Պողոսներ, վայելե՜ք

Հունվարից ակտիվացել են գազի գնի հնարավոր թանկացման մասին խոսակցությունները: Այդ մասին արդեն կցկտուր խոստովանում են նաեւ պատասխանատու պաշտոնյաները, ոմանք հորդորում են մեծ ողբերգություն չսարքել դրանից: Մամուլում նշվում են տարբեր թվեր՝ սկսած 20 տոկոսից մինչև 40, առավել իրատեսականը այս պահի դրությամբ՝ 30 տոկոսն է:

Հիշեցնենք, որ դեռևս ընդդիմադիր Փաշինյանը ժամանակին ԱԺ ամբիոնից անընդհատ նախկին իշխանություններին քննադատելով բարձրաձայնում էր գազի գնի բարձրացման փաստը` շեշտելով, թե «էդ ինչպե՞ս է լինում, որ գործընկերն ու դաշնակիցն ամենաթանկ գներով է Հայաստանին մատակարարում գազ»: Ավելին, նա կոռուպցիոն ինչ-որ շղթա էր կարծես բացահայտել. «ՀՀ-ում տարբեր օլիգարխների գազալցակայանների լևի խողովակների» մասին:

Հեղափոխությունից հետո մենք ոչ միայն չտեսանք, թե ինչպես են պատժվում այդ հայտնի կոռուպցիոներները, ոչ միայն այս հարցով քննություն չսկսվեց, սրան գումարած՝ Նիկոլ Փաշինյանին էլ չհաջողվեց անգամ ոչ միայն գազի գինը նվազեցնել, այլ գոնե պահել ներկայիս մակարդակին, փոխարենը տեսնում ենք ճիշտ հակառակը, որ գազի գինը մոտ ապագայում կբարձրանա:

Հիշեցնենք, որ Հայաստանը դեռեւս 2018-ից թանկացած գազ է գնում: Նախկին 150 դոլարի փոխարեն 1000 խորանարդ մետրի համար գազի գինը բարձրացել է մինչև 165 դոլար: Սակայն վարչապետ Նիկոլ Փաշինյանը հայտարարում էր, որ այդ թանկացումը հասարակ քաղաքացիների վրա չի անդրադառնա առնվազն մինչեւ 2020 թվականի գարուն: Գարունը սարերի ետեւում չէ ու կյանքը ցույց է տալիս, որ Նիկոլ Փաշինյանի՝ նախկինների ու նրանց <<կոռուպցիաների>> մասին հերթական փոչիկն է տրաքում: Կարելի է հերթական աչքալուսանքը տալ հպարտ պողոսներին, ի վերջո, նրանք հենց սրա համար էին պայքարում, որ գազի գինը իջեցնելու մասին խոստումներ տվող Նիկոլ Փաշինյանը թանկացներ այն:

Անի Սահակյան