Մուտիտապետը

Հանրաքվեի քարոզչությունը թեւակոխեց ակտիվ փուլ։ Տպավորություն է, թե մենք ապրում ենք 2020 թվականի, այլ 2018 թվականի Հայաստանում։ Իրականությունը քարացել է, իսկ մենք՝ ժամանակի եւ տարածության միջեւ խցանվել։ Նիկոլ Փաշինյանի տեքստերը ոչնչով չեն տարբերվում 2018 -ի հեղափոխության տեքստերից: Թվում է, թե Նիկոլ Փաշինյանը ռոբասերժական իշխանության դեմ պայքարելու է հավերժ, այնքան, քանի դեռ Հայաստանում պողոսապետությունն է: Փողոցից իշխանության եկած` իրավագիտակցության զրոյական, դեռ մի բան էլ ավելի ցածր մակարդակով մարդիկ թերեւս բթացել են ճակտից կախ ճոխ կյանքի վայելքներից ու բարիքներից, միլիոնանոց պարգևատրումներ են ստանում իրենց չարածի համար և ուղեղին զոռ չեն տալիս, օրենքների և Սահմանադրության հետ գլուխ դնել:

Օրինակ Սյունիքում Նիկոլ Փաշինյանը մարդկանց համոզել էր փորձում, թե ՍԴ-ն բռնեց, կամայական որոշմամբ ԱԺ-ին զրկեց իր լիազորություններից: Հիշեցնենք, որ անցած տարի խորհրդարանը ՍԴ-ի հետ կապված հանդես եկավ նախագահ Հրայր Թովմասյանի նկատմամբ կարգապահական վարույթ հարուցելու միջնորդությամբ:

«Ասվում էր, որ քանի որ ՍԴ-ում գործ է քննվում «Մարտի 1»-ի գործի հետ կապված եւ հաշվի առնելով փաստը, որ Հրայր Թովմասյանը նախկինում բազմիցս «Մարտի 1»-ի հետ կապված դիրքորոշումներ է արտահայտել, եւ հաշվի առնելով փաստը, որ Հրայր Թովմասյանը այն քաղաքական թիմի ներկայացուցիչ է, որը «Մարտի 1»-ով է եկել իշխանության, եւ հաշվի առնելով այն փաստը, որ անկախ դատական համակարգի էությունը ենթադրում է, որ շահագրգիռ անձը չպետք է մասնակցություն ունենա իր հետ առնչված թեմայի քննարկմանը, եւ քանի որ դա ընդունված է դատավորների շրջանում անել ինքնաբացարկի միջոցով, եւ քանի որ Հրայր Թովմասյանը ինքնաբացարկ չի հայտնել, ԱԺ-ն միջնորդել է, որ կարգապահական վարույթի շրջանակներում ՍԴ-ն քննի հարցը եւ Հրայր Թովմասյանին այդ հիմքով ենթարկի կարգապահական պատասխանատվության: ՍԴ-ն քննեց այդ հարցը եւ ասաց՝ չէ, Ազգային ժողով, չնայած օրենքով դու իրավունք ունես նման կարգապահական վարույթ հարուցելու, բայց ես քո կարգապահական վարույթը չեմ քննում, որովհետեւ իմ մեկնաբանությամբ դու կարող ես մեզ միջնորդությամբ դիմել միայն այն ժամանակ, երբ մենք ինքներս կարգապահական վարույթ կհարուցենք, կարձանագրենք խախտումը»,-իրականությունը ծայրից ծայր խեղթյուրեց Նիկոլ Փաշինյանը:

Իսկ իրականությունն այն էր, որ ԱԺ-ն ՍԴ էր ուղարկել խայտառակ անգրագետ դիմում, որտեղ պահպանված չէր մինչեւ անգամ դիմումը ներկայացնելու սահմանված ժամկետի չափորոշիչը, որի պատճառով էլ ՍԴ-ն նույնիսկ վարույթ չընդունեց այդ դիմումը: Իսկ Փաշինյանի հիշատակած գործի ճակատագիրն իրականում հայտնի է՝ Հրայր Թովմասյանը ոչ միայն այդ գործով որոշում չի կայացրել, այլեւ այն ուղարկել է Վենետիկի հանձնաժողով՝ ստանալու խորհրդատվական կարծիք առ այն՝ արդյոք Մարտի 1-ի գործով մեղադրյալ ՀՀ երկրորդ նախագահի կալանքը օրինաչափ է եւ նրա դեպքում չի գործում անձեռնմխելիության հատկանիշը:

