Ռուսաստանը պետք է տեղյակ լիներ Ադրբեջանի կողմից նախապատրաստվող քայլերին.Հայկ Նահապետյան

«Մեր զինվորների հերոսության և հայրենիքը չհանձնելու վճռականության շնորհիվ թշնամին ընկրկեց:Ռուսաստանը պետք է տեղյակ լիներ Ադրբեջանի կողմից նախապատրաստվող քայլերին»,-Հայելի ակումբում հրավիրված ասուլիսում նման կարծիք է հայտնում պաշտոնաթող գնդապետ, ռազմաքաղաքական վերլուծաբան Հայկ Նահապետյանը և հիշեցնում  նաև մեր մյուս հակառակորդի մասին. «Թուրքիան ունի 3-րդ դաշտային բանակ, որի մարտական խնդիրը Հայաստանը և Վրաստանը գրավելն է »։ Առաջիկա օրերին, մասնավորապես՝ մայիսի 8-10-ը արդյո՞ք կլինի պատերազմի վերսկսում, պարոն Նահապետյանն ասաց. «Այն հայտարարությունները, որ նախորդեցին Ադրբեջանի՝ ապրիլի սկզբի գործողություններին, նմանատիպ երևույթներ հիմա էլ կան։ Մի քանի օր է՝ հրապարակումներ կան, որտեղ հակառակորդի ուժի, անպարտելիության մասին է խոսվում։ Դրանք տեղեկատվական պատերազմի էլեմենտ են։ Բայց մեր բանակի հնարավորությունները մեծ են։ Մի քանի հրթիռ բավական է, որ Ադրբեջանի կեսը հայտնվի ջրի տակ»։ Նրա խոսքով՝ եթե բացի Ադրբեջանից, գործին խառնվեն նաև Թուրքիան, Վրաստանը և այլ երկրներ, դա արդեն 3-րդ համաշխարհային պատերազմի սկիզբը կլինի, նախկին գնդապետը խոսեց Ադրբեջանի սիրտը համարվող Եվլախ քաղաքի մասին. «Միայն Եվլախի ուղղությամբ մեր գործողությունները եթե լինեն, դա մեծ վնաս կհասցնի նրանց և Ադրբեջանը կփորձի անել այն, ինչ արեց 1994-ի մայիսի 12-ին. հրադադար կխնդրի»։ Նա կարծում է, որ լայնամասշտաբ պատերազմի Ադրբեջանը կգնա միայն այն դեպքում, երբ կորցնի իրականության զգացումը։