Ռոբերտ Քոչարյանն անցնում է հակահարձակման

Երկրորդ նախագահ Ռոբերտ Քոչարյանը Մարտի 1-ի գործի հետ կապված սկանդալային մեղադրանք է հնչեցրել: Նա դատարանում հայտարարել է, որ Մարտի 1-ի նյութերն ամբողջությամբ իրեն չեն տրամադրվել: Այս փաստը էքսնախագահը գնահատել է որպես խտրական վերաբերմունք և ընտրովի մոտեցում, որի նպատակը սպանությունների բավահայտման կոծկումն է. «Եթե այս քր. գործը շենքի հետ համեմատենք, ապա գործը սկսել են գլխից՝ սկզբից մեղավոր է նշանակվել, հետո ընտրել են հոդվածը և դրանից հետո ամբողջ նյութերից փորձել են հանել, քրեական գործի մեջ ներառել միայն այն նյութերը, որոնք իրենց կարծիքով ինչ-որ ապացուցողական բազա են ձևավորել»,- հայտարարել է Քոչարյանը:
Նրա խոսքով` ամբողջ քրեական գործում ԱԱԾ-ից ստացված ընդամենը երկու նամակ կա: <<Ստացվում է՝ մեր ամենակայացած կառույցներից մեկը որևէ վերաբերմունք, որևէ նյութ չունի այս իրադարձությունների վերաբերյալ: Հնարավո՞ր է դրան հավատալ այն պարագայում, երբ փետրվարի 24-ին հարուցված այդ քրեական գործը՝ սահմանադրական կարգի տապալման վերաբերյալ, և միայն այս քր. գործում կա որոշում քրեական գործ հարուցելու մասին»,- հռետորական հարց է հնչացրել Ռոբերտ Քոչարյանը: Ընդ որում` ԱԱԾ-ի երկրորդ նամակն այն մասին է, որ գործի երեք հատորն ուղարկվել է Հատուկ քննչական ծառայություն` մարտի 2-ին: «Հնարավո՞ր է հավատալ, որ ԱԱԾ-ն որևէ դերակատարություն չունի, որևէ տեղեկատվության չի տիրապետել այդ ողջ ընթացքում: Հնարավոր չէ հավատալ, կամ մարդ պետք է շատ տկար ուղեղի տեր լինի, որ հավատա, որ դա այդպես է: Մենք բազմիցս դիմել ենք, որպեսզի մեզ տրամադրեն ամբողջ նյութերը: Վստահեցնում եմ՝ գիտեմ ինչի մասին եմ խոսում, որովհետև այն ժամանակ ես նախագահ եմ եղել և շաբաթը մեկ անգամ անվտանգության ծառայության պետը, որը բարձր կարգի արհեստավարժ մարդ էր, զեկուցում էր ինձ: Ես գիտեի՝ ինչ է նա զեկուցում, ես այդ զեկույցներից որևէ նյութ այս քրեական գործում չեմ տեսել, չկան: Ես չեմ կասկածում, որ այդ նյութերը կան այն վեց հարյուր էջում, որոնք առանձնացված են կամ այսօր ԱԱԾ-ում են, բայց որոնք չեն տրամադրվել այս քրեական գործի համար»,- հայտարարել է Ռոբերտ Քոչարյանը:
Զավեշտալին, ըստ Քոչարյանի, այն է, որ «Վիկիլիքսի» նյութերը կարդալուց տպավորություն է ստեղծվում, որ ԱՄՆ-ի դեսպանատունը շատ ավելի ինֆորմացված է ՀՀ ներքաղաքական իրադարձությունների մասին, քան մեր ԱԱԾ-ն: Մինչդեռ այն, ինչ հրապարկել է Վիկիլիքսը, ժամանակին զեկուցվել է Քոչարյանին: Սակայն քրեական գործում այդ մասին բացարձակ ոչինչ չկա:
<< Հիմնավոր կասկած ունեմ, որ այդ 600 հատորում կան բավարար նյութեր 10 սպանությունը բացահայտելու համար, ես ենթադրում եմ, ունեմ ողջամիտ կասկած մտածելու, որ կան բավարար նյութեր, ուղղակի չեն ուզում դա անել:Պատճառներից մեկը կարող է այն լինել, որ չեն ուզում, որովհետև դա կարող է մեկ ուրիշ տեղ տանել, ինչը կհակասի այս քրեական գործի ուղղվածությանը և երկրորդը ներկայացնելու դեպքում հարցեր կառաջանան՝ արդյո՞ք տուժողներն այս նիստին պետք է մասնակցեն, թե ոչ: Այդ երկու մոտիվացիան ինձ համար ակնհայտ է»,- դատարանում հայտարարել է երկրորդ նախագահը:
Քոչարյանի այս պնդումները ուշագրավ են, որովհետև նա ըստ էության բաց տեքստով մեղադրում է, որ դատարանը կոծկում է 10 զոհերի սպանության բացահայտումը: Խորքային խնդիրը ոչ թե զոհերի սպանությունն է, այլ Քոչարյանի դեմ ուղղված քաղաքական և անձնական հաշվեհարդարը: Հենց այս պատճառով էլ սպանության ամբողջական նյութերը, որոնք գործի բացահայտման համար էական դերակատարություն կարող են ունենալ, դիտավորությամբ չեն տրամադրվում Քոչարյանին:

Հայկ Դավթյան