«Պատերազմի մեջ ենք, թշնամին աներևույթ է...». կորոնավիրուսն ու Եվրոպայի փակված սահմանները

Աշխարհի առաջատար երկրների թիվ մեկ խնդիրն այսուհետ կորոնավիրուսի դեմ պայքարի մեթոդներն են, նրանք քննարկում են հավելյալ ֆինանսական ու տեխնիկական միջոցներ հատկացնելու հարցերն՝ արձանագրելով, որ վիրուսը նոր մարտահրավեր է աշխարհի համար՝ ֆինանսատնտեսական առումով:

Անցած մեկ օրվա ընթացքում աշխարհում կորոնավիրուսից մահացել է ավելի քան 620 մարդ: Ամենածանր իրավիճակն այս պահին Իտալիայում է: Այստեղ երեկ երեկոյան եղած տվյալների համաձայն՝ մեկ օրվա ընթացքում 349 մահվան դեպք էր գրանցվել, ընդհանուր առմամբ համաճարակի սկզբից ի վեր երկրում մահացել է 2158 մարդ, մոտ 27 հազար մարդ այս պահին հիվանդ է:

Եվրամիությունը մեկ ամսով փակեց իր սահմանները օտարերկրացիների համար՝ բացառությամբ բրիտանացիների: Աշխարհի տարբեր երկրները մեկը մյուսի հետևից արտակարգ միջոցներ են կիրառում: Կանադան փակում է մուտքը բոլոր օտարերկրացիների համար՝ բացառությամբ ամերիկացիների, Ֆինլանդիան փակում է դպրոցներն ու համալսարանները: Գերմանիայում փակվել են որոշ խանութներ, բարեր, ակումբներ, թանգարաններ, թատրոններ ու եկեղեցիներ:

Ռուսաստանում Covid-19-ի դեպքերի թիվը հասել է 93-ի, այսինքն՝ մեկ օրում աճել է մեկուկես անգամ: Ռուսաստանը փակում է մուտքը օտարերկրացիների համար մինչև մայիսի 1-ը, ավելի վաղ հայտարարվել էր մի շարք երկրների, այդ թվում՝ Բելառուսի հետ սահմանները փակելու մասին: Մոսկվայում քաղաքապետ Սերգեյ Սոբյանինի հրամանով արգելվել են ավելի քան 50 մարդու մասնակցությամբ հավաքները, մեծ թատրոնները չեղարկել են ներկայացումները: Ռուսաստանի համալսարանները զանգվածաբար անցում են հեռավար ուսուցման, Մոսկվայում մարտի 21-ից դպրոցները կփակվեն:
Ֆրանսիան սահմանափակեց երկրի տարածքում քաղաքացիների տեղաշարժը և կասեցնում ընթացող բոլոր բարեփոխումները, ներառյալ՝ կենսաթոշակային: Երեկ երեկոյան նախագահ Էմանյուել Մակրոնը նոր հեռուստաուղերձով դիմեց քաղաքացիներին, որում հայտարարեց երկրում սահմանափակումների մասին: Նախագահը ֆրանսիացիներին կոչ արեց խուճապի չմատնվել, ցուցաբերել համերաշխություն և պատասխանատվություն:

Ֆրանսիայում կորոնավիրուսով վարակվածների թիվը մոտենում է 6 հազար 700-ին, համաճարակի սկսվելուց ի վեր մահացել է 148 մարդ: «Ֆրանսիան երբեք նման միջոցներ չի ձեռնարկել խաղաղ ժամանակ», - ըստ «Ազատություն» ռադիոկայանի՝ ասել է երկրի ղեկավարը: Եվրախորհրդի խորհրդարանական վեհաժողովը չեղարկել է գարնանային նստաշրջանը: «Մենք պատերազմի մեջ ենք, թշնամին աներևույթ է, բայց սպառնում է մեր առողջությանը», - նշել է Ֆրանսիայի նախագահ Էմանյուել Մակրոնը` անցած մեկ շաբաթվա ընթացքում արդեն երկրորդ անգամ դիմելով ֆրանսիացիներին: Ելիսեյան պալատում Անվտանգության խորհրդի անդամների հետ մի քանի ժամ շարունակված նիստից հետո Մակրոնը հայտարարեց` Փարիզն է՛լ ավելի է խստացնում սահմանափակումները` նոր կորոնավիրուսի տարածումը կանխելու համար:

Ֆրանսիան փակում է սահմանները առնվազն 15 օրով, ֆրանսիացիները կարող են տանից դուրս գալ միայն խիստ անհրաժեշտության դեպքում, զանգվածային միջոցառումներն արգելվում են, տեղական ընտրությունները` հետաձգվում: «Ես հասկանում եմ, որ այն, ինչ խնդրում եմ հիմա, աննախադեպ զոհողություն է, սակայն, ցավոք, առկա հանգամանքներն են դա պահանջում: Մենք պատերազմի մեջ ենք, ու թեև կռիվն այլ պետության դեմ չէ, սակայն թշնամին այստեղ է` անտեսանելի է, անշոշափելի, բայց` առաջ է տանում դիրքերը, ինչը պահանջում է համազգային մոբիլիզացիա», - նշել էր Ֆրանսիայի նախագահը:

