Գողերը նույնպես ինքնամեկուսացվել և սուսուփուս նստել են տանը
ՀՀ պարետ Տիգրան Ավինյանի որոշմամբ Հանրային իշխանության մարմինների գործունեության նկատմամբ ևս մարտի 25-ից սահմանափակումներ են սահմանվել։ Մասնավորապես՝
Հայաստանի Հանրապետության հանրային իշխանության բոլոր մարմինների գործունեությունը հնարավոր բոլոր դեպքերում իրականացնել հեռավար/առցանց եղանակով՝ միաժամանակ ապահովելով մարմնի գործառույթների անխափան իրականացումը.
հանրային իշխանության բոլոր մարմինների վարչական շենքերում արգելել աշխատակիցների մուտքը, եթե առանձին աշխատակիցների վերաբերյալ առկա չէ մարմնի ղեկավարի ցուցումը.
Ժամանակավորապես դադարեցնել պետական կառավարման եւ տեղական ինքնակառավարման մարմինների սպասարկման գրասենյակների գործունեությունը, իսկ դրա անհնարինության դեպքում սահմանափակել դրանց գործունեությունը՝ էապես նվազեցնելով աշխատանքային ժամերն ու անձնակազմի թիվը։ Առցանց ծառայությունների առկայության դեպքում ծառայությունները մատուցել բացառապես էլեկտրոնային եղանակով, իսկ դրա անհնարինության պարագայում անհետաձգելի անհրաժեշտության դեպքում:
Քաղաքացիների անհետաձգելի կարիքներին արձագանքելու նպատակով պետական կառավարման և տեղական ինքնակառավարման մարմինների կողմից իրենց պաշտոնական կայքէջերի, սոցիալական ցանցերի եւ զանգվածային լրատվության միջոցներով հրապարակել մարմինների գործող հեռախոսահամարների, կայքէջերի, էլեկտրոնային փոստի հասցեների եւ կապի այլ միջոցների վերաբերյալ տվյալներ։
Սույն որոշման կատարումը պետք է ապահովեն՝ ՀՀ նախագահի աշխատակազմ, ՀՀ Ազգային ժողովի աշխատակազմ, Բարձրագույն դատական խորհրուրդ, ՀՀ Սահմանադրական դատարանի աշխատակազմի, ՀՀ դատախազություն, ՀՀ կենտրոնական բանկ, ՀՀ հաշվեքննիչ պալատ, ՀՀ կենտրոնական ընտրական հանձնաժողով, ՀՀ հեռուստատեսության եւ ռադիոյի հանձնաժողով, ՀՀ մարդու իրավունքների պաշտպան, ՀՀ հանրային ծառայությունները կարգավորող հանձնաժողով, ՀՀ տնտեսական մրցակցության պաշտպանության պետական հանձնաժողով, ՀՀ քննչական կոմիտե, ՀՀ հատուկ քննչական ծառայություն, ՀՀ կառավարության անդամներ, ՀՀ կառավարությանը ենթակա մարմինների ղեկավարներ, ՀՀ վարչապետին ենթակա մարմինների ղեկավարներ, ՀՀ տեղական ինքնակառավարման մարմինների ղեկավարներ։
Որոշմամբ ամրագրված սահմանափակումների պահպանումը պետք է ապահովեն ՀՀ ազգային անվտանգության ծառայության տնօրեն Էդուարդ Մարտիրոսյանը եւ ՀՀ ոստիկանության պետ Արման Սարգսյանը։
Պետք է նկատել, որ պարետի հրապարակած որոշման տեքստի ձևակերպումները ոչ հստակ ու տարընթերցանությունների տեղիք տվող են: Օրինակ, ինչու են մի դեպքում որորշման կատարման պատասխանտվությունը դրել մարմնի, օրինակ` բարձրագույն դատական խորհրդի, մեկ այլ դեպքում պաշտոնյաի, օրինակ` ՀՀ կառավարության անդամների վրա: Ինչ է սա նշանակում` վաղվանից մարզպետարանները, նախարարությունները, դատարանները չե՞ն աշխատելու, թե ամեն դեպքում հեռավար կարգով և առցանց եղանակով որոշակի ծառայություններ մատուցվելու են: Օրինակ, երբ նշվում է, թե բոլոր տեսակի արտադրական կամ այլ կարգի ձեռնարկությունները, բացառությամբ սննդի արտադրության, սա նշանակո՞ւմ է, որ կասեցված ձեռնարկությունների պահակներին ևս վերաբերում է: Որովհետև եթե կա այս պահին չաշխատող հիմնարկ, դրա պահպանությունն առաջնային խնդիր է, հակառակ պարագայում մասնավոր և պետական ընկերություններտ նոր չնախատեսված վնասներ կկրեն, որովհետև որևէ մեկը չի կարող երաշխիքներ տալ, որ գողերը նույնպես ինքնամեկուսացվել և սուսուփուս նստել են տանը:
Կառավարությունը, դատական համակարգը ևս չեն կարող բոլոր աշխատողներին տանը նստեցնել, որովհետև դա կնշանակի հանրային կյանքի արգելակում: Պետությունը ստիպված է արտակարգ ռեժիմով աշխատել, բայց այդ պարտավորությունը պարետի որոշման մեջ չի երևում ու բազմաթիվ հարցեր է առաջացնում:
Հայկ Դավթյան
Հետևեք մեզ Viber-ում
