Չինաստանի սկանդալային մեղադրանքը՝ ԱՄՆ-ին. Մեծ քաղաքական վիրուսաքաոս

Չինաստանի պետական խորհուրդը ԱՄՆ-ում մարդու իրավունքների իրավիճակի վերաբերյալ զեկույց է պատրաստել, որտեղ նաև մեղադրանքներ կան Վաշինգտոնի հասցեին։ Պեկինը ամերիկյան վարչակազմին մեղադրում է աշխարհով մեկ քաոս տարածելու մեջ։

«Հեգեմոնի իր կարգավիճակը պահելու համար Միացյալ Նահանգները առաջնորդվում է միակողմանի գործողություններով, խախտում է միջազգային կարգը և միջազգային հարաբերությունների համակարգը, որոնք հիմնված են ՄԱԿ կանոնադրության նպատակների և սկզբունքների վրա»,- ասվում է զեկույցում։ Ամեն առիթի դեպքում, ըստ չինական կողմի, Միացյալ Նահանգները դուրս է գալիս միջազգային համաձայնագրերից, խաթարում է միջազգային վստահության համակարգերը և այլն։

Սա դեռ ամենը չէ: Երեկ Չինաստանը, կարելի է ասել, սենսացիոն հայտարարությամբ հանդես եկավ՝ մեղադրել է ԱՄՆ-ին՝ Ուհանում կորոնավիրուս տարածելու մեջ... Չինաստանի ԱԳՆ մամուլի խոսնակ Չժաո Լիցզյանը թվիթերյան իր էջում կարծիք է հայտնել, որ նոր տեսակի կորոնավիրուսը Չինաստանի Ուհան քաղաք կարող են բերած լինել ԱՄՆ-ի զինվորականները: «Ե՞րբ է ԱՄՆ-ում հայտնվել «զրոյական» հիվանդը, քանի՞ մարդ է վարակված: Հնարավոր է, որ հենց ԱՄՆ-ի զինվորականներն են բերել կորոնավիրուսի համաճարակը Ուհան: ԱՄՆ-ն պետք է մեզ ամեն ինչ բացատրի»- թվիթերյան իր էջում գրել է Լիցզյանն և գրառման հետ մեկտեղ տարածել է մարտի 11-ին ԱՄՆ ներկայացուցիչների պալատում Հիվանդությունների վերահսկման և կանխարգելման կենտրոնի տնօրեն Ռոբերտ Ռեդֆիլդի հարցուպատասխանը։

Ռեդֆիլդն իր խոսքում հաստատել էր, որ որոշ ամերիկացիներ, ովքեր ենթադրաբար գրիպից են մահացել, իրականում մահացել են կորոնավիրուսից: Ըստ Ռեդֆիլդի՝ ոչ ոք նրանցից կորոնավիրուսի թեստ չէր վերցրել: «Խնդրում ենք, ասեք մեզ, թե քա՞նիսն են կապված COVID-19-ի հետ»,- գրել է Չինաստանի ԱԳՆ մամլո խոսնակը:
Ըստ այս վարկածի՝ վիրուսը Չինաստան է տարվել 2019 թվականին՝ ամերիկյան մարզիկների կողմից, որոնք մասնակցել են Ուհանում կայացած Համաշխարհային զինվորական խաղերին:

Այսպես, Չինաստանի ԱԳՆ-ում չեն բացառում, որ կորոնավիրուսը Ուհան է բերվել ԱՄՆ-ից
2019 թ․ դեկտեմբերի 31-ին չինական իշխանությունները հայտարարեցին Ուհան քաղաքում թոքաբորբի բռնկման մասին։ Հիվանդության հարուցիչը նոր տիպի կորոնավիրուսն է, որին պաշտոնապես տրվել Covid-19 անվանումը։ Վերջին տվյալներով՝ վարակվել է ավելի քան 146 հազար մարդ, մահերի թիվը արդեն անցել է 5 հազարից։
Ահա, Չինաստանից հնչած մեղադրանքների ֆոնին՝ ԱՄՆ-ն Չինաստանի դեսպանին կանչել է՝ կորոնավիրուսի տարածմանն առնչություն ունենալու մասին խոսքերի պատճառով, հայտնում է Reuters-ը՝ վկայակոչելով ամերիկյան արտաքին քաղաքական գերատեսչության անանուն աշխատակցին։ Առաջիկա զրույցի մանրամասները չեն բացահայտել։ «Նա կանչվել է կապված COVID-19-ի մասին Չինաստանի ԱԳՆ ներկայացուցչի խոսքերի հետ»,- ասել է գործակալության զրուցակիցը:

Ավելի վաղ մարտի 13-ին Չինաստանի ԱԳՆ պաշտոնական ներկայացուցիչ Հեն Շուանը հերքել էր նախարարության մեկ այլ ներկայացուցչի խոսքերն այն մասին, որ Ուհան կորոնավիրուսը կարող էր բերվել ԱՄՆ-ի բանակի կողմից: Ընդ որում, նա նշել է, որ վերջին ժամանակներս ամերիկացի պաշտոնյաները հանդես են եկել համաճարակի վերաբերյալ մի շարք տեսություններով, որոնցից շատերը ստույգ չեն եղել և սևացրել են Չինաստանը:

Սա անշուշտ, լուրջ մեղադրանք է պաշտոնական Պեկինի կողմից: Վաշինգտոնի պատասխան-քայլն ինչպիսին կլինի՝ ցույց կտա ժամանակը: Կորոնավիրուսը կարծես դառնում է լրջագույն՝ աշխարհաքաղաքական գործընթացների սկիզբ:

Մետաքսյա Շալունց