Փաշինյանի հաջորդ թիրախը. Մոնումենտի դղյակները կփռվեն ասֆալտին

Կառավարության նիստում վարչապետ Նիկոլ Փաշինյանը հայտարարել է, որ Երևանում առանձնատներ, դղյակներ կան, որոնք սկզբից մինչև վերջ կառուցվել են ապօրինի:

«Օրինակ՝ մի շարք նախկին բարձրաստիճան պաշտոնյաներին պատկանող, հայտնի մարդկանց առանձնատներն ամբողջությամբ ապօրինի շինարարություններ են: Այդ նույն բարձրաստիճան պաշտոնյաներն ի՞նչ են արել՝ ջանք են գործադրել, որպեսզի ընդունեն օրենսդրություն ապօրինի շինարարությունների օրինակացման համար, որ ապօրինի կառուցեն վերջացնեն, և այսօր, օրինակ, Երևանի քաղաքապետարանն այլ տարբերակ չունենա, քան այդ շինություններն օրինականացնել: Պետք է նայել այդ հարցը՝ մենք ինչ խնդիր ունենք լուծելու»,- ասել է վարչապետը:

Նիկոլ Փաշինյանը հավելել է, որ պաշտոնյաներն ամենահայտնի տեղերում, օրինակ՝ Մոնումենտում կառուցել են տներ՝ աներևակայելի չափերի. «Հիմա եկել, ասում են՝ մեր շենքն ապօրինի է, օրենքով պարտավոր ենք օրինականցնել, ու Երևանի քաղաքապետն ասում է՝ բոլոր իրավաբաններն ասում են, որ այո, պարտավոր ենք օրինականացնել»: Վարչապետ Փաշինյանը շարունակել է իր խոսքը. «Մեր երկրում այնպիսի փաստեր են ի հայտ գալիս, որ նույնիսկ «неудобно отвечать»: Նա հորդորել է Արդարադատության նախարար Ռուստամ Բադասյանին այդ խնդիրը քննարկել քաղաքապետ Հայկ Մարությանի հետ:
Սա շատ հետաքրքիր մեսիջ է, կոնկրետ հասցեով: Եթե դղյակներն ապօրինի են եղել, կառուցվել են առանց շինթույլտվության, կնշանակի այստեղ մի ողջ շղթա է աշխատել: Նախ ապօրինի շինարարություն իրականացնել, այն էլ Երևանում ու հատկապես Մոնումենտում, այնքան էլ հեշտ չէ: Դա նշանակում է, որ առնվազն պետք է պատասխանտվության կանչվեն Երևանի նախկին քաղաքապետերն ու ոստիկանապետերը, հողի վերահսկողության ոլորտի բոլոր պատասխանատուները, ովքեր աչք են փակել և կոծկել ապօրինի շինարարությունը: Ի վերջո հնարավոր չէ Մանումենտի բարձունքին թաքուն դղյակ կառուցել և այնպես անել, որ ոչ ոք դա չտեսնի:Բացի այդ, եթե շինությունն անօրինական է, կնշանակի դրա համար չի վճարվել նաև գույքահարկ, այսինքն` վնաս է պատճառվել համայնքային բյուջեին: Ուստի, եթե կա նման թեկուզ մեկ դեպք, Նիկոլ Փաշինյանը պարտավոր է անուններ հնչեցնել և անհապաղ դիմել իրավապահներին:
Ինչ վերաբերում է պնդմանը, թե իրավապահներն ասում են, որ պարտավոր են օրինականացնել անօրինական շինությունը. այս մեկն արդեն սովորական պոպուլիզմ է, որովհետև Հայաստանում գործող բոլոր օրենքներով կառույցի տերը նա է, ում հողի վրա այն կառուցված է: Այսինքն` եթե որևէ շինություն կառուցված է համայնքի սեփականությունը համարվող հողի վրա, ապա դրա տերը պետությունն է: Եթե, այպես կոչված, ապօրինի շինությունը կառուցված է մասնավոր սեփականություն համարվող տարածքի վրա, այստեղ խնդիրը այլ է` պետությունն ու համայնքը պարտավոր են հաշվի նստել սեփականատիրոջ իրավունքների հետ: Բայց այս դեպքում պետք է ազնվորեն հայտարարել, որ խոսքը սեփականատիրոջ տարածքում կառուցված շինության մասին է:
Ինչ վերաբերում է ապօրինի շինարարությանը ընդհանրապես, ապա այս երևույթը Երևանում առկա է եղել վաղուց` դեռևս խորհրդային տարիներին Երևանում ամբողջական թաղամասեր են կառուցվել, օրինակ` Սարի թաղը, և դրանք շինթույլտվություն չեն ունեցել: Պետությունը տարբեր ժամանակներում օրինականացրել է անօրինական շինություններն ու ճանաչել սեփականատերերի իրավունքները: Բայց միշտ և բոլոր ժամանակներում պետությունն իրավասու է եղել գլխավոր հատակագծին հակասող շինությունները ոչ միայն չօրինականացնել, այլ նաև քանդել: Ի դեպ, վերջին անգամ քաղաքապետարանն օրինականացրել է մինչև 2001 թվականը կառուցված շինությունները:
Այս իրավասությունը կա նաև այսօր, այնպես որ պետք չէ լրացուցիչ կրքեր բորբոքել, թիրախավորել Մոնումենտի բարձունքում հանգրվանած հայտնի դղյակների տերերին: Այնտեղ որևէ անպօրինի շինություն չկա` այլ հարց, որ այդ տարածքը դղյակների համար նախատեսված չէր, և այդ քայլին գնալը ապօրինություն էր գլոբալ առումով:

Հայկ Դավթյան