Սարսափած Ալիևը՝ ազգի դավաճանների ու սադրիչների փնտրտուքի մեջ

Ալիևի մոտ ակնհայտորեն իշխանության կորստի վախը սկսել է տարբեր դրսևորումներ ստանալ...

Իշխանության պահպանման ճանապարհին նա անցել է նախօրոք ինչ-որ սպառնալիքների ու վտանգների չեզոքացման ճանապարհին քայլեր ձեռնարկելուն: Նա, նախ՝ ելույթ է ունենում, ինչ-որ վտանգների մասին ահազանգում, ապա անցնում գործի:

Ադրբեջանի ընդդիմադիրները հակադարձել են Ադրբեջանի նախագահ Իլհամ Ալիևին, որը օրեր առաջ ասել էր, թե ընդդիմությունը փորձում է օգտագործել կորոնավիրուսի հետևանքով ստեղծված իրավիճակը երկիրն ապակայունացնելու համար, և նրանց որակել էր իբրև՝ «հինգերորդ շարասյան դավաճաններ»:

«Աշխարհով մեկ բոլոր առաջնորդներն իրենց հայտարարություններով հանրությանը համախմբելու պոզիտիվ կոչեր են անում, սակայն Իլհամ Ալիևը որոշել է սպառնալ և ներքին թշնամիներ, հինգերորդ շարասյուն փնտրել»,- ասել է ընդդիմադիր «Մուսավաթ» կուսակցության ղեկավար Արիֆ Հաջըլին՝ որպես թշնամիների տեղ մատնանշելով իշխանական վերին օղակները. - «Իրականում թշնամիներ պետք է փնտրել իշխանության վերին էշելոններում: Դա նրանք են, ովքեր Ադրբեջանում ներկայացնում են Ռուսաստանի շահերը: Նրանցից ոմանք չեն դադարեցնում իրենց ակտիվությունը նույնիսկ պաշտոնանկություններից հետո: Նման իրավիճակում ժողովրդավարական ընդդիմությանը մեղադրանքներ ներկայացնելը պարզապես անհիմն է»:

Հաջըլիի խոսքով՝ պետական ապարատի անգործությունն անհանգստություններ է առաջացնում, հանրությունը, օրինակ, չգիտի՝ կա՞ արդյոք երկրում առողջապահության նախարար: «Ո՞ւր է նա կորել: Խնդիրները պետք է փնտրել ոչ թե ընդդիմության մեջ, այլ իշխանության ներսում», - ըստ «Ազատության»՝ ասել է նա:

Ժողովրդական ճակատի փոխնախագահ Սեյմուր Խազին նույնպես քննադատել է Ալիևի հայտարարությունը: «Մենք ժողովրդին կոչ ենք անում խուճապի չմատնվել, խուսափել անկարգություններից, այստեղ ի՞նչ վատ բան կա: Պարզապես իշխանությունը ցանկանում է օգտագործել իրավիճակը ընդդիմադիրներին մեկուսացնելու համար», - ասել է Խազին:
Մարտի 19-ին Ալիևն ուղերձով դիմել է ադրբեջանցիներին՝ Նովրուզի տոնի կապակցությամբ: Նա ասել է, որ այս տարի զանգվածային միջոցառումներ չեն անցկացվի կորոնավիրուսի պատճառով, համոզմունք է հայտնել, որ ժողովուրդը լավ է հասկանում ստեղծված իրավիճակը:

Ադրբեջանի նախագահն անդրադարձել էր նաև երկրի ներքաղաքական կյանքին, խոսել բարեփոխումների ու հանրային երկխոսության մասին: «Քաղաքական երկխոսությունը փաստացի արդեն սկսվել է, համոզված եմ, որ արդյունքները դրական կլինեն ժողովրդի ու երկրի հետագա զարգացման համար: Ինչ վերաբերում է երկխոսությունից հրաժարված խմբավորումներին, ապա դա իրենց գործն է: Ամեն դեպքում, ես ասել եմ, ցանկանում եմ մեկ անգամ ևս կրկնել՝ պարտվող կողմը մենք չենք լինի, և նոր քաղաքական համայնապատկերում տեղ չի լինի դավաճանների ու հինգերորդ շարասյան ծախված ներկայացուցիչների համար», - Նովրուզի ուղերձում ասել է Ալիևը՝ չբացառելով, որ ինչ-որ պահի կարող է մտցվել արտակարգ դրություն, և հայտարարել է, թե այդ դեպքում «հինգերորդ շարասյան» ներկայացուցիչներին մեկուսացնելը պատմական անհրաժեշտություն կդառնա: «Մենք չենք կարող թույլ տալ, որ հակաադրբեջանական ուժերը, հինգերորդ շարասյունը, ազգի դավաճանները, օգտվելով իրավիճակից, ինչ-ինչ սադրանքների դիմեն», - սպառնացել է Ադրբեջանի ղեկավարը:

Այսօր հայտնի դարձավ, որ երեկ երեկոյան Բաքվում ձերբակալվել է հայտնի ադրբեջանցի ընդդիմադիր գործիչ, «Ժողովրդավարական ուժերի ազգային խորհրդի» և «Մուսավաթ» կուսակցության անդամ Թոֆիք Յագուբլուն:

Ադրբեջանի ներքին գործերի նախարարությունը պնդում է, որ Յագուբլուն քաղաքի արվարձաններից մեկում տեղի ունեցած ճանապարհատրանսպորտային պատահարից հետո ծեծի է ենթարկել Բաքվի բնակիչներ Էլհան և Ջավահիր Ջաբրաիլովաներին: Ադրբեջանական ոստիկանության տեղեկություններով` միջադեպի առթիվ քրեական գործ է հարուցվել խուլիգանության հոդվածով: «Յագուբլուն գործում ներգրավվել է որպես կասկածյալ և այժմ գտնվում է նախնական կալանքի տակ», - հաղորդում է «Թուրան» գործակալությունը:

Արևմտյան իրավապաշտպան կառույցները նախկինում Թոֆիք Յագուբլուին ընդգրկել էին ադրբեջանցի քաղբանտարկյալների ցուցակում: Մի շարք այլ հայտնի ընդդիմադիրների հետ նա ձերբակալվել էր 2013-ի հունվարին` Իսմաիլլի քաղաքում տեղի ունեցած անկարգություններից հետո: Շեքիի շրջանային դատարանը Յագուբլուին դատապարտել էր 5 տարվա ազատազրկման: Ընդդիմադիր գործիչը բանտում անց էր կացրել շուրջ 3 տարի` լքելով այն 2016 թվականի մարտին: Նախորդ տարվա աշնանը Բաքվում կազմակերպված բողոքի ակցիաներից հետո Յագուբլուն կրկին բերման էր ենթարկվել` մի քանի օր անց կացնելով ճաղերի ետևում:

Մետաքսյա Շալունց