Թուրքիայի խորհրդարանում իմ դեմ կատարված հարձակումը ծրագրված էր. Գարո Փայլան

Թուրքական Bianet.org կայքի փոխանցմամբ՝ երեկ Թուրքիայի խորհրդարանի՝ Սահմանադրության հաշտեցման հանձնաժողովի նիստում բռնկված զանգվածային ծեծկռտուքից հետո ամենաշատը քննարկված անուններից մեկը դարձել է քրդամետ «Ժողովուրդների դեմոկրատական» կուսակցության (ԺԴԿ) հայ պատգամավոր Գարո Փայլանի անունը: Փայլանը լրատվամիջոցի հետ զրույցում հայտարարել է, որ 10-15 մարդ ցանկացել են Լինչի դատաստանի ենթարկել իրեն, և որ այդ հարձակումը եղել է ծրագրված, և հաշվի է առնվել իր հայկական ծագում ունենալը: Փայլանը երեկվա դեպքերի հետ կապված հայտնել է, որ միայն իր անհամաձայնությունն է հայտնել իշխող «Արդարություն ու զարգացում» կուսակցության (ԱԶԿ) պատգամավորներին, ինչից հետո նրանք սկսել են հարձակվել իր վրա. «Ես նրանց միայն ասացի՝ ոչ, դա այդպես չէ»: Փայլանն ակնհայտ է համարել, որ եղել է թիրախում՝ նշելով, որ 20-30 վայրկյանում ստացել է մոտ 100 հարված, և բացի այդ՝ իր հանդեպ կիրառել են ռասիստական, ատելություն քարոզող արտահայտություններ: Փայլանը հիշեցրել է, որ ծեծկռտուքի ժամանակ ԱԶԿ-ական պատգամավորները շարունակ վանկարկել են՝ «Գարոն այստեղ է, Գարոն այստեղ է …», և դրանով իսկ մյուս պատգամավորներին կոչ արել գալ և հարվածել իրեն: 1in.am