Հայաստանի կողմից միջուկային զենքի ստեղծման հնարավորության մասին հրապարակումներ են լույս տեսնում

Վերջին օրերին միջազգային մի շարք լրատվամիջոցներում Հայաստանի կողմից միջուկային զենքի ստեղծման հնարավորության մասին հրապարակումներ են լույս տեսնում։ Դրանց հեղինակները երբեմն Հայաստանը քիչ է մնում ներկայացնեն իբրեւ միջուկային զենք ստեղծող ահաբեկչական պետություն։ Օրինակ, Washington Times օրաթերթը «Մեկ այլ միջուկային սպառնալիք. Հայաստանի միջուկային նյութերը կարող են օգտագործվել կեղտոտ ռումբ ստեղծելու համար» վերնագրի ներքո օրերս ներկայացրել է Իսրայելի Բեգին-Սադաթ կենտրոնի փորձագետ Ալեքսանդր Մուրինսոնի հոդվածը, որում առանց կոնկրետ փաստերի փորձեր են արվում այնպես ներկայացնել, թե իբր Հայաստանը միջուկային կեղտոտ ռումբ է ստեղծում։ Փաստերի փոխարեն հեղինակը մատնանշում է, թե վերջերս Վաշինգտոնում կայացած Միջուկային անվտանգության 5-րդ գագաթնաժողովում Ադրբեջանի ու Թուրքիայի առաջին դեմքերը մտահոգություն են հայտնել Հայկական ատոմակայանի ռեակտորի գործունեության վերաբերյալ։ Հեղինակը նաեւ անդրադարձել է վերջերս Վրաստանում Ս-238 ռադիոակտիվ նյութի վաճառելու փորձին, որին ներգրավված են եղել նաեւ հայեր, որոնք կարող է հատուկ ծառայությունների ներկա կամ նախկին աշխատակիցներ լինել։ Իսրայելցի փորձագետը նաեւ գրում է, թե ահաբեկչության դեմ պայքարով զբաղվող պաշտոնյաներից տեղեկություններ կան, որ գիշերվա մթան քողի տակ Հայաստանից դեպի Իրան եւ հակառակ ուղղությամբ արգելված սպառազինություն է տեղափոխվում։   Հոդվածն ամբողջությամբ կարող եք կարդալ «Հայկական ժամանակ» թերթի այսօրվա համարում