Վրաց-ադրբեջանական սահմանն էլ փակվեց. Կորոնավիրուսն արդեն Վրաստանում է, իսկ Ադրբեջանում դեռ լռում են

Կորոնավիրուսը շարունակում է տարածվել ողջ աշխարհով: Վարակման դեպքեր են գրանցվել բոլոր մայրցամաքներում՝ բացառությամբ Անտարկտիդայի:

Իտալիայում գրանցվել է մահվան 11 դեպք, վարակման նոր դեպքեր են գրանցվել Ավստրիայում, Խորվաթիայում, Գերմանիայում, Հունաստանում, Ֆինլանդիայում, Նորվեգիայում և արդեն նաև՝ Հայաստանի հարևան Վրաստանում:

Ռուսաստանը սահմանափակում է թռիչքները դեպի Հարավային Կորեա, պատրաստվում է վիզաներ չտրամադրել իրանցիներին և իր քաղաքացիներին խնդրում է չմեկնել Իտալիա: Ըստ Առողջապահության համաշխարհային կազմակերպության՝ Չինաստանի սահմաններից դուրս այժմ ավելի շատ նոր դեպքեր են գրանցվում, քան Չինաստանում:

Անցած մեկ օրում Չինաստանից դուրս գրանցվել է վարակի 459 նոր դեպք և հասել 2 հազար 918-ի՝ 37 երկրներում, զոհերի թիվը հասել է 43-ի՝ մեկ օրում ավելանալով 9-ով։
Չինաստանում վերջին մեկ օրում կորոնավիրուսով վարակվածների թիվն աճել է 433-ով, որից 409-ը՝ համաճարակի օջախ Հուբեյ նահանգում, մահացածների թիվն ավելացել է 29-ով, այդ թվում 26-ը՝ Հուբեյում, բուժվածներինը՝ 2 հազար 750-ով։ Երկրում արդեն հաստատված է վարակի 78 հազար 497 դեպք, զոհերի ընդհանուր թիվը հասել է 2 հազար 744-ի, ապաքինվել և հիվանդանոցներից դուրս է գրվել 32 հազար 495 մարդ։
Երեկ երեկոյան Վրաստանում հաստատվեց կորոնավիրուսի առաջին դեպքը։ Երկրի առողջապահության նախարար Եկատերինա Տիկերաձեն ասուլիսում հայտարարեց, որ վիրուսը հայտնաբերվել է Իրանից Ադրբեջանի տարածքով ժամանած 50-ամյա տղամարդու մոտ, որը տեղափոխվել է ինֆեկցիոն հիվանդանոց։ Հիվանդի առողջական վիճակը գնահատվում է բավարար։ Նախարարի խոսքով՝ կառավարությունն ամեն ինչ անում է երկրում կորոնավիրուսի համաճարակ թույլ չտալու համար։ Արդեն հայտնի է, որ Վրաստանը փակում է Ադրբեջանի հետ սահմանը՝ 2 շաբաթով:

Երեկ Ռուսաստանի երեք քաղաքացիների կորոնավիրուսով վարակվելը հաստատվեց: Նրանք Ճապոնիայի նավահանգստում կայանած, մեկուսացված զբոսանավի ուղևորներից են, որոնք տարհանվել են Կազան: «Diamond Princess» զբոսանավում Ռուսաստանի 24 քաղաքացի կար: Նրանցից ութը տարհանվել է Կազան, յոթը՝ Վլադիվոստոկ: Մյուսները զբոսանավից դուրս էին եկել ավել վաղ, կամ հրաժարվել են տարհանվել Ռուսաստան:
Երեկ Թեհրան-Երևան հատուկ չվերթով Հայաստան ժամանեցին Իրանի հետ օդային սահմանը մասամբ փակելուց հետո այնտեղ մնացած հայաստանցիները։ 52 ուղևորները ժամանման սրահ մտան՝ բոլորը բժշկական դիմակներով ու «Զվարթնոց»-ի բժշկասանիտարական հսկիչ կետի համաճարակաբանի՝ ուղևորներին ու նրանց դիմավորողներին ուղղված հրահանգների ներքո։

Թեհրանից ժամանածները բոլորը կգտնվեն տնային հսկողության տակ, նրանց տվյալները գրանցվել են անհատական քարտերում։

Երևան-Թեհրան կանոնավոր թռիչքները չեղարկվել են երեկվանից, երբ ուժի մեջ է մտել օդային հաղորդակցության սահմանափակման վերաբերյալ կառավարության որոշումը։ Երեկ առավոտյան հատուկ չվերթով Հայաստանից մեկնել են իրանցիներ ու վերադարձել Հայաստանի քաղաքացիներ։ Օդանավում նաև հիվանդությունների վերահսկման ու կանխարգելման կենտրոնի մասնագետն է եղել՝ առողջապահության նախարարի հանձնարարությամբ։ Ըստ «Ազատության»՝ Թեհրանից ժամանածները զարմացած, բայց դժգոհ չէին այս ուշադրությունից. «Խուճապն այստեղ ավելի շատ է»։

Հայտնի է, որ հաջորդ հատուկ չվերթը ուրբաթ օրն է նախատեսված։ Ինչպես հայտնի է, փակ է նաև Իրանի հետ ցամաքային սահմանը` Մեղրիի անցակետը։
Սահմանը հատում են բեռնափոխադրող մեքենաներ, որոնց վարորդները, և ուղևորները զննվել են՝ կորոնավիրուսի վարակի կասկածով քաղաքացիներ չեն եղել։ Հիշեցնենք, որ կառավարության որոշմամբ՝ Իրանի հետ օդային ու ցամաքային սահմանի մասամբ փակումը երկշաբաթյա ժամկետով է։

Ի դեպ, հարևան Իրանում կորոնավիրուսի դեպքերի հետ կապված Հայաստանի Զինված ուժերի բոլոր զորամասերում արգելվել են զինծառայողների ծնողների հարազատների այցերը, պարտադիր ժամկետային զինծառայողներն էլ որոշ ժամանակով կզրկվեն արձակուրդներից։ Պաշտպանական գերատեսչությունից տեղեկացրեցին՝ կանխարգելիչ միջոցառումներով նպատակ ունեն կանխել կորոնավիրուսի ներթափանցումը զորամասեր։

Իսկ ահա Ադրբեջանում, թեև ակնհայտորեն խուճապային իրավիճակ է, բայց վարակակիրների վերաբերյալ պաշտոնապես հաստատված տեղեկություններ չկան: Երեկ ադրբեջանական լրատվական ծառայությունները հաղորդում էին, որ կորոնավիրուսի տարածման վտանգի պատճառով Ադրբեջան են ժամանելու Առողջապահության համաշխարհային կազմակերպության փորձագետներ: Տեղեկատվության համաձայն՝ վիրուսի տարածումը կանխելու նպատակով Ադրբեջանում ստեղծվել է գործողությունների հատուկ պլան, ներկայում ձեռնարկվում են անհրաժեշտ բոլոր միջոցառումները, այդ թվում՝ հսկիչ-անցակետերում:

Ուշագրավ է, որ երեկ Վրաստանում կորոնավիրուսով վարակված մարդը, որը Ադրբեջանից էր եկել Վրաստան, լրատվամիջոցներին հայտնել էր, որ իր հետ ճամփորդող մարդիկ Ադրբեջանում գտնվում են կարանտինի մեջ: Փաստորեն, Ադրբեջանում առայժմ այդ մարդկանց վերաբերյալ Ադրբեջանի պատկան մարմինները տեղեկատվություն չեն տրամադրում:

Մետաքսյա Շալունց