Մեզ պարտադրել են՝ սկուտեղի վրա մատուցելով Նիկոլին.քննարկում (video)

Իմ խորին համոզմամբ՝ 2019թ.-ը Հայաստանի պատմության մեջ մտնելու է ամենաակտիվ քաղաքական ու քաղաքացիական իրադարձությունների տարի: Այս մասին Անժելա Թովմասյանի՝ «Արմնյուզ» ՀԸ հեռարձակվող հեղինակային «Հայելու առաջ» հաղորդաշարի ժամանակ ասել է քաղաքագետ Նարեկ Սամսոնյանը՝ ամփոփելով անցնող տարին: Նրա դիտարկմամբ՝ տարին ստացված էր, քանի որ ընդդիմադիր բևեռ ձևավորելու հարցում ինստիտուցիոնալ շինարարությունը գրեթե ավարտին է հասցված, գալիք՝ 2020թ.-ը քաղաքական լուրջ եռուզեռի տարի է լինելու:

Հաղորդման մյուս հյուրը՝ բժիշկ Մարինա Խաչատրյանը, կիսում է Նարեկ Սամսոնյանի կարծիքը. «2019թ.-ն իրոք դրական տարի էր, քանի որ պատռվեցին շատերի դիմակները և մենք հասկացանք՝ ով, ով է»: Նրա խոսքով՝ տարին լյուստրացիոն էր, իսկ գալիք տարում պետք է ազատվել կեղտից:

Քաղաքագետ Մենուա Հարությունյանի դիտարկմամբ՝ Նիկոլ Փաշինյանի ու իր «թայֆայի» համար տարին հաջողված էր. «Մարդիկ, ովքեր տարվա մեջ մի քանի անգամ իրենք իրենց պարգևատրել են՝ պետական բյուջեն օգտագործելով անձնական նպատակներին ծառայեցնելու համար, ամփոփելով տարին՝ կտեսնեն, որ իրենց համար այն հաջողված էր»:

«Այլընտրանքային քաղաքապետարան» նախաձեռնության ղեկավար Սոնա Աղեկյանն էլ նշում է, որ Նիկոլ Փաշինյանը լեգիտիմ ընտրված վարչապետ չէ, նրան պարզապես սկուտեղի վրա մատուցեցին մեր ժողովրդին:

Հարցին՝ չե՞ք վախենում, որ հերթական դատական հայցը կներկայացնեն Ձեր դեմ, քանի որ շարունակաբար բավականին կոշտ քննադատության եք արժանացնում իշխանություններին, Սոնա Աղեկյանը պատասխանել է, որ չի պատրաստվում դատական հայցերի պատճառով լռել ու չբարձրաձայնել ապօրինությունների մասին:

Նարեկ Սամսոնյանն էլ նշել է, որ իր դեմ դատական հայց է ներկայացրել անգամ ՀՀ ԱԺ նախագահ Արարատ Միրզոյանը. «Այսպիսով կարող ենք փաստել, որ Հայաստանում խոսքի ազատությունը տեռորի է ենթարկվում»: Նրա խոսքով՝ իրենց նմանատիպ քայլերը չեն վախեցնում, բայց կլինեն մարդիկ, ովքեր կվախենան քննադատել իշխանությանը, քանի որ իրենց գուցե դրա համար դատի տան ու շատ մեծ գումար պահանջեն:

Մենուա Հարությունյանն էլ պնդում է, որ Նիկոլ Փաշինյանը չի կարող իր ընդդիմախոսներին վախեցնել՝ դատի տալով. «Նիկոլը կարող է բոլորիս դատի տալ, կալանավորել, քանի որ, եթե անգամ մենք նստենք, մեկ է՝ ժողովուրդը լավ չի ապրելու»: