Արմեն Սարգսյան, հասարակությունը հիվանդ է, իսկ Դուք լռում եք. Արամ Գ. Սարգսյան (video)
Ըստ «Դեմոկրատական» կուսակցության նախագահ Արամ Սարգսյանի՝ պետության համար շատ կարևոր է հասկանալ՝ ինչը դրդեց ԱԱԾ նախկին տնօրեն Գեորգի Կուտոյանին՝ ըստ նախնական վարկածի գնալ ինքնասպանության։ Այս մասին Անժելա Թովմասյանի՝ «Արմնյուզ» ՀԸ եթերում հեռարձակվող հեղինակային «Հայելու առաջ» հաղորդաշարի ժամանակ ասել է Սարգսյանը։
Նրա դիտարկմամբ՝ երկրում ձևավորվել է այնպիսի մթնոլորտ, որը հանգեցնում է նման ողբերգական դեպքերի․ «Ընտանիք, երեխա ունեցողը մարդը հենց այնպես նման քայլի չէր դիմի»։
Հաղորդման մյուս հյուրը՝ մեդիափորձագետ Տիգրան Քոչարյանը նախ ներողություն է խնդրել Գեորգի Կուտոյանի ընտանիքից․ «Շատ եմ ցավում, որ այս օրերին տեսանք դիակապտություն»։
Տիգրան Քոչարյանի խոսքով՝ 2018թ․ ապրիլից ձևավորված մթնոլորտը մարդկանց հասցնում է դեպրեսիայի և հավատալի է ՔԿ-ի տարածած հաղորդագրությունը Գեորգի Կուտոյանի մահվան վերաբերյալ։
Դիտարկմանը՝ սթափության կոչեր են հնչում, բայց դրան անմիջապես ագրեսիվ ձևով են արձագանքում, Տիգրան Քոչարյանն ասել է, որ ԱԱԾ նախկին տնօրեն Արթուր Վանեցյանի «Կանգ ա՛ռ»-ի կոչը եթե լսեին, Գեորգի Կուտոյանը գուցե ողջ լիներ։
Հարցին՝ համակարծի՞ք եք այն տեսակետի հետ, որ երկրում տիրում է նաև վախի մթնոլորտ, որն էլ հանգեցրեց բարձրաստիճան պաշտոնյաների մահերին՝ Արամ Սարգսյանը պատասխանել է, որ իշխանությունը միշտ էլ վախեր ունեցել է և ունի․ «Իշխանությունը պարտադրված է կատարելու մի քանի քայլեր՝ «Ստամբուլյան» կոնվենցիայի վավերացում, Ամուլսարի հանքի շահագործումն ու երրորդ թիրախը Սահմանադրական դատարանն է։ Սակայն Նիկոլ Փաշինյանը որքանո՞վ է վստահ, որ դրսից ֆինանսավորում ստացողները մշտապես իրեն աջակցելու են, քանի որ կա մի ճշմարտություն՝ դրսից գումար ստացողները դրսի ագենտներ են»։
Տիգրան Քոչարյանը համոզված է՝ իշխանությունն ում կարողացել է վախեցնել, վախեցրել է, այլևս վախեցողներ չկան։
Խոսելով ներքաղաքական իրավիճակից, նախկին ղեկավարներին սրիկաների ու դավաճանների պիտակավորումներ տալուց՝ Արամ Սարգսյանն ասել է, որ պարզապես պետք էր քաղաքական ու իրավական գնահատական տալ նախկին իշխանություններին․ «Չի կարելի մի օր լավ գործ անել, հաջորդ օրը մի քանի վատ գործ։ Պարզապես պետք էր, որ նախկինների արածներն արժանանային քաղաքական ճիշտ գնահատականի»։
Տիգրան Քոչարյանը կարծում է, որ երկիրը դարձել է «ջայլամային» երկիր․ «Ամբողջ երկիրն ապրում է տվյալ օրով։ Ամեն օր ինչ-որ բան է տեղի ունենում, և մյուս օրը մոռանում են՝ ինչ է տեղի ունեցել նախորդ օրը»։
Հետևեք մեզ Viber-ում
