Երկրում փնտրվում է նախագահական պալատի ծառա. Քեմալ Քըլըչդարօղլու

Ընդդիմադիր «Ժողովրդահանրապետական» կուսակցության  առաջնորդ Քեմալ Քըլըչդարօղլուն կրկին հայտարարել է, որ վարչապետ Ահմեթ Դավութօղլուն երկրի վարչապետի պաշտոնից հեռանում է ոչ թե 23 միլիոնի, այլ 1 մարդու կամքով: «Ամեն ինչ իրականացվում է մեկ մարդու ցանկությամբ: Այդ պատճառով երկրի համար փնտրվում է ոչ թե վարչապետ, այլ նախագահական պալատի ծառա: Ժողովրդի դարդերով հետաքրքրվող չկա: Քիլիսի մեր քաղաքացիները հարցնում են՝ «Որտե՞ղ է պետությունը, որտե՞ղ է կառավարությունը»: Ամեն օր հրթիռներով հարվածում են մեր նահանգի բնակիչներին, սակայն նրանց դարդերով չեն հետաքրքրվում»,- Թուրքական T24 առցանց թերթի փոխանցմամբ՝ ասել է ընդդիմադիր քաղաքական գործիչը: Հիշեցնենք, որ Ահմեթ Դավութօղլուի գլխավորած «Արդարություն և զարգացում» կուսակցությունը (ԱԶԿ) 2015 թվականի նոյեմբերի 1-ին Թուրքիայում անցկացված կրկնական խորհրդարանական ընտրությունների արդյունքում հավաքել է ողջ քվեների 49.49 տոկոսը՝ 23.673.541 քվե: