Արմեն Ավետիսյանը ճիշտ էր, Նիկոլ Փաշինյանը սխալվեց

Ծաղկաձորի «Գոլդեն Փելես» հյուրանոցի աճուրդը չի կայացել` գնորդներ չլինելու պատճառով: Հյուրանցը, հիշեցնեք, պետականացվել էր կոռուպցիայի դեմ պայքարի շրջանակում:

Մաքսային ծառայության նախկին ղեկավար Արմեն Ավետիսյանը նվիրատվություն էր կատարել պետությանը, որի դիմաց նրա նկատմամբ քրեական գործ չհարուցվեց, իսկ «Գոլդեն Փելես» հյուրանոցը դարձավ պետական սեփականություն: Հյուրանցը աճուրդի էր դրվել 7 մլրդ 526 մլն դրամ մեկնարկային գնով: Պետգույքի կառավարման կոմիտեի նախագահ Նարեկ Բաբայանը տեղեկացրել է, որ աճուրդին մասնակցելու ցանկություն հայտնողներ եղել են, սակայն կամ չեն հասցրել հայտ ներկայացնել, կամ մտափոխվել են: Ըստ նրա ` որոշ ներդրողներից արձագանք են ստացել, որ հաշվարկը չի արդարացնում՝ այսինքն` գինը բարձր է, և չեն կարողանալու իրենց ներդրումը հետ բերել:

Հաջորդ աճուրդի ժամանակ արդեն ըստ կարգի մեկնարկային արժեքը պետք է 5 տոկոսով նվազի: Դեռ այն ժամանակ, երբ հյուրանոցը նոր էր պետականացվել, մենք անդադարձել ենք այս խնդրին` կասկած հայտնելով, թե օտարման դեպքում արդյոք հնարավոր է 7,5 մլրդով վաճառել այդ հյուրանոցը: Եթե կար նման գնորդ, ապա մինչև պետականացումը կարելի էր գործարքը կնքել և գումարը ուղղակի փոխանցել պետական բյուջե: Գրել էինք նաև, որ ՀՀ անշարժ գույքի շուկայում դեռևս նման թանկարժեք գործարք չի կնքվել, և դեռ ժամանակը ցույց կտա` այդ պետականացումը վերջնարդյունքում պետությանը տվեց այն մեծ եկամուտը, որի մասին այսքան բարձր նոտայով խոսվում է ամիսներ շարունակ:

Պարզ էր, որ բարձր գնով հյուրանոցը չվաճառելու դեպքում, գինը փուլ առ փուլ պետք է իջեցնել և ի վերջո այն օտարել էժան գնով, ինչպես դա արվել է նախկինում, բազմաթիվ պետական գույքերի օտարման ժամանակ: Ժամանակին խոսվում էր նաև, որ հյուրանոցն ունի վարկային պարտավորություններ: Բացի այդ` պետականացումից հետո բյուջեից ամսական 6,5 մլն դրամ գումար է հատկացվում հյուրանոցի պահպանման համար:
Ընդամենը արձանագրենք, որ կառավարությունը խորապես սխալվել է` Մաքսային ծառայության նախկին ղեկավար Արմեն Ավետիսյանի «Գոլդեն Փելես» հյուրանոցը» 7,5 մլրդ դրամ գնահատելով: Փաստորեն Արմեն Ավետիսյանը ճիշտ էր, Նիկոլ Փաշինյանը սխալվեց` այդ հյուրանոցն այդքան չարժեր:

Հայկ Դավթյան