Գոհար Վեզիրյանն առաջինն էր. նա պատռեց Փաշինյանի դեմքը

«Վստրեչի Ապերի», նույն ինքը՝ Արամ Վարդանյանի տան վրա ոստիկանության բարբարոսաբար հարձակման պատմությունը պատռեց Նիկոլ Փաշինյանի դիմակը: Կատարվածից մի քանի արձանագրում պետք է անել, մի կողմ թողնելով Արամ Վարդանյանի ով լինելը կամ թե ինչ հանցանքի մեջ է կասկածվում, ոստիկանության վայրագությունները որեւէ արդարացում չունեն: Վարդանյանի 5 տարեկան թոռնիկի առողջությանը պատճառված վնասը բավարար հիմք է այդ միջնադարյան հարձակումը կատարած ոստիկանախմբին ու նրանց հրաման տվողին առնվազն իրավապահ համակարգից հեռացնելու, ապա նաև՝ պատասխանատվության ենթարկելու համար:
Բացի այդ այս պատմությունը ջրի երես հանեց մի շատ հետաքրքիր պատմություն:
Արամ Վարդանյանը խոստովանեց, որ ներկայիս վարչապետ Նիկոլ Փաշինյանին ոչ վաղ անցյալում ինքն օգնել է:
Ավելի կոնկրետ՝ պատմեց այն ժամանակների մասին, երբ Նիկոլ Փաշինյանը մարտի 1-ի գործով, որպես մեղադրյալ, ապա կալանավոր, գտնվում էր բանտում: Ըստ պատմածի «Վստրեչի ապերը», իր հնարավորությունների սահմաններում, ամեն անգամ հասել է օգնության, երբ Նիկոլ Փաշինյանը բանտում նեղության մեջ է եղել կամ աջակցության կարիք է ունեցել, և նման օգնության խնդրանքով Վարդանյանին դիմել են նախկին հակաիշխանական տարբեր լրատվամիջոցների ներկայացուցիչներ: Ու ոչ միայն Նիկոլ Փաշինյանին է օգնել, այլ նաեւ նախկին լրագրող, այժմ ԱԺ պատգամավոր Հայկ Գևորգյանին:
Եւ քանի որ բոլորը գիտեն եւ Նիկոլ Փաշինյանին եւ Արամ Վարդանյանին, ուստի կարելի է չկասկածել, որ տարիներ առաջ վերջինս օգնության ձեռք է մեկնել առանց որևէ ակնկալիքի, եթե չասենք ռիսկի է գնացել, քանզի կարող էր արժանանալ իշխանությունների հալածանքին ընդդիմադիրներին օժանդակելու համար:
Մինչդեռ այսօր, ահա, նույն Նիկոլ Փաշինյանի ուղիղ ենթակայության տակ գտնվող ու նրա հրամաններով շարժվող ոստիկանությունը, մի քանի հարյուր հոգով, գիշերվա կեսին գրոհել է նույն Արամ Վարդանյանի տունը, փորձել նրան ծեփել պատերին, ասպատակել, գույք
ոչնչացրել, սթրեսի ենթարկել մի ամբողջ ընտանիք:
Նիկոլ Փաշինյանը չի կարող արդարանալ, թե ինքը տեղյակ չի եղել այդ մասին, քանզի Հայաստանը փոքր երկիր է եւ բոլորը գիտեն, որ մեր օրերում իրավապահները առանց վարչապետի թույլտվության նույնիսկ իրենց կարիքները չեն հոգում:
Ավելին իշխանությունն իր ապերախտության մասին խոսեց նաեւ հրապարակային, Հայկ Գեւորգյանը հայտնեց, թե իրեն ոչ մեկն էլ չի օգնել, եւ Արամ Վարդանյանի ասածը հերյուրանք է: Քիչ էր մնում հավատալ իշխանության թափած կոկորդիլոսի արցունքներին, բայց իրականությանը լույս սփռեց լրագրող Գոհար Վեզիրյանը, ում անունն ի դեպ հիշատակել էր ինքը՝ Ապերը: <<Այո, շուրջ մեկ տասնամյակ առաջ, երբ Հայաստանը դեռեւս Սերժի տիրապետության տակ էր, Հայաստանում կային քաղբանտարկյալներ: Նիկոլ Փաշինյանը նրանցից մեկն էր: Փաշինյանի բանտարկության սկզբնական շրջանում քրեակատարողական հիմնարկի ներսում անընդհատ խնդիրներ էին առաջանում, որոնք անհանգստացնում էին նրա գաղափարակից ընկերներին ու ՀԱԿ վերնախավին: ՀԱԿ-ը նախանձելի պատվախնդրությամբ ու պատասխանատվությամբ էր ահազանգում իրավիճակին ու դրսից քայլեր ձեռնարկում իր տղերքի, պայքարի տղերքի անվտանգության համար:>> Ֆեյսբուքի իր էջում գրել է Վեզիրյանը շարունակելով.<<Օրեր շարունակ լրագրողներով հերթապահում էինք, որպեսզի հերթական ահազանգի հետքերով շտապենք քրեսկատարողական հիմնարկներ՝ բացառապես կեսգիշերին: Բայց այլ երկիր էր, խաղի այլ կանոններով: Նիկոլ Փաշինյանն առանձնակի դաժանությամբ էր թիրախավորված: Հենց այդ օրերին է Ապերը մեզ պետք եկել: Էդ հիմա է քրեական ենթամշակույթ կրող դարձել որոշների համար, իսկ էն ժամանակ նրա ծառայություններից օգտվել են: Լավ են արել: Լավ ենք արել ու ինքն էլ՝ ճիշտ է արել: Ի դեպ՝ Ապերն էն ժամանակ ուրիշ «պազիվնո» ուներ. ասում էին՝ մի հատ զանգի «մեր ընկերոջը»: Ասում էի՝ ժամին նայե՞լ եք: Թե բա պետք է, ամեն վայրկյանը կարևոր ա:
2. Կարևոր պահերին «պադվադիտ» չարած «մեր ընկերոջ» օգնությանն ենք դիմել, երբ Հայկ Գևորգյանին կալանավորել էին ու նրանից որևևէ մեկը ոչ մի լուր չուներ: Ուղիղ կապն ապահովվեց; Հեռախոսակամուրջին մասնակցեցին բոլորը և ուրախացան «լավ ընկերոջ» օպերատիվ գոյությամբ:
3. Բայց էս հեչ կարևոր չի: Ապերին էլ շատ լավ իմանալով՝ գիտեմ, որ ինքն ակնարկել ա էս մասին ուղղակի փոքրիկի հետ տեղի ունեցածով պայմանավորված՝ առանց որևէ ակնկալիքի կամ սպասման հեռահար նպատակի>>:

Առհասարակ, վերջին մոտ երկու տարվա ընթացքում մեկ անգամ չէ, որ նմանօրինակ դրվագներ են եղել, երախտամոռությունը Փաշինյանի բրենդն է, սակայն Գոհար Վեզիրյանն առաջինն էր, ով պատռեց Փաշինյանի դեմքը:

Անի Սահակյան