են այս իրավիճակում, ավելի շատ են տուժում։ Հիմնական պահանջներից մեկն այն է, որ աջակցության ծրագրին դիմող ՓՄՁ-ն պետք է ունենա բարվոք վարկային ու հարկային պատմություն և կարողանա ներկայացնել անձնական երաշխավորություն: Վարկի առավելագույն չափը 50 մլն դրամ է, բայց ոչ ավելի, քան տնտեսվարող սուբյեկտի 2019 թվականի շրջանառության 10 տոկոսը:

Տրամադրվող վարկային միջոցները կարող են օգտագործվել հետևյալ նպատակով՝ աշխատավարձի վճարման, բայց ոչ ավելի, քան երեք ամսվա, տուրքեր վճարելու, հումքի գնման ու ներմուծման համար՝ պայմանով, որ հումքը պետք է օգտագործվի ՀՀ-ում։ Վարկային միջոցներով կարելի է իրականացնել նաև հանրային ծառայությունների ու վարձակալական վճարումները։ Վարկերը տրամադրվելու են 36 ամսով` 3 տարով, առաջին 12 ամիսներին անտոկոս, 25-36-րդ ամիսների համար արդեն տարեկան 12 տոկոս տոկոսադրույք են ունենալու։ Առաջին վեց ամիսն արտոնյալ ժամանակահատված է, այդ ընթացքում վարկերի մարում տեղի չի ունենա։
Այս որոշումն ընդունվել է կառավարության վերջին նիստում, ի թիվս կորոնավիրուսի հետևանքով տնտեսությանը հասցված վնասների հատուցման փաթեթի մաս:
Կառավարության այս որոշումից դժգոհ են սպասարկման ոլորտի, մասնավորապես ռեստորանային բիզնեսի ներկայացուցիչները: Նրանք այդ մասին հայտարարություն են տարածել` իրավացիորեն նշելով, որ կորոնավիրուսն ամենամեծ հարվածը հասցրել է ռեստորանային ոլորտին:
Անդրադառնալով այդ դժգոհություններին՝ էկոնոմիկայի փոխնախարար Նաիրա Մարգարյանը նշել է, որ բարձրացված հարցերը հիմնականում տեղ են գտել կառավարության առաջարկած աջակցության ծրագրերից երկուսում։ Ըստ փոխնախարարի` սպասարկման ոլորտի բիզնեսի համար կառավարությունը չի նախատեսել հարկային արձակուրդներ, և նման հարց այս պահին օրակարգում չունի:
Հիշեցնենք, որ հարկային արձակուրդների խնդիրը նշված էր ռեստորանային բիզնեսով զբաղվողների պահանջներում: Իրապես, եթե այս փուլում ռեստորանները փակ են, ի՞նչ հարկ վճարելու մասին կարող է խոսք լինել:

Հայկ Դավթյան