Նախ Վենետիկ, հետո հանրաքվե. միջազգային կառույցները փոխում են պահանջը

ՍԴ դատավորների պաշտոնավարումն ընդհատելու վերաբերյալ Սահմանադրության փոփոխության նախագիծը հանրաքվեի դնելու Իմ քայլը խմբակցության նախաձեռնությունը պետք է արժանանա Սահմանադրական դատարանի եզրակացությանը: Այս դրույթն ամրագրված է Սահմանադրության 168-րդ հոդվածում: Առանց ՍԴ համաձայնության հանրաքվեի արդյուքները, անկախ ելքից, կլինեն հակասահմանադրական: Իրավական այս պարզ ու հստակ խնդրին իշխող ուժը դեռ չի անդրադարձել: Փոխարենը խնդրին շատ հրատապ արձագանքել են ԵԽԽՎ Հայաստանի հարցով համազեկուցողները: Խայտառակ նախագծի ընդունումից անմիջապես հետո նրանք հայտարարություն են տարածել, որով կոչ են անում Հայաստանի իշխանություններին Սահմանադրական փոփոխությունների նախագիծը ներկայացնել Վենետիկի հանձնաժողով՝ հրատապ գործընթացի միջոցով կարծիք ստանալու համար:
«Հայաստանի խորհրդարանը որոշեց արտահերթ նիստ անցկացնել փետրվարի 6-ին, որպեսզի քննարկի մի շարք փոփոխություններ, որոնք կվերացնեն Սահմանադրական դատարանի` օրենսդրության նախագծի Սահմանադրությանը համապատասխանությունը ստուգելու պահանջը: Ի թիվս այլի, սա ինքնին կփոխի Սահմանադրության վերանայման կարգը: Բացի այդ, ներկայացվել է սահմանադրական փոփոխություն, որը, կարծես թե, նպատակ ունի անհապաղ դադարեցնել գործող Սահմանադրական դատարանի մի քանի անդամների ժամկետները»,- այս մասին ասվում է Եվրոպայի Խորհրդի Խորհրդարանական վեհաժողովում Հայաստանի հարցով համազեկուցողներ Անդրեյ Շիրցելի և Կիմմո Կիլյունենի տարածված հայտարարության մեջ։
Համազեկուցողները նշում են, որ այս երկու թեմաները կարևոր են, և առաջարկվող փոփոխությունները կարող են երկարաժամկետ հետևանքներ ունենալ սահմանադրական ինստիտուտների գործունեության վրա:
«Այս համատեքստում, ինչպես նաև հաշվի առնելով այդ կապակցությամբ բարձրացված մի քանի հարցեր, մենք կոչ ենք անում Հայաստանի իշխանություններին՝ հնարավորինս շուտ դիմել Վենետիկի հանձնաժողովի՝ Եվրախորհրդի սահմանադրական իրավունքի փորձագիտական մարմնի կարծիքի համար: Մենք հավատում ենք, որ այս կարծիքը, որը կարող է շատ արագ ընդունվել հրատապ ընթացակարգով, արժեքավոր կլինի բոլոր շահագրգիռ կողմերի համար, այդ թվում հայ ընտրողների համար, եթե պետք է անցկացվի հանրաքվե»,-ասվում է հայտարարության մեջ։
Նման հայտարարությունից հետո նախագահ Արմեն Սարգսյանը, անշուշտ, կարող է հիմնավորապես մերժել հանրաքվեի նախագծի ստորագրումը` մատնանշելով միջազգային կառույցների մտահոգությունը:
Առաջիկա օրերին պարզ կդառնա `նախագահ Սարգսյանը որոշել է սահմանադրակա կարգի տապալման հարցում դառնալ Նիկոլ Փաշինյանի գործընկերը, թե մնալ պետական մտածողության կրող:
Ավելորդ է ասել, որ նման տոնով միջազգային կառույցները խոսում են միայն ժողովրդավարությունից հեռո երկրների իշխանությունների, օրինակ Ադրբեջանի հետ:

Հայկ Դավթյան