Կյանք ու կռիվ

Իշխանությունն իր քայլերով փորձում է ցույց տալ, որ անհանգստացած է բանակում խաղաղ պայմաններում զոհերի թվի աճով: Տարին նոր է մեկնարկել, բայց բանակում ոչ հակառակորդի գնդակից արդեն 13 զոհ ունենք: Երեկ Նիկոլ Փաշինյանը հավաքեց ուժային կառույցների բարձրաստիճան պաշտոնյաներին, ապա հայտարարեց, որ իրավիճակը վերահսկելու նպատակով որոշակի քայլեր կանեն, այդ թվում՝ կադրային փոփոխություններ, քանզի մտահոգված են, որ բանակում մարդկային կյանքեր են խլվում, սպանություններ, ինքնասպանություններ, որոնք որպես կանոն տեղի են ունենում ոմանց դրդմամբ:
Նայում ես ՍԴ անդամ Ֆելիքս Թոխյանի այսօրվա հարցազրույցը ու հասկանում, որ ինչ աստիճանի պիտի հասցրած լինեն այս պատկառելի տարիքի մարդուն, թվացյալ անկոտրում դատավորին, որ ստիպված լինի այսպիսի հայտարարություններ անել:
Թոխյանն ասում է, որ իր համար ծանր է ՍԴ դատավորների հասցեին լսել այն, ինչ այսօր լսում է՝ հայհոյանքներ.«Մենք էլ ընտանիք ունենք, շատ ծանր է այս վիճակը։ Հեռուստացույցը միացնում ենք մեզ հայհոյում են, անջատում ենք՝ հայհոյում են, այսպես չի լինի։ Պետք է հարգել պետական ինստիտուտը»,- ասում է 70-ին մոտ մարդը, ում թվում է, թե տարիներն ու մասնագիտությունն այնքան կոփած պետք է լիներ, որ անտեսեր նման ազդակներ: Բայց քանի որ կարմիր գիծը բավական սահուն եւ դաժանաբար հատվել է, մարդուն այլ բան չի մնում, քան տառապանքը դեմքին արտաբերել այդ խոսքերը: Վերջին հաշվով նա կենսագրություն է կերտել , ճանապարհ անցել, որի համար այսօր էլ վստահեցնում է՝ չի ամաչում ու այսօր էլ կստորագրեր բոլոր այն որոշումների տակ, որոնք ստորագրել է: Նա այդ տարիները չի շալակել, որպեսզի այսօր միայն Գյումրիից Երեւան քայլելու արժանիքի համար իշխանություն ստացածներն իրենք քաղաքական նեղ հաշվարկների համար անգթորեն խզբզեն, վիրավորեն մարդուն: «Մեզ կարելի է մեղադրել, որ մեր արած գործը ժողովրդին լավ ցույց չենք տվել։ Եթե մեր բոլոր գործերը բանավոր անեինք, ամեն անգամ ինձ չխոշտանգեիք։ Մեկ-մեկ ամաչում եմ որոշ լրատվամիջոցների՝ փրկել ենք սնանկացումից… որոշման նախագծի վրա ես էլ եմ աշխատել։ Բայց ոչ ոք չի ասում, որ դա արել է ՍԴ-ն։ Սեփականության իրավունքի հետ կապված Հյուսիսային պողոտայի, որոշ մարդիկ մինչեւ հիմա Հյուսիսային պողոտայի հաղթանակների հաշվին ապրում են։ Մի անգամ չասեցին, որ Եվրոդատարանում հաղթել են, որովհետեւ ՍԴ-ն այդպիսի որոշում է կայացրել։ Վերջին 6 ամիսների ընթացքում մեր մասին ինչ ասես գրում են, օրենքն էլ մեզ արգելում է պատասխան տալ»,- ասում է նա:

Հիմա եկեք ծուռը նստենք եւ ուղիղ խոսենք, ի՞նչ է ակնկալում իշխանությունը այս մթնոլորտից, որտեղ չարությունն, ատելությունը ծնկի են բերում թվացյալ ամենատոկուն մասնագիտության տեր մարդկանց: Միթե հասարակության մեջ էլ պիտի մեկը մյուսի ճակատին զենք պահի, մեկը մյուսին վերացնի, զանգվածային ինքնասպանություններ լինեն, որ հասկանաք, սա ոչ մի տեղ չտանող ճանապարհ է: Պարզապես նայեք Ֆելիքս Թոխյանի հարցազրույցը եւ ամաչեք, նրա փոխարեն կարող էր լինել ձեր հայրիկը, պապիկը, ձեր հարազատը:

Հ.Գ.Մամուլում տեղեկություններ կային, որ իշխանությունն Արարատ Միրզոյանի միջոցով փորձում է ճնշել Թոխյանին, նա էլ ասաց, թե իրեն ոչ ոք չի կարող ճնշել: Հորդորեց ու հիշեցրեց, որ բարոյական նորմերը միշտ ավելի բարձր են եղել, քան իրավականը:

Անի Սահակյան