Ռոբերտ Քոչարյանն անուն է տվել
Երկրորդ նախագահ Ռոբերտ Քոչարյանն այսօր դատարանում ուշագրավ հայտարարություն է արել` Մարտի 1-ի դատավարության հետ կապված: Քոչարյանն ասել է, որ 2008 թվականին Ոստիկանությունը չէր ենթարկվում նախագահին, մինչդեռ այժմ ենթարկվում է վարչապետին:
«Առաջինը՝ դատախազը փորձեց պարզաբանել, թե ինչ է սահմանադրական կարգի տապալումը՝ արձագանքելով փաստաբանների որոշ հիմնավորումների: Նա որպես օրինակ բերեց հավաքների, հանրահավաքների սահմանափակումը՝ նկատի ունենալով իմ կարգադրությունը, որով արտակարգ դրություն և սահմանափակումներ են մտցվել: Ես կցանկանայի հիշեցնել, որ հրամանագիրը միայն Երևան քաղաքի վրա էր տարածվում և բոլոր սահամանափակումները միայն Երևան քաղաքի վրա էին տարածվում, սա էր հրամանագրի բովանդակությունը,- ասաց նա և հավելեց,- կարելի՞ է արդյոք երկրում, որտեղ հազարավոր համայնքներ կան, մեկ համայնքում սահմանափակումները սահմանադրական նորմերի խախտում համարել: Կարծում եմ՝ պատասխանը պարզ է»:
Ռոբերտ Քոչարյանն անդրադարձել է նաև «Մարտի 1»–ի գործով տուժողի իրավահաջորդներից մեկի պաշտպան Սեդա Սաֆարյանի հայտարարությանը, թե Ոստիկանությունն ուղղակի ենթարկվում էր նախագահին՝ Ռոբերտ Քոչարյանին:
«Ես կարծում եմ, որ իրավաբանը պետք է լավ իմանա այդ ժամանակ գործող Սահմանադրությունը: Այդ հիմա է, որ Ոստիկանությունը ենթարկվում է անմիջապես վարչապետին: Նախագահը նման լիազորություններ այն ժամանակ չուներ: Ծանոթացեք Սահմանադրությանը, որ պատկերացնենք, թե ինչ կարգի կարգավորումներ են աշխատել այն ժամանակ: Նախագահի լիազորությունը եղել է արտակարգ դրություն մտցնելը»,- ասաց նա:
Ռոբերտ Քոչարյանն ընդգծել է, որ չէր անդրադառնա այս հարցերին, բայց ստիպված է նման պարզաբանումներ մտցնել, քանի որ հանրությունը հետևում է դատական նիստին:
Մարտի 1-ի գործով բավականին հետաքրքիր իրավիճակ է ստեղծվում, որովհետև, Ռոբերտ Քոչարյանը, ով մեղադրվում է սահմանադրական կարգի ենթադրյալ տապալման մեջ փաստորեն, անուն է տվել: Նա ասել է, որ ոստիկանությունը ոչ թե իրեն, այլ կառավարության ենթակայությամբ է գործել: Այսինքն` Քոչարյանն անուղակիորեն տվել երկար չարչարկված հարցի պատասխանը` ով է տվել կրակելու հրամանը: Քոչարյանն անուն չի տվել, բայց շատ հասցեական պարզաբանել է, որ նման գարծառույթ նախագահը չի ունեցել, ունեցել է կառավարությունը: Կառավարության ղեկավարն, ինչպես հայտնի է, վարչապետն է. իսկ թե ով է եղել 2008թ.-ի ղեկավարը, կամ վարչապետը, բոլորին է հայտնի:
Հայկ Դավթյան
Հետևեք մեզ Viber-ում
