Պատասխան-սադրանք
Երեկ ադրբեջանական ԶՈւ-երի ստորաբաժանումները կրակ են բացել ՀՀ ԶՈւ-երի ստորաբաժանումների մարտական դիրքերի ուղղությամբ, հայտնել է ՀՀ պաշտպանության նախարարի մամուլի քարտուղար Արծրուն Հովհաննիսյանը ֆեյսբուքյան իր էջում. «Կրակից վիրավորվել է հայ զինծառայող, վիրավորումը թեթև է, նրա կյանքին վտանգ չի սպառնում: Հայկական ԶՈւ-երի ստորաբաժանումների պատասխան կրակից հետո ադրբեջանական կրակը դադարել է»:
«Ադրբեջանի կողմից հայտարարված «Դիվերսիան» ուղղակի լավ հեքիաթ է, ադրբեջանական հանրության համար։ Դա լիովին ապատեղեկատվություն է։ ՀՀ ԶՈւ-երը ընդամենը պատասխանել են ադրբեջանական սադրանքներին, որի արդյունքները ինքներդ եք տեսնում։ Դեռ ավելին. Հայկական կողմը այս ամենով դեռ զսպվածություն է դրսևորում», ավելի ուշ գրեց Արծրուն Հովհաննիսյանը։
Պարզվում է Ադրբեջանը հայտնել է զինված ուժերի զինծառայողի զոհվելու մասին։
Երկրի պետական սահմանապահ ծառայության հաղորդագրության համաձայն՝ Ղազախի շրջանի Ղուշչու Այրիմ գյուղի ուղղությամբ սահմանային մարտական դիրքում, որը տեղակայված է Հայաստանի Նոյեմբերյանի տարածաշրջանի Կոթի գյուղից ոչ հեռու, հայկական Զինված ուժերի կողմից հրադադարի խախտման հետևանքով սպանվել է սահմանապահ Իբրահիմ Վելիևը։ Ադրբեջանական պաշտոնական աղբյուրները պնդում են, թե «դիվերսիայի փորձի» կանխման ընթացքում կորուստներ է կրել նաև հայկական կողմը։
ԱԳ նախարար Հայաստանի արտգործնախարար Զոհրաբ Մնացականյանին՝ Սլովակիայի արտաքին և եվրոպական գործերի նախարար Միրոսլավ Լայչակի համատեղ ասուլիսում լրագրողները հիշեցրել են, որ փետրվարի 24-ին սահմանին հայ զինվոր է վիրավորվել, և դա տեղի ունեցավ Անվտանգության խորհրդի նիստից հետո, ուստի դա Ադրբեջանի պատասխանը չէ՞ր: Հայաստանի արտգործնախարարն արձագանքել է. «Անկեղծ ասած՝ ես դրա մասին իմացա, երբ հանդիպում էինք, և իմ գործընկերներն ինձ տեղեկացրին: Ես առիթ չեմ ունեցել խոսելու իմ մյուս գործընկերների հետ: Բայց կարող եմ ասել, որ չափազանց մտահոգիչ է, քանի որ էսկալյացիոն ռիսկերի նվազեցման տարրը մեզ համար կարևորագույններից մեկն է բանակցային ողջ փաթեթի մեջ: Էսկալյացիոն ռիսկերի աճը հնարավորություն չի տալու իրական առաջընթաց ունենալ բանակցային գործընթացում: Մենք ունենք կարևոր ձեռքբերում 2019-ի ընթացքում՝ էսկալյացիայի ավելի նվազ պատկեր, ունենք լավ օրինակ, երբ օգտագործվում է դրա համար ուղիղ գիծը: Ինձ համար նվազ պատկեր դժվար է ասել, թերևս եղել են զոհեր, և մեկ զոհն արդեն ավելի քան շատ է, բայց շատ էական է էսկալյացիայի ռիսկերի նվազեցումը պահպանել: Այստեղ, բնականաբար, անհրաժեշտ է հստակ հասկանալ, թե ինչ զարգացումներ են եղել: Եղել է վիրավոր հայկական կողմից, որը մտահոգիչ է և անընդունելի: Մենք մեր կողմից հստակ շարունակելու ենք առաջ տանել այդ օրակարգը: Կոնկրետ հարցեր կան իրականացնելու, միջոցառումներ, որոնք բերելու են ռիսկերի նվազեցման, որոնք բխում են թե՛ նախկինում ձևավորված մոտեցումներից, թե՛ ներկայումս ձևակերպված մոտեցումներից»:
Ադրբեջանի իշխանությունները Ստեփանակերտում նախօրեին Հայաստանի և Արցախի Անվտանգության խորհրդի համատեղ նիստերից հետո, սպասելի էր, որ կգնան սադրանքների, ապա մեղքը կբարդեն հայկական կողմի վրա:
Առհասարակ, Մյունխենում Փաշինյան-Ալիև հրապարակային բանավեճից դեռ փոքր-ինչ առաջ էլ Ադրբեջանը սկսել էր հայկական կողմին մեղադրել բանակցային գործընթացը փակուղի մտցնելու մեջ:
Փաշինյանի մի քանի հայտարարությունները, թե՝ Լեռնային Ղարաբաղում ոչ թե տարածքների, այլ անվտանգության ապահովման հարցն է կարևոր, ապա՝ Ստեփանակերտում Հայաստանի և Արցախի իշխանությունների և պաշտպանական գերատեսչությունների համատեղ քննարկումները լրացուցիչ ազդակ են, որ հայկական կողմը գոնե այս փուլում լուրջ զիջումների չի գնալու, ավելին՝ Բաքվից է սպասում պատասխաններ, թե ինչ կարող են նրանք զիջել:
Այս իրավիճակում չի կարելի բացառել սահմաններում իրավիճակի կտրուկ լարումը: Հետևաբար, պետք է հնարավորինս պատրաստ լինել ալիևյան նոր սադրանքներին:
Մետաքսյա Շալունց
Հետևեք մեզ Viber-ում
