Ով հանգստացրեց Բաքվին` ԼՂ ճանաչման հարցում

Առաջիկայում ծրագրվում է Լեռնային Ղարաբաղի հարցով հանդիպում ԵԱՀԿ Մինսկի խմբի համանախագահների մասնակցությամբ, «ՌԻԱ Նովոստի» գործակալության հետ զրույցում հայտարարել է Ռուսաստանի արտգործնախարար Սերգեյ Լավրովը: «Ծրագրում ենք, որովհետև գործը այդպիսի առանձնահատուկ ուշադրություն է պահանջում: Համաձայնեցնում ենք կողմերի հետ, շուտով, հավանաբար, կլինի առաջիկա հանդիպումը: Բնականաբար` համանախագահների, կողմերի մասնակցությամբ: Այդ աշխատանքը պահանջում է այդպիսի խմբակային ձևաչափ», - ասել է Լավրովը, պատասխանելով հարցին, թե արդյո՞ք առաջիկայում սպասվում են բանակցություն ԼՂ հարցով: Ռուսաստանին զուգահեռ այս օրերին ակտիվ հայտարարություններ են հնչում Ադրբեջանի իշխանությունների կողմից: Պարզվում է, Ադրբեջանը շահագրգռված է ԼՂ բանակցային գործընթացի շարունակմամբ: Ադրբեջանի արտգործնախարար Էլմար Մամեդյարովը Պրահայում ելույթ ունենալով «Վիշեգրադյան խմբի» ու «Արևելյան գործընկերության» անդամ երկրների արտգործնախարարների նիստում` անդրադարձել է Ղարաբաղյան հակամարտության կարգավորման խնդրին` նշելով. «Ադրբեջանը շահագրգռված է բանակցային գործընթացի շարունակմամբ: Կայունության ու խաղաղության «ճանապարհային քարտեզը» հստակ է և հենված է միջազգային իրավունքի վրա: Ադրբեջանի ԱԳՆ-ի մամլո ծառայության ղեկավար Հիքմեթ Հաջիևն էլ նշել է, որ ադրբեջանական կողմը պատրաստ է Ղարաբաղյան հակամարտության կարգավորման հարցով բովանդակային ու արդյունավետ բանակցությունների: Նա նշել է, որ Ղարաբաղյան հակամարտության կարգավորման «ճանապարհային քարտեզը» հայտնի է, այդ թվում նաև՝ հայկական կողմին: Մինչև երեկ Բաքվում խուճապային տրամադրություններ էին` Հայաստանում ԼՂՀ ճանաչման մասին օրինագծի քննարկման տեղեկությունների ֆոնին, սակայն այն բանից հետո, երբ նույն խնդրին անդրադարձավ Լավրովը` հանգստացնելով Բաքվին, այժմ Ադրբեջանում էլ են հանգիստ: Ադրբեջանը կիսում է խուճապի պատճառների բացակայության մասին ՌԴ ԱԳ նախարար Սերգեյ Լավրովի հայտարարությունը` Լեռնային Ղարաբաղի Հանրապետության ճանաչման հարցը քննարկելու Հայաստանի խորհրդարանականների նախաձեռնության առիթով, ասել է Ադրբեջանի ԱԳՆ մամլո ծառայության ղեկավար Հիկմեթ Հաջիևը: Հիշեցնենք, որ ՌԴ ԱԳ նախարար Սերգեյ Լավրովը երեկ հայտարարել է, թե խուճապի պատճառներ չի տեսնում Լեռնային Ղարաբաղի Հանրապետության ճանաչման հարցը քննարկելու Հայաստանի խորհրդարանականների նախաձեռնությունում, քանի որ Երևանը վստահեցնում է, որ տարածաշրջանի կարգավիճակը չի որոշվի միակողմանի կարգով: Այսինքն, Մոսկվան ակնհայտ ցույց է տալիս, որ ստանձնել է ԼՂ կարգավորումը Ադրբեջանի պատկերացրած սցենարով առաջ տանելու գործը: Սա բոլորովին էլ անսպասելի բան չէ, պարզապես փաստերը ժամանակին արձանագրել ու առաջ անցնել: Մոսկվայի դերակատարության հետ, վստահաբար մեծ հույսեր է կապում նաև Թուրքիան, չնայած այն բանին, որ լարված են ռուս-թուրքական հարաբերությունները: «Ռուսաստանի հետ հարաբերությունների հարցում Թուրքիայի դիրքորոշումը մնում է անփոփոխ», նշել է Թուրքիայի վարչապետ Ահմեդ Դավութօղլուն «Ալ Ջազիրա» հեռուստաալիքին տված հարցազրույցում։ Դավութօղլուն նշել է՝ Ռուսաստանն ու Թուրքիան պատմական հարևաններ են և այսօր էլ ներկայանում են, որպես երկու կարևոր երկրներ։ Նա համոզմունք է հայտնել, որ Թուրքիան անհրաժեշտ է Ռուսաստանին այնպես, ինչպես Ռուսաստանը Թուրքիային։ «Ինքնաթիռի պատահարը Ռուսաստանի դեմ ուղղված չէր, ինքնաթիռը խախտել էր մեր օդային սահմանը»,- կրկնել է Թուրքիայի վարչապետը՝ ընդգծելով, որ իր երկիրն իրավունք ունի պաշտպանելու սեփական ցամաքային և օդային սահմանները։ «Հուսով ենք, որ նրանք գիտակցում են դա։ Մենք հանդես ենք գալիս Ռուսաստանի հետ կապերի ընդլայնման օգտին, ինչպես նախկինում էր։ Ուզում ենք նախկինի համեմատ ավելի խորացնել մեր համագործակցությունը»,- հավելել է Դավութօղլուն։ Ինչպես ասում են` ամեն ինչ տեղը կընկնի, եթե ապրիլյան պատերազմից հետո հաշտվեն Ռուսաստանն ու Թուրքիան: Դաշնակցի ու հակառակորդների «ծաղկեփունջը» վերջնական տեսք կստանա... Մետաքսյա Շալունց