Հաստատված սահմանափակումներին հետևելու համար առավոտից փողոցներում հսկողություն կիրականացնեն 100 հազար ոստիկաններ, կարգազանցները` կպատժվեն: Մակրոնը միաժամանակ հայտարարեց` սոցիալական ու տնտեսական լարվածությունը մեղմելու համար կառավարությունը կդադարեցնի բոլոր բարեփոխումները, այդ թվում՝ կենսաթոշակի ռեֆորմը, որի դեմ ամիսներ շարունակ հարյուր հազարավոր աշխատողներ բողոքի ցույցեր էին անցկացնում: Բացի այդ, իշխանությունները նաև որոշել են ֆրանսիացիներից գումար չգանձել ջրամատակարարման, էլեկտրաէներգիայի ու գազի համար, որպեսզի որևէ մեկը չմնա ձեռնունայն`առանց գումարի:

Երեկ ուշ երեկոյան հավելյալ սահմանափակումներ մտցրեց նաև Մեծ Բրիտանիայի կառավարությունը: «Ժամանակն է դադարեցնել շփումները, եթե դրանք ծայրահեղ անհրաժեշտ չեն», - ըստ «Ազատություն» ռադիոկայանի, նշել է երկրի վարչապետը: Բորիս Ջոնսոնն առանձին ուղերձով դիմեց հատկապես երկրի 70-ն անց տարիքի բնակչությանը` հորդորելով այս շաբաթավերջից առնվազն երեք ամսով մեկուսանալ: Ավելի վաղ Առողջապահության նախարարը BBC-ին ասել էր`այդ ընթացքում կառավարությունը մինչև տարեցների դուռը կհասցնի անհրաժեշտ սնունդն ու դեղորայքը. - «Շատերը կպնդեն, թե այս քայլերն ավելորդ են, դրանց կարիքն ամենևին չկա: Սակայն, պետք է ասեմ, կարծում եմ` սրանց մեծ մասն անհրաժեշտ են, որպեսզի մենք կարողանանք նվազեցնել վիրուսի տարածումը, կարողանանք փրկել մարդկանց կյանքը և հնարավորություն տանք մեր ազգային առողջապահական ծառայությանը դիմակայել այս մարտահրավերներին»:

Այսպիսով, Եվրոպան՝ կորոնավիրուսի նոր էպիկենտրոն է դարձել: Առողջապահության համաշխարհային կազմակերպությունը (ԱՀԿ) հայտարարել էր` անցած տարեվերջին Չինաստանում սկիզբ առած վարակը այժմ տեղափոխվել է Եվրոպա, վերջին շաբաթներին այստեղ ավելի շատ մահվան դեպքեր են գրանցվել, քան ողջ աշխարհում` Չինաստանը չհաշված:

Արձագանքելով աննախադեպ զարգացումներին` եվրոպական կառավարություններն է՛լ ավելի են խստացնում սահմանափակումները: Հետևելով Իտալիայի օրինակին` համազգային կարանտին են հայտարարել նաև Իսպանիան և Չեխիան. այդ երկրի բնակիչները կարող են տնից դուրս գալ միայն խիստ անհրաժեշտության դեպքում` աշխատանքի, մթերային խանութ գնալու, կամ` կարիքի մեջ գտնվող հարազատին տեսակցելու:

Ֆրանսիայի առողջապահության նախարարն արդեն զգուշացրել է` իրավիճակը խիստ մտահոգիչ է: «Վիրուսն անտեսանելի է, և տարածվում է արագ` վտանգելով մարդկանց կյանքը: Ես աղաչում եմ ֆրանսիացիներին հարգել մեր հորդորները, և հնարավորինս կրճատել շփումները այլոց հետ», -ըստ ռադիոկայանի՝ ասել էր Օլիվիեր Վերանը:
Մեծ Բրիտանիան, ըստ BBC-ի, պատրաստվում է հատուկ որոշում ընդունել, որը կարգելի 70-ն անց քաղաքացիներին տնից դուրս գալ առանց խիստ անհրաժեշտության: Ըստ նախագծի, կառավարությունը ամեն օր մինչև նրանց դուռը կհասցնի սննդով և անհրաժեշտ դեղերով լի փաթեթներ: «Որոշման մանրամասները կհրապարակենք առաջիկա շաբաթներին, երբ կզգանք, որ եկել է դրա ժամանակը», - ասել է Մեծ Բրիտանիայի առողջապահության նախարար Մեթ Հենքոքը՝ հավելելով. «Մենք պատերազմական ժամանակներին բնորոշ քայլեր ենք ձեռնարկում և ակնկալում ենք, որ քաղաքացիներից յուրաքանչյուրը զգոնություն կցուցաբերի` պահի լրջությունը հասկանալու համար»:

Բեռլինը հսկողություն է մտցրել սահմանակետերում: Նրանք, ովքեր փորձում են Գերմանիա մտնել առանց հիմնավոր պատճառի, ետ են ուղարկվում, հայտարարել է ոստիկանության խոսնակ Ռեյներ Սխարֆը: «Ստուգումները սկսել ենք այսօր առավոտյան 8-ից, որպեսզի հնարավորինս նվազեցնենք վիրուսի տարածումը: Ոստիկանները նաև փորձում են վարորդների ու ուղևորների առողջական վիճակը գնահատել, եթե մտահոգիչ նշաններ են տեսնում, տեղյակ են պահում այն երկրի իշխանություններին, որտեղից նրանք եկել են», - նշել է նա:

Աննախադեպ այս սահմանափակումներին նաև Վատիկանն է միացել, Հռոմի պապը, որ մինչ այս արդեն հորդորել էր հավատացյալներին պատարագներին հետևել օնլայն հեռարձակմամբ, չեղարկել է Զատիկի բոլոր տոնակատարությունները, որ պետք է սկսվեին ապրիլի 5-ից:

Մետաքսյա Շալունց