Ես այդ գեներալների ուսադիրները ցուցադրաբար կպոկեի.Արամ Մանուկյան

Ժողովրդավարության ազգային պլատֆորմի կազմակերպած «Պատերազմ եւ ընտրություններ» թեմայով քննարկման ժամանակ ՀԱԿ խմբակցության քարտուղար Արամ Մանուկյանը իր ելույթում նշեց. «Իրավիճակը լարված է, ամեն օր հնարավոր են բացասական զարգացումներ: Խաղի կանոնները, որոնք ոչ պատերազմական վիճակում գործում են, որոշ ձեւափոխումներ են ունենում, երբեմն պետք է աշխատեն դաշտային կանոններ:Ես ճիշտ չեմ համարում այն գեներալների ակտիվ գործընթացը, որոնք ՀՀ-ում տնտեսական մենաշնորհների մեջ են, բիզնեսներ են գողանում եւ իշխանությունները հանդուրժում են նրանց: Ես որ լինեի, այդ գեներալների ուսադիրները ցուցադրաբար կպոկեի: Ես որ լինեի, Միհրան Պողոսյանին շնորհակալություն չէի հայտնի իր աշխատանքի համար»: «Եթե պատերազմական վիճակ է, չի նշանակում, թե ընտրությունների հետ կապված մենք չպետք է պայքարենք իրենց 5 կետերի համար:  Ինձ զանգում են մեր տղաները, որոնք դիրքերում են եւ խնդրում են լուծել իրենց վարկերի հարցը: Ես չեմ կարող լուծել այդ հարցը, իրենք ամեն ամսի 15-ին մուծումներ են անում, հիմա դիրքերում են եւ անորոշություն է: Իշխանությունները պետք է լուծեն այդ հարցը, պետք է ավելի կոշտ կանոններ աշխատեն: Պոռոտախոսությամբ, թուրքին հայհոյելով՝ սահման չեն պահում: Ուժեղ Հայաստան է պետք՝ կանխատեսելի տնտեսություն, արտաքին դիվանագիտական հարաբերություններում բարեկամների քանակի աճ, ներսում վստահելիություն, մարդու իրավունքների պաշտպանություն, կանխատեսելիություն: Սա՛ է ուժեղ Հայաստանը: Կունենանք ուժեղ Հայաստան՝ կունենանք ուժեղ Ղարաբաղ, թե չէ ԱԺ խոսափողները քրտնացնելով չի, սա՛ է հարցի լուծումը»,-հայտարարեց նա: