Չեմպիոնական մրցավազքը չի ավարտվել
Իսպանական Պրիմերայի առաջատար «Բարսելոնայի» գլխավոր մարզիչ Լուիս Էնրիկեն նախավերջին տուրում Մադրիդի «Աթլետիկոյի» պարտությունը չի համարում չեմպիոնական մրցավազքի ավարտ: Մեկ միավորի առավելությունը «Ռեալի» նկատմամբ եւ վերջին տուրում թույլ ու չմոտիվացված մրցակիցը դեռ չի նշանակում, որ կատալոնական ակումբին սպասվում է հետ խաղ եւ 3 միավոր: «Մենք արժանի ենք նվաճել տիտղոսը, մրցաշրջանի մեծ մասն անցկացրել ենք առաջին տեղում, եւ ես հույն ունեմ, որ «Գրանադայի» դեմ վերջին տուրի խաղում կլուծենք մեր խնդիրը: Բայց պետք չէ կարծել, թե չեմպիոնական մրցավազքն ավարտվել է: Տեսաք, թե ինչ տեղի ունեցավ Մադրիդի «Աթլետիկոյի» հետ: Պրիմերայից դուրս մնացող թիմը հաղթեց Եվրոպայի լավագույն թիմերից մեկին: «Գրանադան» դուրս չի մնալու Պրիմերայից, բայց դա ոչինչ չի փոխում: Մենք պետք է հաղթենք: Իհարկե, արտագնա հանդիպումը մինուս է, սակայն կան բաներ, որոնք մեր վերահսկողությունից դուրս են: «Ռեալը» կլինի նույն վիճակում»,- Լուիս Էնրիկեի խոսքը մեջբերում է AS-ը: Վերջին տուրից առաջ կատալոնական ակումբը 88 միավորով առաջին տեղում է, «Ռեալը» մեկ միավոր քիչ ունի: Մայիսի 14-ին Երեւանի ժամանակով 19:00-ին «Բարսելոնան» կհյուրընկալվի «Գրանադային», «Ռեալը»՝ Լա Կորունիայի «Դեպորտիվոյին»:
Հետևեք մեզ Viber-ում
