Դավիթ Տոնոյանի խոշոր վրիպումը

Օրերս ՊԲ բանակային ուսումնական կենտրոնում մահացած N զորամասի պարտադիր ժամկետային զինծառայող, շարքային Վահրամ Ավագյանի դին հարազատները ի նշան բողոքի որոշել էին Երևան բերել: Նրանց հետ հանդիպման մեկնած ՀՀ պաշտպանության նախարար Դավիթ Տոնոյանը բավականին ծանր կացության մեջ էր` հարազատներին հանդարտեցնելը և երթը կանգնեցնելը հեշտ չէր և նախարարը, գուցե ակամա, բայց մի քանի վրիպում թույլ տվեց: Տոնոյանը հայտարարեց, թե Արցախում հունվարի 30-ին մահացած զինծառայողի գործով 3 ձերբակալված կա, որոնցից մեկն էլ նախկին պատգամավոր Առաքել Մովսիսյանի (Շմայսի) որդին է: Նա նաև հայտարարեց, թե ինքը չի հավատում, որ կատարվածն ինքնասպանություն է: Հավատացրեց, որ է կատարվածի բացահայտումն իր թասիբի խնդիրն: 

Միանգամիվ փաստենք, որ անկախ նրանից, թե ով է կատարվածի իրական մեղավորը, նախարարի կողմից ձերբակալված երեք զինվորներից մեկին առանձնացնելը և նրա ով լինելը հրապարակելը, անմեղության կանխավարկածի կոպտագույն խախտում է:
Քննչական կոմիտեի տարածած հաղորդագրության համաձայն` 2020թ. հունվարի 30-ին՝ ժամը 13:15-ի սահմաններում, ՊԲ բանակային ուսումնական կենտրոնում, N զորամասի պարտադիր ժամկետային զինծառայող, շարքային Վահրամ Մկրտիչի Ավագյանի մահվան դեպքի առթիվ հարուցված քրեական գործի շրջանակներում ձերբակալվել են Մկրտչյանի համածառայակիցներ Դավիթ Առաքելի Մովսիսյանը, Խաչիկ Արմենի Գասպարյանը, Սպարտակ Արթուրի Ավետիսյանը։
Վերջիններս ձերբակալվել են ՀՀ քրեական օրենսգրքի 359-րդ հոդվածի 3-րդ մասով նախատեսված հանցավոր արարք կատարելու կասկածանքով, այն է զինծառայողների փոխհարաբերությունների կանոնագրքային կանոնները խախտելը նրանց միջև ստորադասության հարաբերությունների բացակայության դեպքում: (Սույն հոդվածի առաջին կամ երկրորդ մասով նախատեսված արարքը, որն առաջացրել է ծանր հետևանքներ՝ պատժվում է ազատազրկմամբ՝ չորսից ութ տարի ժամկետով): Նախաքննությունը շարունակվում է:
Այսինքն` երեք ձերբակալվածից նախարարը չգտես ինչու բարձրաձայնեց միայն նախկին պատգամավորի որդու անունը, թերևս միայն այն պատճառով, որ նա Շմայսի որդին է: Գործը դեռ նախաքննության փուլում է, չկա դատարանի վճիռ: Նման պայմաններում անընդունելի է ինչպես նախապես մամուլում առաջ քաշված ինքնասպանության վարկածը, այնպես էլ զոհված զինծառայողների հարազտաներին հնարավոր մեղավորների անուններ հայտնելը: Սա կարող է անգամ վենդետայի կամ նոր բախման և նոր ողբերգությունների պատճառ դառնալ` հաշվի առնելով զոհվածի հարազատների էմոցիոնալ հոգեվիճակը:Հետևաբար, նախարարը պետք է առնվազն խուսափեր անուններ և որակումներ տալուց` դա թողնելով դատարանին: Միակ բանը, որ ի պաշտոնե Տոնոյանը պարտավոր էր հայտարարել, դա գործն անձնական հսկողությւան տակ վերցնելն ու քննության ընթացքին հետևելը պիտի լիներ:
Իսկ ընդհանրապես բանակում կատարվող միջադեպերը փաստում են, որ զինված ուժերի բարեփոխումները ձևական բնույթ են կրում: Ինչքան էլ որ զորամասերում սննդի կազմակերպման նոր մեխանիզմ է ներդրվել, ինչքան էլ որ հագուստի և կենցաղային այլ պարագաների խնդիր է լուծվել, միևնույնն է` խորքային խնդիրը մնում է չլուծված:

Հայկ Դավթյան