Անհեթեթ, անհասկանալի
Երբ ԱԺ էթիկայի հանձնաժողովի նախագահը Խոսրով Հարությունյանն է, մի մարդ, որի «զենքն» անսկզբունքայնությունն է, որը բոլոր իշխանությունների «գաղափարակիրն» է եղել, քանի որ դա է պահանջել սեփական անձի ու ընտանիքի բարեկեցությունը, իսկ հիմա էլ ՀՀԿ-ի կարկառուն հարճերից մեկն է, այդ հանձնաժողովից ավելի անհեթեթ որոշում դժվար էր սպասել, քան եղավ Մհեր Սեդրակյանի դեպքում։ Բնական է, որ մարդը էթիկայի մասին պատկերացումները վերարտադրում է ոչ թե ավանդական ընկալումների շրջանակներում, այլ ըստ իր հայեցողության: «Մեդիա եւ իրավունք», «Լրագրողների միավոորւմ» եւ «Ազատ լրագրողների ասոցիացիա» հասարակական կազմակերպությունների դեռեւս մարտին դիմում էին ներկայացրել ԱԺ էթիկայի հանձնաժողով ընդդեմ ՀՀԿ խմբակցության պատգամավոր Մհեր Սեդրակյանի , որը մեղադրվում էր լրագրողներին հայհոյելու մեջ։ Էթիկայի հանձնաժողովը որոշել է, որ ՀՀԿ խմբակցության պատգամավոր Մհեր Սեդրակյանը թույլ է տվել պատգամավորի էթիկայի կանոնակարգի խախտում։ «Մենք եկել ենք այն եզրակացության, որ ակնհայտ բարձրաձայն անձը վիրավորող հայտարարություն պատգամավորը չի արել, այդ հայհոյանքի փաստը չենք համարում հաստատված, գոնե մեր պատգամավորների ու այս շփումների ընթացքում ձեռք բերված հիմքերի հիման վրա։ Թեպետ արձանագրում ենք, որ լրատվամիջոցը տվյալ դեպքում ներկայացնող անձը՝ Փայլակ ֆահրադյանը, իր դիմելաձեւով չի պահպանել միջանձնային հարաբերությունների կոռեկետությունը, բայց նույնիսկ այս պայմաններում գտնում ենք, որ պատգամավորը պարտավոր է հարգալից վերաբերմունք ունենալ բոլոր այն անձանց նկատմամբ, որոնց հետ ինքը շփվում է իր լիազորությունների կատարման ընթացքում»,-նիստից հետո ասել է հանձնաժողովի նախագահ Խոսրով Հարությունյանը։ Այսպիսով, հանձնաժողովը պատգամավորի դեմ դիմումը բավարարել է մասնակի։«Մենք որոշում ենք կայացրել այն մասին, որ Մհեր Սեդրակյանը էթիկայի կանոնակարգով նախատեսված կանոնների 6.1 կետի Ը ենթակետով պայմանավորված պահանջը, որ պետք է հարգալից շփվի իր պարտականությունները կատարելիս, խախտել է»,-նշել է հանձնաժողովի նախագահը:ՀՀԿ-ական Մհեր Սեդրակյանը լրագրողներին «նախիր» էր անվանել, որից հետո հայհոյել էր իրենից պարզաբանում խնդրող լրագրողին: Էթիկայի հանձնաժողովի որոշման համաձայն՝ Սեդրակյանը լրագրողների հետ զրույցում հայհոյանք չի արել, պարզապես անհարգալից է խոսել: Միայն թե անհասկանալի է ՝ եթե ոչինչ չի լսվում, այդ ինչպես է հանձնաժողովը որոշել, որ Սեդրակյանը անհարգալից վարք է դրսևորել իր զրուցակից լրագրողի հանդեպ: Ինչպես տեսնում եք՝ լրիվ «խոսրովհարությունյանական» որոշում, որից չի հասկացվում բացառապես ոչինչ, եթե չասենք, որ սա կատարյալ աբսուրդ է։ Բնական է, որ Հարությունյանը չէր կարող կտրականապես հերքել ակնհայտ իրողությունները, բայց չէր էլ կարող ՀՀԿ-ի ու ՀՀԿ-ականի դեմ դուրս գալ, չէ՞ որ ներկայումս այս քաղաքական ուժի ղեկավարման տարիներին է , որ Հարությունյանն ապահովել է իր գերդաստանի բարեկեցությունը։ Հո, սեփական ձեռքերով քար չի գցելու՞ այն աղբյուրի վրա, որից սնվում է, փոխարենը կխորացնի իր անսկզբունքայնությունը, կձգի մի քանի շաբաթ եւ ռոտացիայի սկզբունքով գլուխը կազատի այդ «շառոտ» պոստից։Սա այն դեպքում, երբ այդ հանձնաժողովի որոշումները որեւէ իրավական հետեւանքներ չեն ունենում եւ խնդիրը միայն բարոյական հարթությունում է։ Հիմա, դժվար է ասել՝ ում արարքն է ավելի շատ անհասկանալի՝ Սեդրակյանի, թե Հարությունյանի, չնայած մեծ հաշվով տարբերություն գրեթե չկա։ Անի Սահակյան
Հետևեք մեզ Viber-ում
