Ուղևորներին մեկ առ մեկ տեսախցիկով նկարելու փոխարեն

Նախօրեին տարբեր երթուղիների վարորդներ բողոքի ակցիա էին կազմակերպել։ Մոտ 10 երթուղու 150 մեքենա դուրս չէր եկել երթուղի։ Վարորդները գործադուլն էին անում՝ պատճառաբանելով, որ ստացած գումարն իրենց կատարած աշխատանքին համարժեք չէ, պնդում էին, որ նախկինում ավելի ցածր գնով էինգազ լիցքավորում :
Երևանի քաղաքապետարանի մամուլի խոսնակ Հակոբ Կարապետյանը պարզաբանել է, որ վարորդները հրաժարվում են երթուղի դուրս գալ ուղևորափոխադրող ընկերության, հետ անհամաձայնության պատճառով:
«Խոսքն օրական «պլանի» բարձրացման մասին է։ Հիմա քաղաքապետարանի ներկայացուցիչի մասնակցությամբ հարցը քննարկվում է։ Հասկանալի է, որ գործատուի և վարորդների խնդիրն է, բայց քաղաքապետարանը, բնականաբար շահագրգռված է, որ այդ հարցը արագ լուծվի, և երթուղայինների աշխատանքներն իրականացվեն»,- նշել էր նա։
Ավելի ուշ վարորդները սկսեցին աշխատել, բայց խնդիրը խորքային առումով մնում է չլուծված: Վարորդները համաձայնվել են աշխատել միայն այն բանից հետո, երբ քաղաքապետարանի տրանսպորտի վարչության պետի ժամանակավոր պաշտոնակատարը և ուղևորափոխադրող ընկերության սեփականատերը գործադուլ հայտարարած վարորդներին հորդորեցին գիծ դուրս գալ և առաջիկա 7 օրն աշխատել հին օրավարձով, մինչև հարցին որևէ լուծում կտրվի:

Խնդիրները շատ են և դրանց խորքային լուծումը այլ կերպ, քան քաղաքային բյուջեից ուղղակի դոտացիաների հատկացումը քաղաքային տրանսպորտային, իրատեսական չէ: Քաղաքային տրանսպորտը ոչ միայն և ոչ այնքան բիզնես է, այլ հանրային ծառայություն: Որակյալ սերվիս ունենալու համար պետք է պատշաճ վճարել: Աշխարհում ընդունված է երկու մոդել` կամ այդ գինն ամբողջությւամբ վճարում է ուղևորը կամ էլ սակագնի մի մասն իր վրա է վերցնում պետությունը / համայնքը/:
Այն գինը, որն այսօր Երևանում, սահմանված է որպես ուղևորավարձ, որակյալ տրանսպորտ ունենալու համար, բավարար չէ: Հաշվի առնելով մեր բնակչության սոցիալական վիճակը` այս փուլում սակագնի բարձրացման գնալը կարող է ճգնաժամային հետևանք ունենալ, որը նաև քաղաքական առումով բացասական էֆեկտ կթողնի իշխանության վարկանիշի վրա:
Միակ տարբերակը, որը կարող է իրավիճակի ռեալ բարելավում ապահովել, պետական կամ համայնքային աջակցությունն է քաղաքային տրանսպորտին:
Իսկ մեզանում առայժմ նման միտումներ չկան, հակառակը դեռ մի բան էլ ավտոբուսների մեջ տեսախցիկներ են դնում, որ ուղևորներին մեկ առ մեկ ֆիքսեն: Հենց այդ տեսախցիկային վերլուծությունների արդյուքում էլ բարձրացվել է օրվա պլանը:
Երթուղայինի վարորդները հայտարարել են, որ արտոնություն չտրամադրելու դեպքում գործադուլը կկրկնվի:

Արտոնություն կարող է և պետք է լինի: Ուղևորափոխադրող տրանսպորտային ընկերությունները պետք է ընդհանրապես տեղափոխվեն լիցենզավորված վճարների դաշտ և ուղղակի հարկեր, որպես այդպիսին չվճարեն: Այս դեպքում նաև իրատեսական կլինի նրանց առաջ պայման դնել` միկրոավտոբուսներից անցնել ավտոբուսների: 

Հայկ Դավթյան