Նիկոլ Փաշինյանի սխալ հաշվարկը
Սահմանադրական փոփոխության նախագիծը, պարզվում է, ՍԴ-ի հետ համաձայնեցնելուց բացի, պետք է կարծիքի ուղարկել նաև Վենետիկի հանձնաժողով: Իշխող մեծամասնությունը, որ շտապել ԱԺ արտահերթ նիստ գումարել` օրակարգում ընդգրկելով «Իմ քայլը» խմբակցության պատգամավոր Վահագն Հովակիմյանի հեղինակած ՍԴ-ին խաղից դուրս թողնելու օրենսդրական փաթեթը, այս հանգամանքը հաշվի չէր առել:
Հիշեցնենք, որ փաթեթով մասնավորապես առաջարկվում էր`
– Մինչ Սահմանադրության փոփոխությունների ընդունումն Ազգային ժողովի կողմից Սահմանադրական դատարան դիմելը՝ նախագծի սահմանադրականությունը որոշելու նպատակով, դարձնել ոչ պարտադիր, նույնը՝ հանրաքվեի դրվող Սահմանադրության փոփոխությունների մասով,
– Ուժը կորցրած ճանաչել Ազգային ժողովի ընդունած Սահմանադրական փոփոխությունները Հանրապետության նախագահին ուղարկելու մասին դրույթը, ինչպես նաև Ազգային ժողովի նախագահին վերապահել այդ փոփոխությունները հրապարակելու գործառույթը, որն այժմ պատկանում է Հանրապետության նախագահին,
– Սահմանադրական դատարանի դատավորների ընտրությունն անցկացնել Ազգային ժողովի ոչ միայն հերթական, այլ նաև արտահերթ նիստերի ընթացքում։
ԱԺ Լուսավոր Հայաստան խմբակցության ղեկավար Էդմոն Մարուքյանն առաջինը ահազանգեց, որ նման հիմնարար փոփոխությունները չեն կարող կատարվել արտահերթ ընթացակարգով: Դրանք պետք է անցնեն Վենետիկի հանձնաժողովի փորձաքննությունը՝ հասկանալու համար, թե փոփոխությունները որքանով են համապատասխանում Հայաստանի ստանձնած միջազգային պարտավորություններին:
Հունվարի 31-ին հրապարակվեց ԵԽԽՎ Մոնիթորինգի հանձնաժողովի՝ Հայաստանի հարցերով համազեկուցողների հայտարարությունը, որում մտահոգություն են հայտնել ՍԴ և վարչապետի աշխատակազմի միջեւ լարվածության կապակցությամբ: Նույն օրը պարզ դարձավ, որ ԱԺ նախագահ Արարատ Միրզոյանը չեղարկել է սահմանադրական բարեփոխումների օրակարգով փետրվարի 6-ին ԱԺ արտահերթ նիստ անցկացնելու որոշումը:
Հիմա իշխանութունները պետք է կողմնորոշվեն` իրենց դարակազմիկ նախագիծն ուղարկել ՍԴ, թե՞ Վենետիկի հանձնաժողով:
Ի դեպ, ՍԴ դիմելու ռիսկն առաջարկվող նախագծով չի չեզոքացվում. . Սահմանադրության 168-րդ հոդվածի 2-րդ կետով սահմանված դեպքերում Սահմանադրական դատարան դիմում է Ազգային ժողովը` Սահմանադրության փոփոխությանը, վերպետական միջազգային կազմակերպություններին անդամակցությանը կամ տարածքի փոփոխությանը վերաբերող հարցերով: Քաղաքացիական նախաձեռնության կարգով հանրաքվեի դրվող օրենքի նախագծի հարցով Սահմանադրական դատարան է դիմում քաղաքացիական նախաձեռնության լիազոր ներկայացուցիչը: Սահմանադրական դատարանը գործը քննում է միայն համապատասխան դիմումի առկայության դեպքում։
Դիցուք` ԱԺ-ն որոշում է սահմանադրական փոփոխությունների հարցով չդիմել ՍԴ: Ո՞ վ է ասել, որ նույն նախագիծը ՍԴ-ի համաձայնությանը չի կարող ներկայացվել քաղաքացիական նախաձեռնության կարգով: Կամայական քաղաքացիական նախաձեռնություն կարող է ուղղակի վերցնել ԻՄ քայլի նախագիծն ու դիմել ՍԴ` խնդրելով գնահատել սահմանադրականության հարցը: Այսինքն` ՍԴ-ն շրջանցելու հարցն առաջարկվող նախագծով, միևնույնն է, չի լուծվում:
Հայկ Դավթյան
Հ.Գ. Հունվարի 31-ին լրացավ ՍԴ դատավորներին վաղ կենսաթոշակի ուղարկելու օրենքով սահմանված ժամկետը: Որևէ դատավոր այդ օրենքի հնարավորությունից չօգտվեց: Փաստորեն, ՍԴ-ի հետ կապված Նիկոլ Փաշինյանի հաշվարկները սխալ դուրս եկան:
Հետևեք մեզ Viber-ում
