Սիստեմայի տակից դուրս է եկել ու գնացել նշանադրության՝ ջերմությունը թաքցնելով բոլորից. Փաշինյանը՝ Էջմիածնում կորոնավիրուսի դեպքի մասին (video)

Ֆեյսբուքյան ուղիղ եթերում ՀՀ վարչապետ Նիկոլ Փաշինյանը խոսեց Էջմիածնում կորոնավիրուսի դեպքի մասին. «Ինչ ասում եմ, հանկարծ այլ կոնտեքստով պետք չէ նայել: Պետք չէ որևէ քաղաքացու մեղադրել, ինչ-որ վերապահում ներկայացնել: Ուղղակի իրավիճակը ներկայացնելու համար եմ ասում:

ՀՀ քաղաքացին վերադարձել է Իտալիայից: Ընդգծեմ, երբեք որևէ երկրից քաղաքացուն վերադառնալու հնարավորությունից զրկելու ինստիտուտ չկա:
Նա, վերադառնալով Իտալիայից, օդանավակայանում հաշվառում է անցել, ստուգել են ջերմությունը, ինչից հետո նա գնացել է Էջմիածին: Դրանից հետո ԱՆ ներկայացուցիչները մոնիթորինգ են իրականացրել, ինչի արդյունքում քաղաքացու մոտ ջերմության բարձրացում է հայտնաբերվել:
Նա ոչ միայն պետությունից է թաքցրել ջերմություն ունենալու հանգամանքը: Նրա համար շատ կարևոր է եղել հարազատի նշանադրության արարողությունը:

Նա այս ընթացքում սիստեմա է ընդունել, կոպիտ ասած՝ սիստեմայի տակից դուրս գալով՝ վճռական որոշում է կայացրել մասնակցելու հարազատի նշանադրության արարողությանը:
Այս ընթացքում շփվել է վարսավիրի հետ, ոսկերիչի հետ ու գնացել նշանադրության արարողության, որին բազմաթիվ մարդիկ են մասնակցել: Արդյունքում մենք ունենում ենք այսպիսի ճգնաժամային իրավիճակ, երբ նրա մորաքրոջ տղան և ամուսինն արդեն վարակված են: Իսկ նշանադրության մասնակիցները, վարսավիրը, ոսկերիչը՝ մեկուսացված»: