Չափալախի սպասելիս․Փաշինյանը պետք է զգուշանա

Իշխանությունը, ինչպես էդմոն Մարուքյանը բնորոշեց, որոշել է ձեռք առնել Վենետիկի հանձնաժողովին եւ ԵԽԽՎ գործընկերներին, որոնք վերջին օրերին կոշտ գնահատականներ, քննադատություններ հնչեցրեցին Սահմանադրական դատարանի շուրջ ձեւավորված մթնոլորտի մասին։ Մի քանի օր է իշխանության ներկայացուցիչները փորձում են տարածված հայտարարություններից ներկայացնել իրենց ձեռնտու հատվածները։ Այսօր նույնը կրկնեց նաեւ ԵԽԽՎ հայաստանյան պատվիրակության ղեկավար Ռուբեն Ռուբինյանը։ Նա իր հայտարարություններով պետք է ասել ոչ միայն ձեռնոց նետեց, այլ գերազանցեց թիմի բոլոր անմեղսունակներին, նույնիսկ Մակունցն իր աբսուրդային հայտարարություններով այլեւս անգերազանցելի չէ։ Ռուբեն Ռուբինյանը հայտարարեց, թե գործադիրի եւ դատական իշխանության միջեւ այս լարվածությունը ստեղծվել է Հրայր Թովմասյանի պատճառով։« Ես միանգամայն կիսում եմ ԵԽԽՎ համազեկուցողների անհանգստություններն առ այն, որ ՀՀ երկու ինստիտուտների՝ ՍԴ-ի և Վարչապետի աշխատակազմի միջև կա մեծ լարվածություն։ Ես կարծում եմ, որ սա նորմալ չէ և դա արդյունք է նաև նրա, որ ՍԴ նախագահն արել է բազմաթիվ քաղաքական հայտարարություններ և դրանք կրում են ընդդիմադիր հայացքներ»,-ասաց Ռուբեն Ռուբինյանը։

Փաստորեն վարչապետի ուլտիմատումները, որ Հրայր Թովմասյանը չի կարող լինել ՍԴ նախագահ, իրավապահ մարմինների ճնշումները Հրայր Թովմասյանի ընտանիքի եւ բարեկամների նկատմամբ սիրո եւ համերաշխության դրսեւորումներ են եւ լարվածության մասին խոսք լինել չի կարող։ Իշխանության ջայլամային պահվածքը հունից հանեց նույնիսկ հարմարվող ընդդիմադիրներին, որոնք ԵԽԽՎ-ում զբաղված էին Ադրբեջանին ասֆալտին փռելով, եւ մոռացել էին իրենց երկրի խնդիրները։ Էդմոն Մարուքյանն ասաց, թե պետք չէ մանիպուլացիաներ անել, երկու հայտարարություններն էլ իշխանությանն էին ուղղված․«Առաջինը, վաղ կենսաթոշակի անցնելու համակարգի վերաբերյալ եղած ռեկոմենդացիաները պահպանելուն էին ուղղված, եւ երկրորդն այն լարմանը, որ կա այսօր։ Երկու հայտարարություններն էլ սխալ են մեկնաբանվել իշխանությունների կողմից, մեկնաբանվել են ի օգուտ իրենց։ Այսինքն իշխանությունները, երբ ասում են մենք ողջունում ենք այդ հայտարարությունը, դրանով ուզում են ծածկել մտահոգությունների այդ ամբողջ հատվածը: Ես դա պետք է անվանեմ թրոլինգ։ Բարձր մակարդակով իշխանությունը թրոլինգի է ենթարկում ԵԽԽՎ համազեկուցողներին, այնուհետեւ Վենետիկի հանձնաժողովի նախագահին։ Այդ մարդկանց ձեռք են առնում եւ ինչո՞ւ են ձեռք առնում, որովհետեւ եթե դուք համեմատեք նախկինում այս ձեւի հայտարարությունները ոնց են ընկալվել, դա էլ պարզ կլինի: Որովհետեւ իշխանությունը լեգիտիմ իշխանություն է եւ որեւէ բանով կաշկանդված չէ, ցույց է տալիս, որ ես լեգիտիմ իշխանություն եմ եւ ես թքած ունեմ ձեր հայտարարությունների վրա, ես այդպես եմ ընկալում»,-ասաց Մարուքյանը:

Նաիրա Զոհրաբյանն էլ հեգնեց, թե դրանք սեպագիր արձանագրություններ չեն, որ չհասկացվեն, թե ում եւ ինչ նկատի ունեն։ Նա նույնպես շեշտեց, որ կիսում է Մարուքյանի տեսակետը։ Իշխանության ներկայացուցիչները մնացին իրենց կարծիքին՝ պնդելով, որ ԵԽԽՎ-ն իրենց դեղին քարտ ցույց չի տվել։ Նիկոլ Փաշինյանը պետք է զգուշանա իր այս զինակիցներից, քանի որ նրանք այս պահվածքով ըստ էության կարող են շարժել ԵԽԽՎ-ի համազեկուցողների ու Վենետիկի հանձնաժողովի ղեկավարի զայրույթը, իսկ ապագայում իշխանություններին ուղղված ոչ թե ապտակ, այլ չափալախ տան։

Անի Սահակյան