Նիկոլ Փաշինյանը խուճապ առաջացնող տեղեկություն է հրապարակել

Նիկոլ Փաշինյանը ՖԲ-ի ուղիղ եթերում ներկայացրել է կորոնավիրուսի զարգացման և մեր երկրում ստեղծված իրավիճակի մասին տվյալներ:

Այս պահի դրությամբ ունենք կորոնավիրուսի 194 դեպք, որոնցից ավելի քան 70-75 տոկոսը ճյուղավորված են Էջմիածնի և արտադրամասի դեպքերից։ «Այս պահի դրությամբ կարող ենք ասել, որ Էջմիածնի ճյուղի զարգացումը կարողացել ենք կանգնեցնել, հիմա փորձում ենք կանգնեցնել արտադրամասի ճյուղի հետագա զարգացումը»,- ասել է Փաշինյանը:
Ըստ նրա` հաստատված դեպքերի 78 տոկոսը ընդհանրապես չեն ջերմում, 37-38 աստիճան ջերմություն ունի հիվանդների 12 տոկոսը, 38-39-ը՝ 3 տոկոսը, 39-ից բարձր ջերմություն՝ 1 տոկոսը։ 60-ից բարձր տարիքային խմբից կա 9 հիվանդ, 70-ից բարձր՝ 3, 80-ից բարձր՝ ոչ մի հիվանդ, սա նշանակում է` ամենառիսկային խմբից հիվանդ չունենք: Թոքաբորբով հիվանդ է 14 հոգի, որոնցից ինտենսիվ թերապիայի կարիք ունի 6-ը, բայց այս պահին նրանց վիճակը նույնպես համարվում է կառավարելի:
Փաշինյանը նաև անդրադարձել է աշխարհում ստեղծված իրավիճակին և կատարել ակնհայտ խուճապ առաջացնող հայտարարություն: 
Նրա խոսքով՝ աշխարհում չկա երկիր, որը կարողանա խուսափել կորոնավիրուսի վարակից։ «Տասնյակ երկրներ արձանագրել են մահվան դեպքեր։ Աշխարհը դեռ անորոշությունների մեջ է՝ ինչպես պայքարել կորոնավիրուսի դեմ։ Աշխարհում չկա մի երկիր, որ կարող է ասել՝ պատրաստ էր կորոնավիրուսի դեմ պայքարին կամ գիտի պայքարի ձևը կամ ինչքան է շարունակվելու այս համաճարակը, և չկա մի երկիր, որը հստակ կարող է աել, թե որքան կտևի համաճարակը:
Կան կանխատեսումներ, որ այն տևելու է մեկ-մեկուկես տարի։ Կարևոր է իմանալ՝ տաք եղանակը որքան է ազդում կորոնավիրուսի վերացման վրա, դա, իհարկե, հիպոթեզ է, ապացուցված չէ, բայց սպասում ենք նաև այդ անորոշության հստակեցմանը>>,- նշել է Փաշինյանը։
Այսպիսով` կարելի է արձանագրել, որ երկրի վարչապետը լավատեսություն և իրավիճակից դուրս գալու սպասումներ առաջացնելու փոխարեն  հասարակությանը տրամադրում է, որ այս արտակարգ իրավիճակը կարող է տևել անհամեմատ ավելի երկար` մեկ տարուց ավել: Փաշինյանը, իհարկե, չի ասել, թե Հայաստանում մեկուկես տարի արտակարգ իրավիճակ է լինելու, բայց եթե երկրի վարչապետն ասում է, թե մեկուկես տարի կարող է տևել պայքարը, շարքային քաղաքացին ենթագիտակցորեն պատկերացնում է, որ այդ պայքարը հենց արտակարգ դրության տեսքով է կատարվելու: Պարետը հայտարարել է, որ ԶԼՄ-ները և անգամ շարքային քաղաքացիները չեն կարող հրապարակել պաշտոնականից տարբերվող տեղեկատվություն: Իսկ երբ նման դեպքեր լինում են, ապա գրառումներն ու հրապարակումները հեռացվում են: ԶԼՄ խմբագիրներն ահազանգում են, որ անգամ միջազգային լրահոսից թարգմանված լուրերը, որակվում են խուճապ առաջացնող և պարետի հրահանգով հեռացվում ԶԼՄ-ներից: Այս դեպքում Փաշինյանի հայտարարությունն առ այն, թե կորոնավիրուսի դեմ պայքարը կարող է մեկուկես տարի տևել, պետք է ընդունել որպես պաշտոնակա՞ն, քանի որ դա երկրի վարչապետն է ասել: Ներողություն, բայց մինչ այս պահը համացանցի հայկական տիրույթում խուճապ առաջացնող ավելի լուրջ հայտարարության դեռ չենք հանդիպել: Եթե պարետի որոշմամբ` ելնելով արտակարգ դրության համար սահմանված կանոններից` Փաշինյանի այս հայտարարությունը չհեռացվի, պետք է արձանագրել, որ պարետատունը տուրք է տալիս խուճապային քաղաքականությանը:

Հայկ Դավթյան