SOS. Փաշինյանի ընտանիքը տառապում է

Մի քանի օր է լայն զանգվածներում խռովահույզ կրքեր են բորբոքվել վարչապետի դստեր՝ Մարիամի համար բյուջեի հաշվին գնված ամենագնացի թեմայով: Չնայած այն բանի, որ իշխանական ֆեյքերն ու ֆեյքուհիներն ամեն ինչ արեցին՝ արդարացնելու կատարվածը, թե բա օրենքն է պարտադրում հոգալ ոչ միայն պետական պաշտոնյաների, այլեւ նրանց ընտանիքի անդամների անվտանգություն, մոռանալով, որ պողոսներից բացի այս երկրում օրենք կարդացողներ եւ այն հասկացողներ էլ կան: Իսկ օրենքը երբեք ու երբեք չի պարտադրում, ճիշտ հակառակը՝ թողնում է պաշտոնյայի կամքին: Եւ քանի որ թեմա լայն քննարկման ենթարկվեց ու ակնհայտ էր, որ բացեց պողոսներից շատերի աչքերը, ովքեր հույսով սպասում են, որ ահա, հեսա վարչապետն իր ընտանեկան կարիքների փոխարեն մի քիչ էլ իրենցով կզբաղվի, դրա մասին հարկ համարեցին խոսել թե Փաշինյանը, թե կինը՝ մատնելով, որ ամեն բան այնքան էլ սովորական ու ընդունելի չէ, որքամ փորձում էին հրամցնել: Փաշինյանը «լայվ» մտնավ ու ինչ-որ անհասկանալի պարզաբանումներ ներկայացրեց, ասելով, որ
Մարիամին սպասարկող ՊՊԾ ավտոմեքենայի գնման պայմանագիրը կնքվել է 2018 թվականի ապրիլի 6-ին: «Կարեւոր նորություն ՊՊԾ արխիվից. «վարչապետի դստեր ավտոմեքենան» գնելու պայմանագիրը կնքվել է 2018 թվականի ապրիլի 6-ին, երբ Մարիամ Փաշինյանը պոտենցիալ բանտարկյալի դուստր էր, ոչ թե վարչապետի: Սա նրանց համար, ովքեր կասկածով են վերաբերվում այն պնդմանը, թե այդ մեքենան ՊՊԾ-ինն է, պետությանը, ոչ թե Մարիամ Փաշինյանինը»: Նախ անհասկանալի է, թե ինչու հազարավոր բառերի փոխարեն Փաշինյանը չհրապարակեց այդ մասին փաստող որոշումը, եւ վերջապես, եթե անգամ այդպես է, հեղափոխական ընտանիքը կարող էր հրաժարվել այդ մեքենայից:
«Nissan–գեյթի» թեմայով որոշակի պարզաբանումներ է տվել նաև Փաշինյանի կինը։
«Մեր երեխաները ջիփերի կարիք չունեն, մեր երեխաները թիկնապահների կարիք չունեն, պետական առանձնատան կարիք չունեն։
Շուշանը մինչև հիմա ամաչում է ընկերուհիներին հրավիրել մեր տուն, որովհետև չի ուզում տարբերվել նրանցից։
Աշոտը ամեն հանդիպման ժամանակ ասում է. «Մամ, հիշում ես չէ՞, որ ես բանակից գամ, իմ հետ «ախրանա» չի լինելու, երթուղայինով ու տաքսիներով եմ ման գալու», ու ես ընտանեկան մեծ վեճը հետաձգելու համար ամեն անգամ պատասխանում եմ՝ կգաս, կխոսենք, տղաս։ Մարիամը ռեժիմով լաց է լինում, որ չի կարող միայնակ մի տեղ գնալ և մշտապես ինչ-որ մարդկանց ուշադիր հայացքի ներքո է: Նա, ի դեպ, ասել է այդ մեքենան պետությանն է, որովհետև այդ մեքենան չի համարում իրենը, ոչ թե որովհետև իրեն համարում է պետությունը։
Արփին մի շաբաթ առաջ ինձ էլի ասաց, որ ուզում է մեր տուն գնանք, որովհետև իր այնտեղի խաղալիքներն է ուզում։ Խաղալիքները հետներս բերել ենք, կարծում եմ՝ դու հասկանում ես, թե երեխան ինչն է կարոտում»,–գրել է Աննա Հակոբյանն իր էջում:
Պատկերացնո՞ւմ եք՝ ինչպիսի տառապանքների միջով են անցնում մեր սիրելի վարչապետի ընտանիքի անդամները:
Բա, կարելի է թողնել, որ մեր փրկիչներն այսպես տառապեն, եթե իրենք չեն կարողանում
ազատվել այս ամենից, եկեք ինքներս կազմակերպենք այնպես, որ փոքրիկ Արփին վերադառնա տուն, Մարիամը ռեժիմով լավ չլինի եւ ոչ մեկ չտառապի:

Իսկ Աշոտի դեպքում ինչ որ բան ասելը դժվար է, նա դեռ բանակում է, բայց այնտեղ է ախրանայով ման գալիս եւ այդ մասին փաստող տեսանյութեր էլ կան: Իսկ եթե լուրջ, ապա Փաշինյանի ընտանքին ինքն է իրեն դրել ուշադիր հայացքների ներքո, նրանք իրենց կյանքը դարձրել են հանրային , իսկ Մարիամը ռեժիմով դաստիարակի առաքելություն է ստանձնել ու պարբերաբար դաստիարակչական գրառումներով հայտնվում է հանրության ուշադրության ներքո՝ տպավորություն ստեղծելով, որ ուշադրության պակաս ունի: Այնպես թոր կողմնորոշվեք՝ նեղվում եք ուշադրությունից, թե իրականում ունեք դրա պակասը:

Անի Սահակյան