Ի՞նչ ադրբեջանական համայնքի մասին է խոսքը.Ռուբեն Սաֆրաստյան (video)

«Արևելագիտության ինստիտուտի» տնօրեն, ակադեմիկոս Ռուբեն Սաֆրաստյանի խոսքով՝ Ռուսաստանն ու Թուրքիան փորձում են Մերձավոր Արևելքում իրենց դիրքերն ուժեղացնել, ինչը պայմանավորված է նրանով, որ ԱՄՆ-ն մաս առ մաս հեռանում է այդ հատվածից, իսկ վակուումը այս երկու երկրներն են փորձում լրացնել։

Այս մասին՝ Անժելա Թովմասյանի՝ «Արմնյուզ ՀԸ» «Հայելու առաջ» հեղինակային հաղորդման ժամանակ ասել է ակադեմիկոսը՝ խոսելով Պուտին-Էրդողան վերջին հանդիպումից ու բանակցություններից։

Ռուբեն Սաֆրաստյանի դիտարկմամբ՝ Ռուսաստանն ու Թուրքիան ունեն ընդհանուր շահեր, սակայն շարունակում են մնալ երկու հակամարտող պետություններ․ «Ռուսաստանում ձեռք բերված պայմանավորվածությունները նշանակում են, որ որոշակի ժամանակով հակամարտությունը մեղմանում է՝ մինչև հաջորդ սրացումը»։

Անդրադառնալով Սիրիայի շուրջ Ռուսաստանի ու Թուրքիայի քաղաքականությունը՝ Ռուբեն Սաֆրաստյանը նշել է․ «Թուրքիան արտաքին քաղաքականությունը վարելիս սկսել է իր զինված ուժերը հեշտությամբ օգտագործել, որը, ըստ էության, հակասում է Աթաթուրքի ընկալումներին»։

Խոսելով մեր տարածաշրջանում Թուրքիայի նպատակներից՝ Ռուբեն Սաֆրաստյանը նշել է, որ, երբ խոսքը Արցախի ազատագրված հողերն Ադրբեջանին հանձնելու մասին է, միայն այդ հողերի վերադարձի հարցը չէ․ «Խոսքն այս դեպքում միայն Արցախի մասին չէ, խոսվում է նաև Սյունիքի մասին։ Սյունիքն աշխարհաքաղաքական առումով մեծագույն արժեք է համարվում պանթուրքիստների համար»։

Ռուբեն Սաֆրաստյանը հիշեցնում է, որ երբ սրվում են ռուս-թուրքական հարաբերությունները, Ադրբեջանը դիվերսիոն գործողություններ իրականացրեց Հայաստանի ուղղությամբ․ «Ես այստեղ կապ եմ տեսնում։ Շատ հնարավոր է, որ այդ գործողությունները թուրքական գլխավոր շտաբի նախաձեռնած գործողություններն են»։

Խոսելով արցախյան հիմնախնդրից ու Թուրքիայի ԱԳ նախարարի ու Մինսկի խմբի համանախագահների հանդիպումցի՝ ակադեմիկոսը նշել է․ «Արցախյան հարցի ակունքներից Թուրքիան մշտապես ցանկացել է միջնորդի դեր ստանձնել և պատահական չէր Թուրքիայի վերջին ակտիվացումը»։

Ըստ Սաֆրաստյանի՝ Թուրքիան ուզում է ցույց տալ, որ տարածաշրջանում իրենք այսպիսի դեր էլ ունեն․ «Ռուսաստանն էլ իր հերթին սահմանափակում է Թուրքիային և սահմանափակում են նաև Մինսկի խմբի համանախագահները»։

Հաղորդման վերջում խոսելով գիտական կենտրոնների փակման վտանգներից՝ Ռուբեն Սաֆրաստյանը վստահություն է հայտնել, որ նման բան չի լինի, քանի որ այս Կառավարությունը ձևավոված է ժողովրդից, իսկ ժողովուրդը նման բան թույլ չի տա։