Բանակի խնդիրները հասցրել եք վարտիքների մակարդակի ու անգամ այդ խնդիրը չեք կարողանում լուծել.Սամվել Ֆարմանյան (video)
Երկրին սպառնացող արտաքին սպառնալիքին դիմագրավելու հարցում Հայաստանի ներսում չի կարող լինել քաղաքական տարակարծություն։ Այս մասին Անժելա Թովմասյանի՝ «Արմնյուզ» ՀԸ հեռարձակվող հեղինակային «Հայելու առաջ» հաղորդաշարի ժամանակ ասել է ԱԺ նախկին պատգամավոր, «Քառյակ մեդիայի» համահիմնադիր Սամվել Ֆարմանյանը՝ անդրադառնալով ՀՀ վարչապետ Նիկոլ Փաշինյանի և Ադրբեջանի նախագահ Իլհամ Ալիևի մյունխենյան դեբատին։
Խոսելով Արցախի հարցի բուն կարգավորման մասին՝ Ֆարմանյանը նշեց, որ իր համար անհայտ է՝ Նիկոլ Փաշինյանն ինչ դիրքորոշում ունի հարցի կարգավորման վերաբերյալ. «Մարդիկ, ովքեր տիրապետում են Արցախի կարգավորման հարցին, գիտեն, որ Նիկոլ Փաշինյանի պատկերացումները ԼՂ հարցի վերաբերյալ սև արկղ են իրենցից ներկայացնում»։
Ըստ Ֆարմանյանի՝ Արցախի հարցում Փաշինյանն անկանխատեսելի է ոչ միայն Հայաստանի ու Արցախի, Ադրբեջանի, այլ նաև միջազգային հանրության և ինքն իր համար.«Այս իշխանությունը չունի տրամաբանված ու կուռ պատկերացում Արցախի հարցի կարգավորման վերաբերյալ։ Մյունխենյան քննարկումները տպավորություն էին ստեղծում, որ մենք գործ ունենք ինչ-որ ֆուտբոլային խաղի հետ։ Ըստ էության՝ հայկական կողմը տրվել է սադրանքին ու համաձայնվել ԼՂ կարգավորման հարցը քննարկել Մինսկի խմբի ձևաչափից դուրս»։
Անդրադառնալով Արցախի հարցի կարգավորման փուլային տարբերակի քննարկմանը՝ Սամվել Ֆարմանյանն ասել է. «Ես չեմ կարծում, որ Նիկոլ Փաշինյանի իշխանությունը ՀՀ որևէ իշխանության հոգեզավակն է։ Փաշինյանի իշխանությունը տարածաշրջանում առաջին ոչ համակարգային իշխանությունն է։ «Արցախյան դոսիեն» Փաշինյանի անկանխատեսելիության ապացույցն է։ Ժամանակները տարբեր են, որպեսզի ԼՂ հարցի կարգավորման փուլային տարբերակը համեմատենք Լևոն Տեր-Պետրոսյանի առաջ քաշած տարբերակի հետ»։
Սամվել Ֆարմանյանը ևս մեկ անգամ ընդգծեց, որ ՀՀ ոչ մի իշխանություն չի կարող գնալ ԼՂ հարցի այնպիսի կարգավորման, որին համաձայն չէ հայ ժողովուրդը։
Խոսելով բանակում զինծառայողների մահվան դեպքերի ու հայաստանցի-ղարաբաղցի տարանջատման մասին՝ Սամվել Ֆարմանյանը նշեց. «Բանակը ամենաբարդ կառույցներից մեկն է, և մեր բարձրագույն սպայակազմին պետք է տալ հնարավորություն, որպեսզի իրենք ազատ լինեն՝ իրենց որոշումները կայացնելիս։ Պետք է ընդգծեմ, որ մամուլում կամ էլ սոցցանցերում ավելորդ սրտացավությունը միշտ չէ, որ օգնում է բանակին»։
Սամվել Ֆարմանյանի գնահատմամբ՝ բոլորը, այդ թվում Նիկոլ Փաշինյանը, ովքեր մտածում են, որ իրենց արածները մոռացվելու են, պետք է հիշեն, որ գալու է մի պահ, երբ դեմ-դիմաց նստելու են, իրար աչքերի նայեն ու ի վերջո՝ մարդ լինելու մոդան վերադառնալու է. «Հայ ժողովուրդը արժանի է ունենալ այնպիսի առաջնորդ, որը կհամախմբի մեր ժողովրդին, ով վերջ կդնի մարդկանց բաժանելու գործելաոճին»։
Ֆարմանյանը համոզված է, որ տիրող ատելության մթնոլորտն ու դրա քարոզը ժամանակավոր քաղցկեղ է, որը կանցնի։
Հետևեք մեզ Viber-ում
