Գեներալ Մանվելի գործով ցուցմունքներ կլինեն, թե ինչու ավելի վաղ ազատ արձակման որոշում չեն կայացրել

Գեներալ Մանվել Գրիգորյանը դատարանի որոշմամբ կալանքից ազատ է արձակվել: Դատարանը նման որոշում է կայացրել` հաշվի առնելով նրա օրեցօր ավելի վատթարացող առողջական վիճակը, որը վաղուց անհամատեղելի էր կալանավայրի և քրեակատարողական հիմնարկի հիվանդանոցային պայմանների հետ: Մանվել Գրիգորյանը երկու օր առաջ «Երևան-Կենտրոն» ՔԿՀ-ից տեղափոխվել է «Նաիրի» ԲԿ, գտնվում է վերակենդանացման բաժանմունքում` անգիտակից վիճակում: Ըստ էության այն, ինչ կատարվել է Մանվել Գրիգորյանի հետ վերջին մեկուկես տարում, խոշտանգում է մարդու իրավունքի միջազգային նորմերի տեսանկյունից: Բժշկական ցուցումներով` Մանվել Գրիգորյանը, հնարավոր է, չկարողանա դուրս գալ հիվանդության կրիզիսից: Եթե նա իր մահկանացուն կնքեր բանտում, իշխանությունը ստիպված էր լինելու ստանձնել խոշտանգման պատասխանատվությունը: Հենց այս պատճառով էլ դատարանին ամենաբարձր մակարդակով հրահանգ է տրվել` նրան ազատ արձակել կենդանության օրոք: Բայց սա ամենևին չի նշանակում, թե տեղի ունեցած խոշատնգման փաստը երբևէ տեղական կամ եվրոպական դատարանում չի կարող հաստատվել: Առողջական խնդիրների մասին հետազոտությունների արդյունքները միշտ կարելի է ներկայացնել դատարան և անգամ հետմահու վիճարկել կալանքի իրավաչափությունը: Ընդ որում, Մանվել Գրիգորյանին առաջադրված մեղադրանքը դատարանի որոշմամբ դեռևս ապցուցված չէ: Նրա հետ կապված դատական բոլոր նիստերը վերաբերել են բացառապես կալանքին, իսկ առաջադրված մեղադրանքի բուն դատավարական փուլը դեռևս չի սկսվել: Հայտնի տուշոնկա-շոուից հետո փաստարկված տեղեկատվություն և ապացույցներ, այդպես էլ չներկայացվեցին: Բայց եթե անգամ նա մեղավոր է, քանի դեռ չկա դատարանի որոշում, իսկ փոխարենը ակնհայտ է, որ ի սկզբանե կային առողջական լուրջ խնդիրներ, նրան կալանքի տակ պահելը հանցագործություն էր: Մանվել Գրիգորյանի գործը քննող դատավորները, դատախազներն ու քննիչները, ինչպես նաև բժշկական հանձնաժաղովի այն անդամները, ովքեր ստիպված կամ պարտադրված եզրակացություն էին տալիս, թե նրա առողջությունը համատեղելի է եղել կալանավայրի հետ, գուցե մի օր ցուցումունքներ տան, թե իրենք ինչու ավելի վաղ գեներալին չէին ազատում կալանքից: Ի վերջո, կյանքը բումերանգ է: Խոսակցություններ կան, որ Մանվել Գրիգորյանի դեմ պահանջ է դրվել` ցուցմունք տալ Ռոբերտ Քոչարյանի դեմ` Մարտի 1-ի գործով, որին նա չի համաձայնվել: Տվյալ պարագայում անգամ կարևոր չէ, թե որքանով են այս խոսակցությունները համապատասխանում իրականությանը: Փաստն այն է, որ հայ մարդը, ով մեծ ավանդ է ունեցել արցախյան ազատամարտում, մարդու իրավուքնների կոպտագույն խախտմամբ պահվել է բանտում: Զրկված լինելով անհրաժեշտ բուժումից` ի վերջո հասել է մահվան եզրին: Սա չափազանց ծանր բեռ է պետության համար: Իշխանության մեծագույն արժանիքը հումանիզմն է, ոչ վրեժխնդրությունը, իսկ պատմության հետ առերեսվելու խնդիր ամեն դեպքում կլինի:
Առողջություն գեներալին:

Հայկ Դավթյան