Գյուղացիները այսօրվա իշխանությանը իրենց ուսերի վրա դրած կնետեն քաղաքական աղբանոցը. ֆերմեր Տիգրան Եղոյան /տեսանյութ/

Պաշտոնապես հայտարարում եմ՝ Վայոց ձորում նոր ՀԷԿ-ի կառուցման թույլտվություն կա: Այսօրվա իշխանությունը նախկին իշխանությունների նման իրականացնում է հանցավոր քաղաքականություն: Այս մասին «Արմնյուզ» ՀԸ հեռարձակվող Անժելա Թովմասյանի հեղինակային «Հայելու առաջ» հաղորդաշարի ժամանակ ասել է Վայոց ձորից ֆերմեր Տիգրան Եղոյանը՝ անդրադառնալով գյուղացու հոգսերին:

Ֆերմերը պնդում է, որ ՀԷԿ-երի շահագործմամբ չորացնում են բոլոր գետերը, և իրենք պատրաստ են անգամ դիմելու ծայրահեղ քայլերի՝ ընդհուպ հացադուլի. «Գյուղացին հարկադրաբար վերացնում է խոշոր եղջերավոր անասուններին: Ինչու՞ պետք է գյուղացին իր հողը թողնի ու գա Երևանում աշխատելու»:

Հաղորդման մյուս հյուրը՝ «Ագրարագյուղացիական միավորում» ՀԿ ղեկավար Հրաչ Բերբերյանը, խոսելով գյուղատնտեսության ոլորտում տիրող իրավիճակից, ասել է. «Վերջին երկու տարում մենք կորցրել ենք մոտ 1500 գլուխ խոշոր եղջերավոր անասուն, թռչնաբուծությունն էլ իր հերթին է խայտառակ վիճակում »:

Հրաչ Բերբերյանի խոսքով՝ մեր Կառավարության ամբողջ դժբախտությունը կադրերն են. «Ինչպես կարող է մի բնագավառ, որը ՀՆԱ է ապահովում, փակվի ու կցվի կոորդինացնող նախարարությանը. սա դիվերսիա է, տվեք անունը՝ ով է առաջարկել փակել գյուղնախարարությունը»:

Հրաչ Բերբերյանը նշում է, որ կանգնած են մեծ վտանգի առաջ. «Մենք այսօր կարող ենք մոտ 3000 տոննա լոլիկ արտադրել, բայց այդ հարցով չենք զբաղվում, ինչի հետևանքով բերքը տուժում է մորմազգի ցեցից»:

Գյուղատնտեսական ճգնաժամի ու գյուղական վայրերի միջազգային փորձագետ Արմեն Մեհրաբյանի գնահատմամբ՝ միջազգային մակարդակով 35 տոկոսով աճելու է մսի պահանջարկը, մոտավորապես 48-62 տոկոս աճելու է սննդամթերքի պահանջարկը. «Մենք գյուղատնտեսության ոլորտում պետք է ունենանք այնպիսի քաղաքականություն, որպեսզի հասկանանք՝ ու՞ր ենք գնում: Այո՛, կադրերի խնդիրն ամենամեծն է»:

Ըստ փորձագետի՝ Հայաստանը չի կարող արտադրությունների մակարդակում լինել առաջատար. «Հայաստանը կարող է 3-4 տարում գյուղատնտեսության ոլորտը դարձնել դրախտ: Եթե գյուղացին տարեկան չստանա երեքից-չորս հազար դոլար, նա իր հողը չի սիրի»:

Եզրափակելով խոսքը՝ ֆերմեր Տիգրան Եղոյանը նշում է, որ գյուղատնտեսության ոլորտում թալան է, ինչը վարչապետը շատ լավ գիտի. «Գյուղացին երկրից գնում է: Նիկոլ Փաշինյան, դու շատ շուտով կզգաս գյուղացու հարվածը»:

Փորձագետ Արմեն Մեհրաբյանն էլ պնդում է, որ գյուղատնտեսությունը պետք է ապաքաղաքականացվի, այլապես այս իրավիճակը կհանգեցնի կործանման: