Ամեն ինչի պատասխան տվողը ես չեմ. Շարմազանով
Միհրան Պողոսյանն ինչ է արել, ոնց է արել, ես ամեն ինչի պատասխան տվողը չեմ, ամեն ինչի պատասխանն էլ, մեծ ցանկության դեպքում, չեմ կարող ունենալ: Այս մասին, այսօր՝ մայիսի 10-ին, Ազգային ժողովում լրագրողների հետ զրույցում նման տեսակետ է հայտնել ԱԺ փոխնախագահ Էդուարդ Շարմազանովը՝ անդրադառնալով նախօրեին ICIJ-ի հրապարակած պանամական այն թղթերին, որոնց մեջ Հայաստանից 37 անձանց անուններ են ներգրավված օֆշորային սխեմաներում: Այդ անունների մեջ է նաև ԴԱՀԿ արդեն նախկին պետ Միհրան Պողոսյանը: Հարցին, թե արդյոք մեղավորություն ունեն այն մարդիկ, որոնք օֆշորում գրանցված բիզնեսներ ունեն, Շարմազանովը պատասխանեց. «Ես դատավոր չեմ, իրավաբան չեմ, իրավապահ համակարգի ներկայացուցիչ չեմ: Բոլոր նրանք, որոնք կպարզվի կասկածելի գործարքների մեջ են, բոլոր նրանք, որոնց վերաբերյալ դատարանը կպարզի, որ մեղսակցություն է կատարել, հանցագործություն է կատարել, պետք է պատժվեն՝ անկախ նրանից՝ դա ես եմ, թե դուք»: Նրա խոսքով, այս պահին բացի Միհրան Պողոսյանից այլ պաշտոնյայի անուն չի հանդիպել, այս պահին գոնե չեն տեսել: «Ժողովրդավարության վերաբերյալ խոսելիս անմեղության կանխավարկածը պետք է հաշվի առնել, քանի դեռ դատարանը չի ապացուցել այս կամ այն քաղաքացու մեղավորությունը, այդ մարդն անմեղ է»,-ասել է նա:
Հետևեք մեզ Viber-ում
