Իշխանության ֆավորիտը վարչապետական ընտանիքի հետքերով

Հայաստանի ֆուտբոլի ֆեդերացիան այսօր նախագահ ընտրեց Արմեն Մելիքբեկյանին: Հհետեւելով այսօրվա եւ առհասարակ վերջին շաբաթների իրադարձություններին, անշուշտ դժվար է այն համարել ընտրություն, ամեն բան նախապես ծրագրված էր ու արդյունքն էլ նախապես կանխորոշված, քանի որ Մելիքբեկյանը համարվում է վարչապետական ընտանիքի մտերիմը, նրանց կողմից առաջադրված թեկնածուն, նա զբաղեցնում էր թե՛ ՀՖՖ առաջին փոխնախագահի և թե՛ ՀՖՖ գլխավոր քարտուղարի պաշտոնները:

Հիշեցնենք, որ նոյեմբերին Արթուր Վանեցյանը հրաժարվեց նախագահի պաշտոնից: Այս իրավիճակը ստեղծվեց Պալերմոյում կայացած Իտալիա - Հայաստան հանդիպումից հետո, որն ավարտվեց իտալացիների խոշոր հաղթանակով՝ 9:1: Ֆուտբոլային հանրությունը «խայտառակ» որակեց այդ պարտությունը եւ գործկոմի նիստից հետո Վանեցյանը հայտարարեց հրաժարականի մասին, որն ավելի շատ քաղաքական թիմի պարտադրանք էր:

Նախագահի պաշտոնի համար պայքարում էին 2 թեկնածուներ՝ ֆեդերացիայի գլխավոր քարտուղար Արմեն Մելիքբեկյանը և «Լոռի» ֆուտբոլային ակումբի ղեկավար, գործարար Թովմաս Գրիգորյանը: Կար նաև երրորդ թեկնածուն՝ «Արարատի» նախկին ֆուտբոլիստ Խորեն Հովհաննիսյանը, բայց նրա թեկնածությունը ներկայացրած «Անի» ֆուտբոլային ակումբը օրերս հայտարարեց, որ հանում է նրա թեկնածությունը և ընտրություններում աջակցելու է Արմեն Մելիքբեկյանին:

Մինչ այս քվեարկություններին անցնելը ֆեդերացիան կասեցրեց այն կազմակերպությունների մասնակցությունը ֆեդերացիային, որոնց ֆուտբոլային գործունեություն չծավալելու պատճառով ներկայացրել էին անդամակցության սառեցման:
Այդ կազմակերպությունների թիվը 11-ն էր, և նրանք սպասվող քվեարկություններին չմասնակցեցին: Թեկնածուներից Թովմաս Գրիգորյանը քվեարկությունից ժամեր անց ահազանգեց ճնշումների մասին, հայտարարելով, թե ՀՖՖ անդամ կազմակեերպություններին զանգել են եւ հորդորել փոխել պատվիրակներին ու հետեւաբար քվեարկությունը:

Մամուլը մի քանի ամիս է գրում է, որ Արմեն Մելիքբեկյանը չի համապատասխանում ՀՖՖ նախագահի համար սահմանված կանոնադրական պահանջներին, ուստի՝ նրա թեկնածությունն ընդունվել է ՀՖՖ Կանոնադրության խախտմամբ, և նրա նախագահ ընտրվելը ևս տեղի կունենա Կանոնադրության խախտմամբ։ Հատկանշական է, որ նոր ղեկավարը նախապես ծրագրել է նաեւ իր թիմը եւ գործկոմից դուրս թողեցին «անհնազանդ» անդամներին, այդ թվում՝ Հենրիխ Մխիթարյանի մորը՝ Մարինա Թաշչյանին. «Խայտառակություն էր։ Ճիշտն ասած չէի ուզում խոսել, որոշել էի լռել, բայց չեմ կարող լռել, պետք է խոսեմ։ Ամեն ինչը նախապես պլանավորված էր, արված էր։ Ոչ ֆուտբոլային մարդիկ հնարավոր է չհասկանան՝ ինչ է կատարվում, բայց ես արդեն 40 տարի ֆուտբոլի մեջ եմ։ Այսպիսի խայտառակ բան ես դեռ չէի տեսել։ Նրանք ամեն ինչ արեցին, որ ես չհայտնվեմ գործկոմում, երևի ես իրենց խանգարում էի»,- ընտրությունից հետո լրագրողների հետ զրույցում ասել է Թաշչյանը։ Հարցին, թե հնարավոր է Խորեն Հովհաննիսյանի նկատմամբ ևս ճնշումներ եղած լինեն, Թաշչյանը պատասխանեց. «հնարավոր է, չեմ բացառում»։

Թաշչյանը արել է հայտարարություններ, որոնցից եւս պարզ է դառնում, որ Մելիքբեկյանը դեռեւս Վանեցյանի նախագահության ժամանակ է արտոնյալ եղել ՀՖՖ-ում: Թաշչյանը պատմել է, որ ինքը մեկ անգամ հավաքականի հետ Պալերմո է մեկնել և անծանոթ մարդկանց է տեսել, ովքեր մեկնել են հավաքականի հետ, նրանց թվում են եղել Մելիքբեկյանի զոքանչն ու աները: Նրա խոսքով՝ անընդունելի է, որ հավաքականի հետ նույն ինքնաթիռով այլ մարդիկ էլ են թռչում: «Անցած անգամ մեկնել են իր աները և զոքանչը, մեկ անգամ տուրիստներ: Ես ասել եմ Մելիքբեկյանին, որ սա սխալ որոշում է»,-ասել է Թաշչյանը:

Փաստորեն, ոչ միայն վարչապետի ընտանիքում է ընդունված ավանդույթ, որ ինքնաթիռը չթողնեն դատարկ թռչի, այլեւ նրանց մերձավորների:
Մխիթարյանի մայրն էլ է փաստել, որ ընտրություններն անցել են խախտումներով՝ մատնանշելով, թե Մելիքբեկյանի շտաբը ՀՖՖ շենքում էր: Թաշչյանի խոսքով՝ Վանեցյանի օրոք ամեն ինչ շատ սահուն էր անցնում: Չնայած դրան՝ ՀՖՖ գործկոմի նախկին անդամը միևնույն ժամանակ նշել է, որ Վանեցյանը շատ զբաղված էր, և ֆուտբոլի ֆեդերացիան ղեկավարել են երկու հոգի՝ քարտուղարներ Արմեն Մելիքբեկյանը և Արմեն Նիկողոսյանը:

Անի Սահակյան