Մահակ Փաշինյանի ձեռքում, ովքեր են թիրախում

Արցախում աննախադեպ ընտրություններ են սպասվում, ոչ միայն այն պատճառով, որ նույն օրը եւ խորհրդարանական ընտրություններ են ու վերաձեւում է տեղի ունենալու քաղաքական դաշտում, ինչպես նաեւ սկզբունքորեն տեղի է ունենալու իշխանափոխություն, որովհետև գործող նախագահ Բակո Սահակյանը հայտարարել է հեռանալու, այլեւս չառաջադրելու մասին, այլեւ մի շարք այլ հանգամանքներով, գլխավորապես՝ պաշտոնական Երեւանի դիրքորոշմամբ:

Հայտնի է, որ Հայաստանի իշխանությունների աջակցությունն իսկզբանե Արայիկ Հարությունյանի կողմն էր, ոչ միայն այն պատճառով, որ վերջինս ինքն է հեղափոխության առաջին իսկ օրերին իր ծառայությունը մատուցել Նիկոլ Փաշինյանին, այլեւ, որ նա տնտեսական եւ այլ ռեսուրսների է տիրապետում, մրցունակ թեկնածու է Արցախում, ընդունելի բազում շրջանակների կողմից: Բայց երբ պարզ դարձավ, որ Արցախի հեռացող ու դեռեւս գործող իշխանությունը, ի դեմս Բակո Սահակյանի, ժառանգորդ չունի եւ կա ներքին համախոհություն Արայիկ Հարությունյանին աջակցելու, պաշտոնական Երեւանը մտավ ակտիվ խաղի մեջ:

Սկսվեց նախընտրական դաշտի խոշորացում, եւ Արցախի հերոս Սամվել Բաբայանն անսպասելի հայտարարեց թեկնածուներից Մասիս Մայիլյանին աջակցելու մասին: Ակնհայտ է, որ այս անհավանական դաշինքը ձեւավորվել է մի քանի թիրախ չեզոքացնելու նպատակով: Նախ առաջինը, որպեսզի Արայիկ Հարությունյանից հետո երկրորդ բեւեռը ստեղծվի եւ ավելի փոքրանա արմատական թեկնածուի, բոլորի իրական մրցակից, մանավանդ՝ Նիկոլ Փաշինյանի համար այլեւս ախոյան դարձած Վիտալի Բալասանի շանսերը: Որպեսզի բացառվի երկրորդ փուլը, ինչը մինչ Բաբայան-Մայիլյան դաշինքի ձեւավորումը բավականին իրատեսական էր համարվում:
Բայց քանի որ Երևանը Բալասանյանին չեզոքացնելու խնդիրը համարում է իր առաջնահերթությունը, ուստի գործի դրեց իր պլան Բ-ն: Մյուս թիրախը Արցախի գործող իշխանություններն են: Ակնհայտ է, որ Արցախի նախկին վարչապետ Արայիկ Հարությունյանն իր թեկնածության շուրջ կարողացել է ապահովել քաղաքական և հանրային լայն կոնսոլիդացիա՝ այդ թվում Արցախի գործող իշխանության: Ուստի նաեւ վերջին հանգամանքով է պայմանավորված Հարությունյանի նկատմամբ անվստահությունը եւ նոր դաշինքի ձեւավորումը: 
Արմատական Բաբայանի հետ, ըստ էության, պաշտոնական Երեւանը մեծ հույսեր է կապում, որպեսզի ընտրություններից հետո բավականին կտրուկ լուծի տեղի թե ռազմական, թե քաղաքական էլիտայի հարցերը, իսկ թե ինչ կլինի հետո Բաբայանի հետ, որտեղ նա կհայտնվի, դա գիտի միայն մեկ մարդ՝ Նիկոլ Փաշինյանը: Ինչեւէ, այդուհանդերձ հետաքրքիր կոմբինացիա է խաղարկվում, իսկ թե ինչ հանգուցալուծում կլինի, այս պահին դժվար է կանխատեսել:

Անի Սահակյան