Կորոնավիրուսը՝ Նիկոլ Փաշինյանի փրկօղա՞կ

Շուտով մեկ ամիս կլինի, ինչ մեկնարկել է ապրիլի 5-ին սպասվող սահմանադրական հանրաքվեի քարոզարշավը, բայց իշխանությունում կասկածելի լռություն է։
Պաշտոնապես հայտարարվեց, որ մարտի 2-ից իշխանությունը ակտիվ քարոզչություն կիրականացնի, կանցնի գյուղերով, հանդիպումներ կունենա բնակչության հետ։ Քանզի բարդ, գրեթե անհավանական է թվում պահանջվող 650 հազար քվեն հավաքելը։

Այդուհանդերձ ոչ հանդիպումներ են ընթանում, ոչ էլ նույնիսկ քարոզչական կոչեր ու հայտարարություններ։ Եթե ընդունենք այն վարկածը, որ քարոզչության խանգարող հանգամանքը Հայաստան ներխուժած կորոնովիրուսն է, ապա կարող են համացանցային տիրույթում դա իրականացնել։ Մանավանդ դա մեր իշխանությունների ամենասիրած զբաղմունքն է եւ խրոնիկ ֆեյսբուքաբնակների պակաս չի զգացվում նրանց շարքերում։ Եւ ուրեմն, ինչու են հապաղում մեր իշխանավորները, ինչու են այսպես խորհրդավոր լռում։ Նույնիսկ չեն բացառում, որ հանրաքվեն կարող է հետաձգվել։ Ի մասնավորի` «Իմ քայլի» պատգամավոր Հրաչյա Հակոբյանը այսօր լրագրողների հետ զրույցում չբացառեց՝ եթե ապրիլի սկզբին կորոնավիրուսի տարածումը չնահանջի, կդիտարկվի սահմանադրական փոփոխությունների հանրաքվեն հետաձգելու հարցը:
«Եթե զգանք, որ ապրիլի սկզբին իրավիճակը վերահսկելի է, կարելի է հանրաքվեն չհետաձգել, բայց, եթե ավելի սրվի, կարծում եմ, կարելի է դիտարկել հետաձգման պրոցեսը», - ասաց Հակոբյանը։

Իրականում տպավորություն է, որ իշխանությունը սպասում էր հարմար պատրվակի՝ չեղարկելու հանրաքվեի հակաօրինական, ապօրինի գործընթացը։ Իսկ հանրաքվեի որոշումն ընդունելուց առաջ հույս ուներ, որ ՍԴ 7 դատավորները կօգտվեն վաղ կենսաթոշակի հնարավորությունից եւ հանրաքվեն ինքնստինքյան կկորցներ իր իմաստը։
Իրականում իշխանական կողմում գերիշխում են հանրաքվեն չեղարկելու տրամադրությունները։ Տեղեկություններ կան, որ կառավարությունը հանձնարարել է իրավաբանների խմբին ուսումնասիրել եւ զեկուցել հանրաքվեն չեղարկելու իրավական ընթացակարգերի մասին։
ԱԺ հայտարարությունների ժամին սպասվում էր, որ իշխանականները մինի հանրահավաք կիրականացնեն, սակայն ապարդյուն, բացի Արփի Դավոյանից, ոչ մեկի մտքով չանցավ հիշել հանրաքվեի մասին:

Իշխանությունում հասկանում են, որ տիտանական աշխատանքների շնորհիվ անգամ կասկածելի է՝ կհավաքեն 650 հազար քվե, թե ոչ։ Հետեւաբար հիմնազուրկ չեն այն խոսակցությունները, որ իշխանությունը կորոնավիրուսը վկայակոչելով կարող է չեղարկել հանրաքվեն։ Իշխանությունը հասկանում է, որ մարդկանց չի հուզում ոչ Սահմանադրական դատարանի, ոչ նրա 7 անդամների հեռացնելու հարցը, մարդիկ ուզում են լավ ապրել, իսկ իրենց լավ ապրելուն այդ յոթ հոգին չէ, որ խանգարում են։

Անի Սահակյան