Քարերը հավաքելու և փոթորիկ հնձելու ժամանակը
Կառավարության բակում նախօրեին հրմշտոց է տեղի ունեցել ոստիկանների և բանակում մահացած զինվոր Արթուր Աջամյանի հարազատների միջև։
Հարազատները պահանջում են հանդիպում ՀՀ վարչապետ Նիկոլ Փաշինյանի հետ։ Այդ հրմշտոցի ընթացքում մահացած զինվորի նկարը կոտրվել է: Հետո արդեն հարազատները փակել են դեպի Հանրապետության հրապարակ մտնող ճանապարհը: Ոստիկանության զգուշացումները, թե չբացելու դեպքում ուժ կկիրառվի, արդյունք չեն տվել, ավելին` բողոքավորները սպառնացել են փալել նաև երկաթգիծը: Ազգությամբ եզդի զինծառայողի հարազատները դժգոհել են ԱԺ պաշտպանության և անվտանգտության հարցերով մշտական հանձնաժողովի նախագահ Անդրանիկ Քոչարյանին, որը նրանց նախապես ինչ-որ խոստումներ է տվել, իսկ հետո, բողոքավորների խոսքով, անգամ հեռախոսազանգերին էլ չի պատասխանում: Իրավիճակը հանդարտվել է միայն, երբ վարչապետ Նիկոլ Փաշինյանն ընդունել է հարազատներին: Արթուր Աջամյանի պապը վարչապետից պահանջել է` բացահայտել իր թոռան սպանության մեղավորներին: Նա ասել է, որ ինքը դիահերձման ժամանակ ներկա է եղել և տեսել է, որ թոռան մարմնի վրա բռնության հետքեր կան. «2 ժամ 40 րոպե է տևել դիահերձումը։ Այդ գործողություններից հետո ինձ մոտեցավ բժիշկն ու ասաց՝ հայրիկ ջան դու քա՞ր ես, էս ի՞նչ է կատարվում։ Ասեցի՝ եկել եմ իմանամ՝ թոռանս հետ ի՞նչ է եղել իրականում։ Մարմնի վրա հետքեր կար, աջ ուսի վերին հատվածում կար բռնության հետքեր, բայց հին էր, աջ ոտքինը եւ ձախ ոտքինը՝ նոր էր, ճակատին էլ կար. ես քարացել էի»։
Փաշինյանն ասել է, որ այս գործի հետ կապված իրեն զեկուցվել է, որ դիակի վրա բռնության հետքեր չկան: Հարազատները, սակայն, հակառակն են պնդել` ասլով, որ գործն ուղղորդվում է ՊՆ-ի կողմից` կոծկելու նպատակով: Նիկոլ Փաշինյանը խոստացել է` ապահովել արդար դատաքննություն: Արթուր Աջամյանի մահվան դեպքը միակը չէ, և նման բողոքավոր խմբեր առաջիկայում ևս կարող են հայտնվել կառավարության շենքի մոտ: Ի՞նչ է անելու Փաշինյանը` նրանց բոլորի հետ առանձին հանդիպումնե՞ր է ունենալու: Նախ սկսենք նրանից, որ այս հանդիպումները ամենևին էլ չեն նշանակում, թե մահացած զինվորների հարազատների դժգոհությունը բավարարվեց: Սա իրավական խնդիր է, որի մեջ մտնելը վարչապետի համար հավելյալ հարված է: Ավելին` արդար դատաքննության խոստումը պահելը շատ դժվար և, որ ամենակարևորն է, վարչապետի գործառույթներից դուրս գտնվող հարց է: Թերևս հենց այս նկատառումով էլ վարչապտն ի սկզբանե չէր ուզում ընդունել զինծառայողի հարազատներին: Բայց ինչպես ասում են` եկել է նետած քարերը հավաքելու և քամի ցանելուց հետո փոթորիկ հնձելու ժամանակը:
Նախ կառավարության շենքի մոտ պարբերաբար տեղի ունեցեղ բողոքի ակցիաները հաճախ ցույց են տալիս, որ հեղափոխական իշխանությունը բազմաթիվ հարցերում կրկնում է նախկինների վարքագիծը, և սա ունի շատ օբյեկտիվ պատճառներ: Կան հարցեր, որոնց լուծման բանալին ամենևին էլ վարչապետի կաբինետում չի գտնվում: Ի վերջո վարչապետի կաբինետ մտնելուց հետո զինծառայողի հարազատների բողոքն ամենևին էլ դրական ընթացք չստացավ, բայց իր կամքից անկախ` վարչապտը դարձավ այդ խնդրի պատասխանատուն: Իսկ եթե վարչապետը մեկին ընդունեց, ստիպված է լինելու ընդունել բոլորին: Ցանկացած մարդ, ով ինչ-որ խնդիր ունի, գալու է թակի վարչապետի դուռը և պահանջի, որ, օրինակ, Փաշինյանը անհապաղ լուծում տա իր երեխայի բուժման, իրենց գյուղի դպրոցի կոռումպացված տնօրենի հեռացման և անգամ հավերի ածը խթանելու հարցին: Հակառակ պարագայում հնչելու են սպառնալիքներ, թե փողոցները կփակեն: Ինչպես են այս բոլորի տակից դուրս գալու կառավարությունն ու նրա ղեկավարը: Պուպուլիստաբար մեծ-մեծ խոսելը հեշտ է, բայց կոնկրետ մարդու կոնկրետ հարցին լուծում տալը շատ ավելի բարդ է:
Հայկ Դավթյան
Հետևեք մեզ Viber-ում
