Բացառված է՝ որևէ մեկը «պլստա»․ Լիլիթ Թումանյան (video)
Իշխանությունը կեղծ օրակարգ է ձևավորում, որպեսզի հանրության ուշադրությունը շեղի կարևորագույն հարցերից: Այդ օրակարգի մասն էին կազմում՝ Մարիամ Փաշինյանի ու ԱԱԾ նախկին տնօրեն Արթուր Վանեցյանի երկխոսությունը, Նիկոլ Փաշինյանի լուսանկարը քննիչի հետ: Այս մասին Անժելա Թովմասյանի՝ «Արմնյուզ» ՀԸ հեռարձակվող հեղինակային «Հայելու առաջ» հաղորդաշարի ժամանակ ասել է «Ադեկվադ» միաբանության անդամ Լիլիթ Թումանյանը:
Ըստ Լիլիթ Թումանյանի՝ ԱԱԾ նախկին տնօրենը շատ լավ հասկանում էր, որ պաշտոնը թողնելուց հետո որոշակի ռիսկերի է բախվելու:
Հաղորդման մյուս հյուրի՝ հոգեբան Միհրդատ Մադաթյանի դիտարկմամբ՝ ձերբակալությունների շոուներն այլևս արդյունավետ չեն. «Նիկոլ Փաշինյանը կամ պետք է իրեն ձերբակալի, կամ էլ Աննա Հակոբյանին, որպեսզի էֆեկտիվ շոու լինի»:
Հոգեբանի կարծիքով՝ Նիկոլ Փաշինյանի հարցաքննվելն ու քննիչի հետ լուսանկար հրապարակելն այդ շոուի մասն էր:
Անդրադառնալով Արթուր Վանեցյանի ու Մարիամ Փաշինյանի երկխոսությանը՝ Միհրդատ Մադաթյանն ասել է, որ Վանեցյանն այսօր չի խոսում, որովհետև իր՝ սպայի պատիվը թույլ չի տալիս. «Նիկոլ Փաշինյանը դրդում է, որ Արթուր Վանեցյանը խոսի, բայց քանի որ Վանեցյանն առաջնորդվում է պետության շահերով, դրա համար իրեն թույլ չի տալիս խոսել»:
Դասախոս, նախկին ՔՊ-ական Արթուր Համբարձումյանի գնահատմամբ էլ՝ Հայաստանի առջև այսօր ծառացած են բազում սոցիալական, քաղաքական խնդիրներ, մինչդեռ իշխանությունն ու ընդդիմությունը, բան ու գործ թողած այլ հարցերով են զբաղվում. «Եթե Արթուր Վանեցյանը տիրապետում է այնպիսի տեղեկության, որը վտանգ է ներկայացնում պետության համար, ապա նա պետք է անպայման խոսի»:
Միհրդատ Մադաթյանի կարծիքով մենք մոտ երկու տարի է ապրում ենք սերիալում. «Այսօր Մարիամիկի էմոցիոնալ գրառումն առավել մեծ արձագանք է ստանում, քան Մարալիկի ծննդատան փակումը. սա նշանակում է, որ մենք «Սանտա Բարբարայի» մեջ ենք»:
Խոսելով հանրապետության մի շարք ծննդատների փակվելու ու աշխատակիցների բողոքի ակցիաներից՝ հոգեբանը հորդորում է վերականգնել «տատմերների» ինստիտուտը. «Նույնիսկ ադրբեջանցի հղի կինն է սուրբ: Ծննդատներ փակելով տեսնում եմ ծնելիության միտումնավոր իջեցում»:
Լիլիթ Թումանյանն էլ ցավով նշում է, որ ծննդատների փակումը բերելու է մանկական մահացությունների թվի աճ. «Ունենալու ենք գյուղերի հայաթափում, բնակչության թվի կրճատում»:
Հետևեք մեզ Viber-ում
