«Էրդողան-բուրգեր» մատուցող ռեստորանը

The Local-ի փոխանցմամբ՝ Գերմանիայի Քյոլն քաղաքի Urban Burgery ռեստորանը սպառնալիքների պատճառով հարկադրված է եղել դադարեցնել իր աշխատանքը: Սպառնալիքները հնչել են այն բանից հետո, երբ ռեստորանի ճաշացանկում հայտնվել է «Էրդողան-բուրգեր» անվանումը կրող ուտեստ՝ ի պատիվ Թուրքիայի նախագահի: Այն ռեստորանի ճաշացանկում հայտնվել է ապրիլի վերջին: «Էրդողան-բուրգերները» գովազդվել են որպես «ախորժաբեր և հյութեղ», դրանք տրվել են այծի կաթից պատրաստված պանրով: Ուտեստի հայտնվելը կապված է եղել գերմանացի երգիծաբան Յան Բեմերմանի սկանդալային բանաստեղծության հետ, որը նա ընթերցել էր գերմանական հեռուստատեսության եթերում: «Էրդողան-բուրգերը» հաճախորդերի շրջանում վայելել է մեծ ժողովրդականություն և գրավել տեղի ԶԼՄ-ների ուշադրությունը: Սակայն հետագայում սոցցանցերում սկսեցին քննադատել ու սպառնալ ռեստորանին, ինչի արդյունքում նրա տերերը հասկացան, որ չեն կարող երաշխավորել աշխատակիցների անվտանգությունը, և փակեցին ռեստորանը: