Որդիներս առաջնագծում լուրջ ծրագրեր են իրականացնում, թե ինչ, չեմ կարող ասել. Գագիկ Խաչատրյան
ՀՀ ֆինանսների նախարար Գագիկ Խաչատրյանը կարծում է՝ գովելի չէ այս պահին քննարկել օլիգարխների տղաների առաջնագծում լինելու հարցը: ՀՀ ֆինանսների նախարար Գագիկ Խաչատրյանի որդիները հիմա առաջնագծում են և լուրջ ծրագրեր են իրականացնում, որոնց մասին նախարարը նպատակահարմար չի համարում բարձրաձայնել: «Լուրջ ծրագրեր են իրականացնում, թե ինչ, չեմ կարող ասել, ցավոք սրտի»,-այս մասին այսօր լրագրողների հետ զրույցում հայտնեց ՀՀ Ֆինանսների նախարար Գագիկ Խաչատրյանը` ի պատասխան դիտարկման, որ առաջնագծում ՀՀ սոցիալապես անապահով խավի զավակներն են: «Ես կարծում եմ, որ բոլորը պետք է ծառայեն բանակում ըստ օրենքի, ուղղակի պատերազմական շրջանում ավելի ցայտուն է երեւում սոցիալական բեւեռվածության խնդիրը: Միշտ էլ լինում են իրականության մեջ նման համադրություններ եւ այս պահին նման թեմաներ քննարկելը գովելի չէ: Ցանկացած մարդ, եթե կարող է, պետք է իր օժանդակությունը ցուցաբերի բանակին, նաեւ կառավարությունը»,- ասաց Գագիկ Խաչատրյանը: Լրագրողի հարցին՝ ի՞նչ սոցիալական արդարության մասին է խոսքը, եթե իր եւ իր կնոջ ունեցվածքը միլիարդներով են չափում, նախարարը պատասխանեց. «Եթե տենց համեմատության մեջ դնենք, ձեր մեջ էլ կարող է լինել տարբերություն, ես միշտ ասել եմ, որ պետք է վախենալ ոչ թե հայտարարագրված, այլ չհայտարարագրված գումարներից»: Հարցին՝ ինչպե՞ս եղավ, որ այդքան գումար կարողացավ կուտակել նախարար լինելով, Գագիկ Խաչատրյանը պատասխանեց, որ դա երկար տարիների աշխատանքի արդյունք է: Նա նաեւ վստահեցրեց, որ, ինքն էլ, մյուս պաշտոնյաներն էլ, օգնություն ցուցաբերել են Ղարաբաղին: «Ես ինքս էլ օժանդակել եմ, բայց դա հրապարակման ենթակա չէ: Այն ծրագրերը, որոնք մենք ենք իրականացնում, հրապարակման ենթակա չեն»,- ասաց նա: Լրագրողները Ֆինանսների նախարարին նաև հիշեցրեցին մոտ երկու ամիս առաջ մամուլում հայտնված սկանդալային տեսանյութի մասին, որտեղ խոսվում էր, որ նրա եղբորորդին զբաղված է կոռուպցիայով: «Ով որ համացանցում տեղադրել ա, սցենարիստին հարցրեք, ինքն էլ կասի: Ես կարծում եմ, որ իմ եղբորորդին բացարձակապես անմեղ է»,-ասաց Գագիկ Խաչատրյանը:
Հետևեք մեզ Viber-ում
