Անգրագիտության հրավառություն իշխող թիմում

Հունվարի 30-ին Ազգային շրջանառության մեջ դրվեց «Ազգային ժողովի կանոնակարգ» ՀՀ սահմանադրական օրենքում փոփոխություններ և լրացումներ կատարելու մասին», «Հանրաքվեի մասին» ՀՀ սահմանադրական օրենքում փոփոխություններ և լրացումներ կատարելու մասին» և «Սահմանադրական դատարանի մասին» ՀՀ սահմանադրական օրենքում լրացումներ և փոփոխություններ կատարելու մասին» ՀՀ օրենքների նախագծերի փաթեթը՝ Իմ Քայլի պատգամավոր Վահագն Հովակիմյանի հեղինակությամբ: Խոսքը Սահմանադրական դատարանի դեմ հերթական  ռեպրեսիվ ու հակասահմանադրական օրենքի մասին է: Բայց այս նյութում այդ մասին չէ, որ խոսելու ենք:

Նույն օրը՝ երեկոյան խորհրդարանի պաշտոնական կայքը հայտնեց, որ ՀՀ ԱԺ նախագահ Արարատ Միրզոյանի որոշմամբ, Ազգային ժողովի պատգամավորների նախաձեռնությամբ, 2020թ. փետրվարի 6-ին` ժամը 11.00-ին, կգումարվի Ազգային ժողովի արտահերթ նիստ` վերոհիշյալ նախագծերի առաջին և երկրորդ ընթերցման օրակարգով։ Հավանաբար, պարզելով, որ արտահերթ նիստի նշանակումը խախտում է «ԱԺ կանոնակարգ» ՀՀ սահմանադրական օրենքի պահանջները, նշված հայտարարությունը, հաջորդ օրը՝ հունվարի 31-ին հանվեց ԱԺ կայքից:

Խնդրն այն է, որ արտահերթ նիստ հնարավոր է հրավիրել միայն ԱԺ խորհրդի հաստատմամբ, մինչդեռ իշխանությունն այնքան է շտապում ՍԴ-ի ներկայիս կազմն ապօրինի հեռացնելու հարցում, որ նման հապճեպ որոշում է կայացրել, դեռ կասկածելի ՝ հավաքվել է պատգամավորների համապատասխան թվով ստորագրություն, թե ոչ: Համաձայն հաղորդագրության՝ ԱԺ նախագահը որոշում էր ընդունել արտահերթ քննարկման դրված նախագիծը քննարկել միանգամից առաջին և երկրորդ ընթերցումներով, ինչի իրավունքը չունի:
Կանոնակարգ օրենքը սահմանում է, որ նախագիծը միաժամանակ առաջին և երկրորդ ընթերցմամբ քննարկելու համար անհրաժեշտ է պատգամավորների կամ խմբակցության հիմնավորված միջնորդությունը, որը եւս պետք է հաստատվի ԱԺ խորհրդի նիստում:
Ավելի ուժ խորհրդարանի ղեկավարությունը պաշտոնապես ընդունեց, որ խախտում է թույլ տվել եւ Արարատ Միրզոյանը նոր որոշում ընդունեց՝ դրանով անվավեր ճանաչվելով իր կողմից ապօրինի ընդունված նախորդ որոշումը:

Հիշեցնենք, որ սա արդեն երկրորդ այսպիսի դեպքն է, երբ ԱԺ նախագահը անվավեր է ճանաչում իր կողմից ավելի վաղ ընդունված որոշումը կամ կարգադրությունը: Նախորդը ԱԺ աշխատակազմին ապօրինի ազատելու կարգադրություններն էին: Նշենք, որ
Արարատ Միրզոյանը ՀՀ ԱԺ միակ նախագահն է, որ անվավեր է ճանաչել իր որոշումները կամ կարգադրությունները: Իսկ պատճառը, կարծում ենք բոլորին է պարզ, ԱԺ-ում չկա գեթ մեկ մասնագետ, ով կտիրապետի տարրական իրավաբանական գիտելիքների, իսկ պատգամավորների մասին՝ խոսք չկա:

Անի Սահակյան