Հաջորդ մանիպուլացիան, որ վարչապետն անում է ՍԴ-ի ու նրա նախագահի շուրջ հետեւյալն է. «Վերջերս հրապարակում եղավ, համաձայն այդ հրապարակումների եւ գործի նյութերի, Ռոբերտ Քոչարյանի պաշտպանը, որ Հրայր Թովմասյանի սանիկն է, այն ժամանակներում, երբ «Մարտի 1»-ի հետ կապված գործ էր քննվում ՍԴ-ում, բազմիցս ելումուտ է արել ՍԴ, եւ նրա ելումուտը չի արձանագրվել սահմանված կարգով»: Այդ փաստի առթիվ հետաքննություն սկսվեց, ոստիկանները բացատրություն են տվել, որ չի արձանագրվել, որովհետեւ ՍԴ նախագահի օգնականը կամ աշխատակազմի ղեկավարը եկել, ասել է, որ շեֆի սանիկն է, թող գա, մի գրանցեք:Հիմա ՍԴ-ն գոնե այս հիմքով պետք է կարգապահական վարույթ հարուցեր, հասկանար՝ էստեղ ինչ-որ խնդիր կա, թե ոչ: Բայց ՍԴ-ն ոչ մի ռեակցիա չի տվել»: Նախ որեւէ օրենքով սանիկ ունենալն արգելված չէ, որքան էլ բարոյական նորմերի վրա այս իշխանությունները թքած ունենան, պետք է ընդունեն, որ նույնիսկ իրենց թշնամի ՍԴ նախագահը կարող է սանիկ ունենալ եւ
արգելված չէ նաեւ նրա ելումուտը գլխավոր դատարան, եթե, իհարկե, եղել է նման բան:

Միայն Նիկոլ Փաշինյանը կարող է փորձել հավատացնել պողոսներին, որ հիպոթեթիկ Հրայր Թովմասյանը Արամ Օրբելյանին հյուրընկալում էր ՍԴ, որպեսզի վերջինս իրեն հրահանգավորեր՝ ինչ անել, ինչպես նշված գործով: Հարց է ծագում՝ միթե ուրիշ տեղ չկար, որ Հրայր Թովմասյանը պետք է բացահայտ սարքեր իր գլխին:
Կամ՝ երբ ասում է, թե Սերժ Սարգսյանն ու Հրայր Թովմասյանն այնպիսի դատարան են ձեւավորել, այնպիսի Սահմանադրություն գրել, որ այս մարդիկ հավերժ պաշտոնի լինեն, վայելեն իրենց կյանքը, միգուցե մոռացել է, որ ինքն էլ այդ նույն մարդկանց ցմահ թոշակ էր առաջարկում, այն էլ՝ անաշխատ եկամուտ, միայն այն բանի համար, որ ՍԴ նախագահն ու վեց դատավորները հեռանան ու Նիկոլ Փաշինյանը ձեւավորի իր երազանքների բարձր դատարանը:

Այնուամենայնիվ, ՍԴ-ի դեմ փաստարկներից ամենազավեշտալին այն է, թե ՍԴ 7 դատավորները, որոնց հարցով հանրաքվե են հրավիրել, ծառայել են նախկին ղեկավարներին, եղել են դատավորներ, որ Սերժ Սարգսյանին են ծառայել, Ռոբերտ Քոչարյանին եւ անգամ Լեւոն Տեր-Պետրոսյանին: Այս առիթով էլ Նիկոլ Փաշինյանը հիշելու շատ բան ունի, իրենից շատ որեւէ մեկը չի ծառայել Լեւոն Տեր-Պետրոսյանին կամ այլ տերերի, բայց եղավ այն, ինչ եղավ…

Անի Սահակյան