Փաշինյանին վերջին շանսն է տրված՝ կօգտվի, թե կգնա իր ճանապարհով

Հայաստանի խորհրդարանում իշխանականները դեռ ավարտին չէին հասցրել Սահմանադրությունը գլխատելու
հանցագործությունը, և առանց ՍԴ կարծիքը լսելու սահմանադրական փոփոխությունների նախագիծը հանրաքվեի դնելու որոշում ընդունել իրենց քվեարկությամբ, երբ լսվեց ԵԽԽՎ համազեկուցողների՝ Հայաստանի իշխանություններին ուղղված հերթական կոչը՝ Սահմանադրական փոփոխություններ նախատեսող նախագծերի շուրջ հնարավորինս շուտ ստանալ Վենետիկի հանձնաժողովի կարծիքը։

«Հայաստանի խորհրդարանը որոշել է փետրվարի 6–ին արտահերթ նիստ անցկացնել ՝ քննարկելու մի շարք փոփոխություններ, որոնց արդյունքում պետք է հանվի պահանջը, ըստ որի, Սահմանադրական դատարանը ստուգում է օրինագծերի համապատասխանությունը Հայաստանի Սահմանադրությանը։ Ի թիվս այլ հարցերի, սա նաև փոխելու է Սահմանադրությունը վերանայելու ընթացակարգը։ Բացի դրանից՝ սահմանադրական մեկ այլ առաջարկվող փոփոխություն կարծես թե նպատակ ունի դադարեցնել Սահմանադրական դատարանի մի քանի անդամների լիազորությունները։ Այս երկու թեմաները կարևոր են, իսկ առաջարկվող փոփոխությունները կարող են երկարաժամկետ բացասական հետևանքներ ունենալ սահմանադրական հաստատությունների գործունեության վրա։ Այս համատեքստում, ինչպես նաև հաշվի առնելով այս առնչությամբ բարձրացված որոշ հարցեր, կոչ ենք անում Հայաստանի իշխանություններին հնարավորին շուտ դիմել Վենետիկի հանձնաժողովին և ստանալ ԵԽ փորձագիտական մարմնի կարծիքը։ Հանձնաժողովի կարծիքը, որը կարող է ստացվել հրատապ ընթացակարգով, կարծում ենք, արժեքավոր կլիներ շահագրգիռ կողմերի, այդ թվում՝ Հայաստանի ընտրողների համար, եթե հարցը դրվելու է հանրաքվեի»,–հայտարարել են ԵԽԽՎ Հայաստանի մշտադիտարկման համազեկուցողներ Անդրեյ Շիրչելը (Սլովենիա, Եվրոպայի ժողովրդական կուսակցության խումբ) և Կիմմո Կիլյունեն (Ֆինլանդիա, Սոցիալիստների, դեմոկրատների և կանաչների խումբ): Հայտարարության տեքստը տեղադրված է ԵԽԽՎ-ի պաշտոնական կայքում։ Մի քանի օր առաջ էլ անհանգստություն էին հայտնել ՍԴ-ի շուրջ ստեղծված վերջին օրերի գործընթացների վերաբերյալ: Նրանց հայտարարոթյունից հետո մեր իշխանության մանր ու միջին պաշտոնյաներն առանձնակի սոփեստությամբ ձեւացրեցին, թե ոչ մի նախազգուշացում չկա, որ այդ կոչերն իրենց ուղղված չէին, ճիշտ հակառակը՝ միջազգային գործիչները համաձայն են իշխանությունների բոլոր քայլերին:
Մի քանի օր է Հայաստանի իրավագիտական միտքը լծված է այս իշխանություններին հասկացնելու, որ իրենց մտադրությունները դուրս են իրավունքի եւ սահմանադրականության դաշտից, որ այդ ճանապարհով թեկուզ ամենաոչլեգիտիմ կառույցի հարցերը լուծելը պետությունը մի քանի տարով միայն հետ է գցելու: Անտեսել էին նաեւ միջազգային կառույցների խորհրդատվական կարծիք ստանալու ավանդույթը, այո, այդ կարծիքը խորհրդատվական է, բայց Հայաստանը Եվրոպական ընտանիքի անդամ է եւ եթե ցանկանում է գնալ քաղաքակրթական ճանապարհով, ապա առնվազն չի կարող անտեսել: Այնպես որ Նիկոլ Փաշինյանին վերջին շանսն է տրված՝ մնում է քաղաքակիրթ աշխարհի հետ, թե իր ցեղախմբի իշխանությունն է հաստատում երկրում:

Անի Սահակյան