Նիկոլ Փաշինյանի բախտախնդիրներն ու կորոնավիրուսը. Stop Kadr

Արտակարգ դրության մասին կառավարության որոշմամբ արգելվում են զանգվածային միջոցառումները, մասնավորապես, 20 հոգուց ավել անձանց համախմբումն արդեն իսկ անթույլատրելի է: Այս պահանջը, սակայն, որեւէ կերպ իշխանությանը չի վերաբերում:

Երեկ հայտնի դարձավ, որ իշխող թիմը խմբակցության նիստ է հրավիրել, որին մասնակցել է նաեւ վարչապետ Փաշինյանը: Իշխող թիմն ունի 88 պատգամավոր, դիցուք, եթե անգամ կեսն էլ մասնակցեն, ապա ստացվում է արտակարգ դրության պահանջների խախտում: Կամ այսօր մեկնարկեց ԱԺ հերթական քառօրյան: Նիստի սկզբում ընդդիմադիր պատգամավոր Էդմոն Մարուքյանն առաջարկեց դադարեցնել ԱԺ աշխատանքները. « Ես կարծում եմ, որ քառօրյա նստաշրջանը գումարելով հիմա, 130 հոգով այստեղ հավաքվելով և մեր աշխատողներին այստեղ հրավիրելով վատ օրինակ ենք ծառայում, մանավանդ վարչապետի երեկվա հայտարարությունից հետո: Եվ ես առաջարկում եմ խմբակցություններով քննարկել, ԱԺ-ում մնանք միայն խորհրդի անդամներով, հիմա քվորում չապահովենք, չհաստատենք օրակարգը, և այդ ճանապարհով նիստ չիրականացնենք»: Ազգային ժողովի նախագահ Արարատ Միրզոյանը նշեց, որ խորհրդարանի աշխատանքը չի կարող խաթարվել արտակարգ դրության օրերին:

«Այս ընթացքում՝ մինչ արտակարգ դրությունը շարունակվում է, Ազգային ժողովը չի կարող կասեցնել իր աշխատանքները: Մենք չգիտենք, թե արտակարգ դրությունը երբ կավարտվի, 30 օրով է այն, բայց սա շարունակաբար կարող է երկարել: Նույնիսկ վերլուծություն կա մի քանի ամիսների, տարվա մասին, մենք այդ ռեժիմով չենք կարող մի տարի մնալ և պետք է երկրի համար կարևոր օրենքներ ընդունենք»,- նշեց Միրզոյանը:

Իմ Քայլի պատգամավորները, մեկը մյուսին հերթ չտալով, ելույթներ ունեցան, ցույց տալով, թե որքան մտահոգ են պետության ապագայով եւ Մարուքյանը մի բաժակ ջրում փոթորիկ է սարքում: Տպավորիչ էր Մխիթար Հայրապետյանի ելույթը.«Երեկ ԱԺ խորհրդի նիստ է եղել, եւ այս հարցը չէր կարող չքննարկվել: Չեմ զարմանում, որ պարոն Մարուքյանն իր խոսքում չնշեց, որ Արարատ Միրզոյանը երեկ նախ ասել է՝ մեր աշխատակազմը հերթափոխով է գալիս գործի: Բացի այդ, խոցելի, թիրախային խումբը եւս չի գալիս աշխատանքի»:

Մխիթար Հայրապետյանը այն համոզման է, որ ԱԺ-ն պետք է շարունակի աշխատանքները. « Հանրությանը կոչ եմ անում չհետեւել մեր օրինակին՝ սոցիալական տարածության պահպանման եւ փակ տարածությունում հավաքվելու հետ կապված: Արտակարգ դրություն հայտարարելու ժամանակ նշվել է, որ ԱԺ-ն պետք է աշխատի: Այդ աշխատանքը չի կարող դադարեցվել, եւ նաեւ դրանից է կախված երկրի ընթացքը»:

Ընդունելով հանդերձ, որ ԱԺ-ն համաձայն Սահմանադրության կարող է աշխատել արտակարգ դրության պայմաններում, բայց չենք կարող չբարձրաձայնել ԱԺ հաճախած պատգամավորների վերաբերմունքը: Առավոտից բոլոր ԶԼՄ-ներն են ֆիքսել, որ պատգամավորներն առանց դիմակի են ներկայացել նիստերին: Վերջապես, պարոնայք, չի կարելի ամեն ինչին այսքան անպատասխանատու դիրքերից նայել, խախտել արտակարգ դրության պահանջները, փոխարենը զսպաշապիկ հագցնել լրատվամիջոցներին: Տպավորություն է ստեղծվում, որ Հայաստանի գործող կառավարությունը ոչ այնքան կորոնավիրուսի համավարակից ու դրա տարածման վտանգից է անհանգստանում, որքան խոսքի ու մամուլի ազատությունից, իշխանությանը ոչ ենթակա լրատվամիջոցների գոյությունից:

Անի Սահակյան