Ատելության իշխանությունը հարձակվում է իր միակ ընդդիմության՝ ազատ խոսքի վրա․ Միհրան Հակոբյան (video)

Հայաստանում այսօր չկա քաղաքական ընդդիմություն և միակ ընդդիմությունը Հայաստանում խոսքի ազատությունն է: Չունենալով այլընտրանք՝ այսօր իշխանությունը հարձակվում է ազատ խոսքի վրա: Այս մասին այսօր Անժելա Թովմասյանի՝ «Արմնյուզ» ՀԸ եթերում հեռարձակվող հեղինակային «Հայելու առաջ» հաղորդաշարի ժամանակ ասել է հասարակական–քաղաքական գործիչ Միհրան Հակոբյանը:

Նրա գնահատմամբ՝ այսօր լրատվամիջոցներն են ներկայացնում այն ճշմարտությունը, որը շեշտակիորեն տարբերվում է այն տեղեկատվությունից, որը հիմնականում ներկայացնում է վարչապետը՝ իր ֆեյսբուքյան էջում:

Հաղորդման մյուս հյուրը՝ «Ժուռնալիստների միության» նախագահ Սաթիկ Սեյրանյանը, չի կիսում Միհրան Հակոբյանի այն տեսակետը, որ Հայաստանում միակ ընդդիմությունը մնացել է մամուլը. «Իշխանափոխությունից անմիջապես հետո նախկին իշխանությունն ու այդ իշխանության մի շարք անհատներ արտահայտվում էին՝ հարվածներ ընդունելով իրենց վրա»:

Նրա խոսքով՝ բոլոր իշխանությունները շատ կարճ ժամանակում կտրվում են իրականությունից և սկսում են տուրք տալ այն տեղեկատվությանը, որն իրենց է հաճելի, և, որը Նիկոլ Փաշինյանի իշխանության մոտ շատ արագ ստացվեց:

«5-րդ» հեռուստաալիքի գործադիր տնօրեն Հարություն Հարությունյանը նկատում է, որ դեռ մեկ տարի առաջ այն հարձակումը, որն իրականացվում էր իրենց հեռուստաընկերության դեմ, էականորեն տարբերվում է այն տրամադրվածությունից, որն այսօր կա իրենց նկատմամբ. «360 աստիճանով փոխվել է հասարակության վերաբերմունքը մեր նկատմամբ, որի մասին իշխանությունը տեղյակ է և այս ամենն անընդունելի է իրենց համար»:

Հարություն Հարությունյանը համոզված է, որ «5-րդ» հեռուստաալիքի սեփականատեր Արմեն Թավադյանը չի դատվելու, բայց միևնույն է՝ իշխանությունն ամեն ինչ անում է, որպեսզի դժվարացնի իրենց հեռուստաընկերության աշխատանքը:

Խոսելով Նիկոլ Փաշինյանի ընտանիքի, մասնավորապես դստեր՝ Մարիամ Փաշինյանի ու ԱԱԾ նախկին պետ Արթուր Վանեցյանի հեռակա բանավեճից, Սաթիկ Սեյրանյանն ասել է, որ Մարիամ Փաշինյանի գրառումներն իշխանության վախերն են. «Նիկոլ Փաշինյանը հասկանում է, որ իր ռեյտինգն ընկել է, հասկանում է՝ ինչ խմորումներ են տեղի ունենում իր թիմի ներսում, դրա համար էլ չափահաս, բայց, այդուհանդերձ, երեխաներին է օգտագործում»:

Միհրան Հակոբյանը հռետորական հարց է բարձրացնում՝ նորմա՞լ է, որ վարչապետի ընտանիքին պատկանող լրատվական թերթը գրում է հոդված, որն էլ Դատախազությունը հիմքը ընդունելով՝ սկսում է քայլեր իրականացնել: