G20-ի առաջին օնլայն հավաք. Աշխարհի մեծերը՝ ճգնաժամի մեջ

Երեկ կայացավ «Մեծ քսանյակի» պատմության մեջ առաջին վիրտուալ գագաթնաժողովը, որը նվիրված էր կորոնավիրուսի դեմ պայքարին ուղղված միջոցառումներին:
Այս տարի G20-ում նախագահում է Սաուդյան Արաբիան, և գագաթնաժողովի բացումն արեց սաուդացի թագավոր Սալման բին Աբդել Ազիզ Ալ-Սաուդը: Մյուս համաշխարհային առաջնորդները թագավորի խոսքին հետևել են իրենց աշխատասենյակներից էկրանների օգնությամբ:

«Մեր հանդիպումն անցկացնում ենք՝ ցույց տալով մեր՝ աշխարհի խոշորագույն տնտեսությունների ղեկավարների պատասխանատվությունը կորոնավիրուսի համավարակին դիմագրավելու հարցում, ինչը պահանջում է վճռական միջոցների ձեռնարկում տարբեր մակարդակներով»,- ասել է սաուդացի թագավորը:
Գագաթնաժողովին միացել են նաև Իսպանիայի, Հորդանանի, Սինգապուրի, Շվեյցարիայի ղեկավարները:

Միջազգային կազմակերպությունները ժողովում ներկայացնում են ՄԱԿ-ը, ԱՀԿ-ն, Առևտրի համաշխարհային կազմակերպությունը, Պարենի և գյուղատնտեսության կազմակերպությունը, Համաշխարհային բանկի խումբը, ԱՄՀ-ն: Արտահերթ գագաթնաժողովի գլխավոր թեման է COVID-19 կորոնավիրուսի համավարակն ու դրա ազդեցությունը համաշխարհային տնտեսության վրա:

Վերջին տվյալների համաձայն՝ կորոնավիրուսով հիվանդների թիվը ողջ աշխարհում գերազանցել է 550 000-ը, մահացածներինը՝ 24 000-ը:

Հեռավորության վրա նման համաժողով «Մեծ քսանյակի» երկրները առաջին անգամ են անցկացրել: Առաջատար պետությունների ղեկավարները հավաստիացրել են, որ ամեն ինչ կանեն ճգնաժամը հաղթահարելու համար՝ խոստանալով հինգ տրիլիոն դոլար ներարկել միջազգային տնտեսությունում:

Ընդունված համատեղ հայտարարությունում նշված է, որ այդ միջոցներն ուղղվելու են համաճարակի հետևանքով առաջացած սոցիալական, տնտեսական, ֆինանսական խնդիրների վերացմանը:

ՌԴ ղեկավար Վլադիմիր Պուտինը ևս միացել էր տեսահամաժողովին իր մերձմոսկովյան նստավայրի աշխատասենյակից:

Ռուսաստանի նախագահ Վլադիմիր Պուտինն առաջարկել է սառեցնել տնտեսական պատժամիջոցները, ինչը երկրներին հնարավորություն կտա ավելի լավ պայքարել համաճարակի դեմ: Նա ասել է, որ մարդասիրական մղումներից ելնելով պետք է հանվեն որոշ երկրների վրա դրված սահմանափակումները, որպեսզի հնարավորություն տրվի դեղամիջոցների, պարենային ապրանքների, սարքավորումների և տեխնոլոգիաների մատակարարումների համար:

Ռուսաստանն ինքը գտնվում է Եվրամիության և Միացյալ Նահանգների պատժամիջոցների տակ, որ սահմանվել է Ուկրաինայում Ռուսաստանի գործողությունների պատճառով:

Ամերիկյան պատժամիջոցների տակ է նաև Իրանը: Թեհրանի հանդեպ ամերիկյան պատժամիջոցները ավելի խստացված տարբերակով վերականգնվեցին 2018-ին, երբ Վաշինգտոնը դուրս եկավ Իրանի և աշխարհի հզոր երկրների միջև ստորագրված միջուկային համաձայնագրից:

Պուտինը, չտալով որևէ երկրի կոնկրետ անուն, ասել է, թե անհրաժեշտ է մորաթորիում հայտարարել առաջին անհրաժեշտության ապրանքներ ձեռք բերելու և դրանց գնումներն ապահովող ֆինանսական փոխանցումների սահմանափակումների, արգելքների վրա: «Ի վերջո խոսքը մարդկանց կյանքի մասին է, մարդկանց ապրելու կամ մեռնելու հարցը զուտ մարդասիրական հարց է»,- G-20 տեսակոնֆերանսում ասել է Պուտինը:

Հիշեցնենք, որ ավելի վաղ ԱՄՆ-ն օգնություն էր առաջարկել Իրանին, բայց Թեհրանը այն չէր ընդունել: Սակայն ավելի ուշ հայտնի դարձվ, որ ԱՄՆ-ն նոր պատճամիջոցներ են սահմանվել իրանական և իրաքյան երկու տասնյակ ընկերությունների ու անհատների հանդեպ՝ «Իսլամական հեղափոխության պահապանների կորպուս»-ին, և նրա «Ալ Քուդս» միավորմանը և տարածաշրջանում ահաբեկչական խմբավորումներին աջակցելու համար:

Այսօր, երբ աշխարհն առավել, քան երբևէ ունի մարդասաիրության կարիք՝ աշխարհի գերտերությունների մակարդակով քննարկվում է մարդկանց կյանքեր փրկելու հարցը: Սակայն նույնիսկ այս պայմաններում քաղաքականությունը «հաղթում» է: Ինչ մարդասիրության մասին է խոսքը, երբ նույնիսկ պատժամիջոցների տակ գտնվող երկրի դեպքում համաճարակը երկրորդ պլան է մղվում...

Իսկ ընդհանրապես, կորոնավիրուսը ցույց տվեց, թե որքան է աշխարհը խոցելի, նույնիսկ գերտերությունները: Ամեն մեկը մտածում է իր երկրի մասն, չեն գործում ոչ կազմակերպություններ, ոչ կառույցներ, որոնք կոչված էին պայքարել համընդհանուր աղետների դեմ:

Մետաքսյա Շալունց